ខេត្តបន្ទាយមានជ័យ ៖ ក្រោយពេលអាជ្ញាធរក្រុងប៉ោយប៉ែត ប្រកាសផ្សព្វផ្សាយពីការលើកតួប្រាសាទកំពូលបីទាំងមូល នៅច្រកទ្វារអន្តរជាតិប៉ោយប៉ែត យកទៅដាក់នៅទីតាំងថ្មីនិងរៀបចំរចនាលម្អឲ្យល្អជាងមុន និងចំណាយទឹកប្រាក់រហូតរាប់ម៉ឺនដុល្លា នាពេលកន្លងមកនោះ អ្នកឆ្លងកាត់ច្រកទ្វារអន្តរជាតិមួយនេះទាំងភ្ញៀវជាតិ និងអន្តរជាតិ បានកើតមានចម្ងល់ថា មិនដឹងការលើកតួប្រាសាទនេះ ដោយរបៀបណាទេ?។
អ្វីដែលជាចម្ងល់របស់មហាជន គឺត្រូវបានឃើញជាក់ស្តែងហើយ នៅព្រឹកថ្ងៃទី១៨ មិថុនា នេះ ដោយការលើកយកប្រាសាទកំពូលបី ពីច្រកទ្វារអន្តរជាតិប៉ោយប៉ែត ត្រូវក្រុមជាងកាត់យកជាបំណែកៗ មិនមែនស្ទូចម្តងទាំងអស់នោះទេ ។ នៅព្រឹកថ្ងៃដដែលនេះ អាជ្ញាធរបានចាប់ផ្តើមកាត់ស្ទូចយកកំពូលប្រាសាទទាំងបីម្តង១កំពូលៗ ។
លោកសាន ស៊ានហូ អភិបាលនៃគណៈអភិបាលក្រុងប៉ោយប៉ែតប្រាប់កោះសន្តិភាពថា ថ្ងៃនេះស្ទូចយកតែកំពូលប្រាសាទទាំង៣សិន ចំណែកតួប្រាសាទទាំងមូលខាងជាង និងកាត់ជា៣បំណែកដូចគ្នា ប៉ុន្តែអាចស្ទូច(តួប្រាសាទ)នៅសប្តាហ៍ក្រោយ ។ ដោយឡែក គ្រោងឆ្អឹងដែកដែលជាទម្រប្រាសាទទាំងមូល នាពេលកន្លងមក គឺយកទៅធ្វើជាស្ពាននៅចំណុចភូមិណាមួយនាពេលខាងមុខ ។ លោកបន្តថា កំពូលប្រាសាទទាំង៣ និងតួប្រាសាទក្រោយកាត់ និងស្ទូចចុះរួចនិងយកទៅរក្សាទុកចំណុចបរិវេណកាស៊ីណូក្រែន ដាយម៉ឹនស៊ីធីបណ្តោះអាសន្នសិន ។
លោកបញ្ជាក់ថា ប្រហែលចុងខែធ្នូ ឆ្នាំ២០១៨ ទើបប្រាសាទកំពូលបីខាងលើ និងលេចចេញជារូបរាងទាំងស្រុងជាមួយនិងក្បូរក្បាច់រចនាដ៏អស្ចារ្យលើបរិវេណរង្វង់មូល ។
ចែករំលែកព័តមាននេះ