ខេត្តព្រះវិហារ ៖ ប្រជាកសិករនៅខេត្តព្រះវិហារសង្ឃឹមថា នៅឆ្នាំនេះ ដំណាំស្រូវនឹងទទួលបាននូវទិន្នផលខ្ពស់ជាងឆ្នាំមុន ខណៈបច្ចុប្បន្ន ពួកគាត់កំពុងមមាញឹកភ្ជួររាស់ និងដកស្ទូងបង្កបង្កើនផលស្រូវរដូវវស្សា ។ គិតមកដល់ខែមិថុនានេះ នៅទូទាំងខេត្តព្រះវិហារ ដាំដុះបានជិត២០%ហើយ លើផែនការដែលគ្រោងទុករបស់មន្ទីរកសិកម្មខេត្ត ប្រមាណជាង៩ម៉ឺនហិកតា បើប្រៀបធៀបនឹងឆ្នាំមុន កើនឡើង៥ពាន់ហិកតា ។
អ្នកស្រី ញឹម ចន្ថា ជាកសិកររស់នៅភូមិក្រាំងដូង ឃុំព្រះឃ្លាំង ស្រុកត្បែងមានជ័យ បាននិយាយនៅថ្ងៃទី១៩ មិថុនា ថា ឆ្នាំនេះ កសិករនៅខេត្តព្រះវិហារមមាញឹកបង្កបង្កើនផលចាប់តាំងពីដើមរដូវវស្សាមកម្ល៉េះ ព្រោះនៅឆ្នាំ២០១៨នេះឃើញថា ទឹកភ្លៀងមានអំណោយផលច្រើនសម្រាប់កសិករដាំដុះដំណាំស្រូវ បើប្រៀបធៀបនឹងឆ្នាំមុនវិញ ក៏មិនខុសគ្នាឡើយ។ អ្នកស្រីរំពឹងថា ៖« ឆ្នាំនេះ ទិន្នផលស្រូវរបស់អ្នកស្រីនឹងកើនឡើងច្រើនជាងឆ្នាំមុន ប្រសិនណាទឹកភ្លៀងនៅតែបន្តធ្លាក់ជាបណ្តើរៗទៀតនោះ ព្រោះដំណាំនេះត្រូវការទឹកជាចាំបាច់បំផុត » ។
កសិករមួយរូបទៀត លោក ស៊ឹម វុទ្ធី បានលើកឡើងថា នៅក្នុងភូមិអភិវឌ្ឍន៍ សង្កាត់ប៉ាល ក្រុងព្រះវិហារ កសិករភាគច្រើនបានដាំដុះដំណាំស្រូវជាលក្ខណៈទម្លាប់ រីឯប្រភេទស្រូវដាំដុះដកស្ទូងនោះ ជាប្រភេទស្រូវកណ្តាល ស្រូវរំដួល ព្រោះកន្លងទៅ លោកផ្ទាល់បានដាំដុះដំណាំស្រូវនេះ ឃើញថា ទទួលបានទិន្នផលច្រើន ។ ការដាំដុះប្រភេទស្រូវពង្រោះនឹងអាចប្រមូលផលនៅដើមខែវិច្ឆិកានេះ ។
លោក ពឹង ទ្រីដា ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត បានឲ្យដឹងថា នៅទូទាំង៨ក្រុង-ស្រុកនៃខេត្តព្រះវិហារ បច្ចុប្បន្ននេះ ការបង្កបង្កើនផលស្រូវរដូវវស្សារបស់ប្រជាកសិករ គឺសម្រេចបានប្រមាណជិត២០%ហើយ លើផែនការដែលគ្រោងទុករបស់មន្ទីរកសិកម្ម រុក្ខាប្រមាញ់ និងនេសាទខេត្ត ។ ការបង្កបង្កើនផលស្រូវរបស់ពួកគាត់មានលក្ខណៈសរីរាង្គសុទ្ធសាធ នឹងភាគច្រើនជាប្រភេទស្រូវធ្ងន់ និងស្រូវកណ្តាល ។
ដោយឡែក បញ្ហាសត្វចង្រៃបំផ្លាញដំណាំស្រូវ ពុំទាន់មានជួបនៅឡើយទេ ព្រោះនៅតាមបណ្តាស្រែនីមួយៗមានទឹកគ្រប់គ្រាន់ គឺទឹកភ្លៀងបានធ្លាក់ជាបន្តបន្ទាប់ ។ គិតមកដល់ខែមិថុនានេះ កម្ពស់ទឹកភ្លៀងបានធ្លាក់នៅក្នុងក្របខ័ណ្ឌទូទាំងខេត្តព្រះវិហារ មានប្រមាណជិត៥០០មីល្លីម៉ែត្រហើយ ដែលជាអំណោយផលដល់ការបង្កបង្កើនផលរបស់កសិករ និងគ្មានការរាំងស្ទះឡើយ ។
យោងតាមរបាយការណ៍របស់មន្ទីរកសិកម្ម រុក្ខាប្រមាញ់ និងនេសាទខេត្ត នៅឆ្នាំ២០១៨នេះបង្ហាញថា ផ្ទៃដីដាំដុះដំណាំស្រូវសរុបមាន៨ម៉ឺន៨ពាន់ហិកតា បើធៀបនឹងឆ្នាំ២០១៧កន្លងមក មានត្រឹមតែ៨ម៉ឺន៣ពាន់ហិកតាប៉ុណ្ណោះ ៕
ចែករំលែកព័តមាននេះ