សហរដ្ឋអាមេរិក ៖ ប្រធានាធិបតីអាមេរិកលោកដូណាល់ ត្រាំ បានជួបប្រទះរឿងអាស្រូវថ្មីមួយទៀត ហើយអគ្គរដ្ឋអាជ្ញារដ្ឋញូវយ៉ក លោកស្រី BARBARA UNDERWOOD បានប្ដឹងលោកត្រាំ នៅតុលាការកាលពីថ្ងៃទី១៤ មិថុនា ដោយចោទលោកថា ពង្វាងយកប្រាក់ពីមូលនិធិលោកផ្ទាល់សម្រាប់គោលដៅផ្ទាល់ខ្លួន។
ភ្លាមៗលោកត្រាំបានបរិហារការចោទប្រកាន់នោះថា ជារឿងគួរឲ្យអស់សំណើច។ តាម TWITTER លោកបានចោទពួកអ្នកប្រជាធិបតេយ្យដែលដឹកនាំរដ្ឋញូវយ៉កថា ធ្វើអ្វីគ្រប់យ៉ាង ដើម្បីវាយប្រហារលោកនៅតុលាការ។
ក្រៅពីប្រធានាធិបតីអាមេរិក លោកស្រីអគ្គរដ្ឋអាជ្ញារូបនេះ ក៏ប្ដឹងកូន៣នាក់របស់លោកត្រាំ គឺលោក DONALD JR. លោក ERIC និងលោកស្រីអ៊ីវ៉ានកា ដែលសុទ្ធតែជាសមាជិកក្រុមប្រឹក្សាភិបាលមូលនិធិនោះ។ លោកត្រាំត្រូវចោទថា ប្រើប្រាស់ប្រាក់មូលនិធិចំណាយលើការចាយវាយផ្ទាល់ខ្លួនជាច្រើន និងផ្សាយពាណិជ្ជកម្មបណ្ដាសណ្ឋាគារ និងសហគ្រាសឯទៀតៗរបស់លោក។ យោងតាមលោកស្រីអគ្គរដ្ឋអាជ្ញារូបនេះថា ការស៊ើបអង្កេតក៏បង្ហាញផងដែរថា មូលនិធិត្រូវបានដកយកដល់ទៅ 2,8លានដុល្លារ ដើម្បីប្រើប្រាស់ក្នុងយុទ្ធនាការឃោសនាបោះឆ្នោតឆ្នាំ២០១៦ ដែលរំលោភបំពានច្បាប់អាមេរិក។ រីឯរដ្ឋញូវយ៉កទាមទារឲ្យរំលាយចោលមូលនិធិនេះ ហើយទារប្រាក់2,8លានដុល្លារមកវិញ។ ប៉ុន្តែលោកស្រីក៏ទាមទារដែរ ឲ្យលោកត្រាំត្រូវហាមឃាត់មិនឲ្យដឹកនាំអង្គការនេះនៅញូវយ៉ករយៈពេល១០ឆ្នាំ ចំណែកកូនៗលោកហាមឃាត់មិនឲ្យដឹកនាំមូលនិធិរយៈពេល១ឆ្នាំ៕
ចែករំលែកព័តមាននេះ