ខេត្តសៀមរាប ៖ រថយន្តដឹកជ្រូកចេញពីជើងភ្នំគូលែន ដាច់រ៉ូទីល(ដៃខ្មោច) បណ្តាលឱ្យរេចង្កូត បុកបង្កាន់ដៃស្ពាន ក្រឡាប់ធ្លាក់ចូលវាលស្រែ ងាប់ជ្រូក៤ក្បាល សំណាងល្អម្ចាស់អត់មានបញ្ហា។ ហេតុការណ៍ក្រឡាប់ឡានដឹកជ្រូកនោះបានកើតឡើងនៅវេលាម៉ោង១ និង៥០នាទីរសៀល ស្ថិតនៅចំណុចខាងលិចស្ពានកក់ឆ្មា ខាងត្បូងផ្លូវជាតិលេខ៦ ក្នុងភូមិត្រពាំងច្រាំង ឃុំក្រឡាញ់ ស្រុកក្រឡាញ់ ខេត្តសៀមរាប។
លោកវរៈសេនីយ៍ឯក ជី បេងជន អធិការនគរបាលស្រុកក្រឡាញ់ បានឱ្យដឹងនៅវេលាម៉ោង៦ និង៣០នាទីល្ងាច ថ្ងៃទី១៧ ខែមិថុនានេះថា មានរថយន្តម៉ាក Rayno ពណ៌ស ពាក់ស្លាកលេខ ភ្នំពេញ 3C-5299 ប្រភេទភ្លៅ២ បើកបរដោយឈ្មោះ កែវ សារ៉ាវី ភេទប្រុស អាំយុ២០ឆ្នាំ ទីលំនៅភូមិត្រពាំងរូង ឃុំត្រពាំងរូង ស្រុកកោះកុង ខេត្តកោះកុង (ឡានឯកជនដឹកជ្រូករបស់ក្រុមហ៊ុន CPដឹកចេញពីជើងភ្នំគូលែន)។
តាមការឆ្លើយបំភ្លឺពីអ្នកបើកបរថា៖ ខ្លួនបានបើកបររថយន្តដឹកជ្រូកតាមបណ្តោយផ្លូវជាតិលេខ៦ ពីទិសខាងកើត ទៅទិសខាងលិច ពេលដល់កន្លែងកើតហេតុរថយន្តរបស់ខ្លួនបានដាច់រ៉ូទីល(ដៃខ្មោច) ក៏រេចង្កូចទៅខាងស្តាំដៃ ហើយបុកប៉ះបង្កាន់ដៃស្ពានខាងស្តាំតែម្តង រួចរថយន្តបានត្រលប់ទៅខាងឆ្វេងដៃនៅខាងត្បូងផ្លូវជាតិ៦ ក្នុងនោះជ្រូកនៅលើរថយន្តចំនួន៥៣ក្បាល (ងាប់ចំនួន០៤ក្បាល)។ បច្ចុប្បន្ន ម្ចាស់រថយន្តដឹកជ្រូក ត្រូវបានកម្លាំងជំនាញរបស់អធិការស្រុកក្រឡាញ់បានធ្វើការអប់រំឱ្យត្រឡប់ទៅផ្ទះវិញហើយ៕
ចែករំលែកព័តមាននេះ