ខេត្តប៉ៃលិន ៖ បុរសម្នាក់បើកបរម៉ូតូរ៉ឺម៉កមានដឹកពូកសំពីងសំពោង លុះឆ្លងផ្លូវមិនប្រុងប្រយ័ត្ន បណ្តាលឱ្យរថយន្តបើកបរតាមផ្លូវត្រង់ ចាប់ហ្វ្រាំងមិនទាន់ក៏បុកពេញទំហឹងបណ្តាលឱ្យរងរបួសធ្ងន់ម្នាក់ និងស្រាលម្នាក់ ។ ហេតុការណ៍នេះបានកើតឡើងកាលពីវេលាម៉ោង២និង៣០នាទីរសៀលថ្ងៃ១៦ ខែមិថុនា ឆ្នាំ២០១៨ ស្ថិតនៅចំណុចផ្លូវបំបែកភូមិបុស្អំ ក្នុងភូមិបុស្អំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
ប្រភពព័ត៌មានបានឱ្យដឹងថា ជនរងគ្រោះទាំង២នាក់ ម្នាក់ឈ្មោះ ម៉ៃ ភេទប្រុស អាយុ២២ឆ្នាំ មុខរបរលក់ពូក ជាអ្នកបើកបរម៉ូតូសណ្ដោងរ៉ឺម៉កមានដឹកពូក រស់នៅខេត្តសៀមរាប បានរងរបួសដៃ និងក្បាលធ្ងន់ ចំណែកម្នាក់ទៀតឈ្មោះ ស៊ីន ភេទប្រុស អាយុ២៥ឆ្នាំ មុខរបរលក់ពូក ជាអ្នករួមដំណើរជាមួយគ្នា រស់នៅភូមិក្បាលស្ពាន ឃុំក្បាលស្ពាន ក្រុងប៉ោយប៉ែត ខេត្តបន្ទាយមានជ័យ បានរងរបួសជើង និងដៃ ។ ចំណែកភាគីខាងរថយន្តឈ្មោះ តេន ណារិទ្ធ ភេទប្រុស អាយុ៣១ឆ្នាំ មុខរបរអាជីវករ ជាអ្នកបើកបររថយន្តម៉ាក Camry Prus ពណ៌ស ពាក់ស្លាកលេខ ភ្នំពេញ ២AI-០៨៣៣ ។
តាមប្រភពបានឱ្យដឹងថា មុនពេលកើតហេតុ គេឃើញរថយន្តខាងលើបើកបរក្នុងទិសដៅពីកើតទៅលិច មានអ្នករួមដំណើរជិះក្នុងរថយន្តនោះចំនួន៥នាក់ លុះពេលកំពុងធ្វើដំណើរមកដល់កន្លែងកើតហេតុស្រាប់តែមានម៉ូតូរ៉ឺម៉ក១គ្រឿងដឹកពូកសំពីងសំពោងបានបើកបរឆ្លងផ្លូវ ដោយខ្វះការប្រុងប្រយ័ត្ន បណ្តាលឱ្យអ្នកបើកបររថយន្តចាប់ហ្វ្រាំងមិនទាន់ក៏បុកពេញទំហឹង បណ្តាលឱ្យអ្នកបើកបរម៉ូតូរ៉ឺម៉ករងរបួសធ្ងន់ ចំណែកអ្នករួមដំណើរម្នាក់ទៀតរងរបួសស្រាល រីឯម៉ូតូរ៉ឺម៉ករងការខូចខាតយ៉ាងដំណំ ត្រូវបានម្ចាស់យកទៅជួសជុល ។ ចំណែករថយន្តខាងលើក៏រងការខូចខាតផងដែរ ។
ក្រោយកើតហេតុ ជនរងគ្រោះត្រូវបានបញ្ជូនទៅព្យាបាលនៅមន្ទីរពេទ្យបង្អែកខេត្តប៉ៃលិន រីឯរថយន្តបង្កត្រូវបានយកទៅរក្សាទុកនៅអធិការដ្ឋាននគរបាលស្រុកសាលាក្រៅ រង់ចាំការដោះស្រាយ ៕
ចែករំលែកព័តមាននេះ