ខេត្តពោធិ៍សាត់ ៖ មន្ត្រីនគរបាលជាតិនៃស្នងការដ្ឋាននគរបាលខេត្តពោធិ៍សាត់ចំនួន១៥៥នាក់ បានធ្វើពិធីផ្លាស់ប្ដូរភារកិច្ចតែងតាំងមុខតំណែង បំពាក់ឋាន្តរស័ក្តិគ្រឿងឥស្សរិយយស និងប្រគល់ប័ណ្ណសរសើរជូន ដើម្បីជាការលើកទឹកចិត្តពីថ្នាក់ដឹកនាំ ក្នុងការខិតខំប្រឹងប្រែងបំរើការងារកន្លងកន្លងមកនេះ ។ ពិធីនេះបានប្រារព្ធធ្វើនៅស្នងការដ្ឋាននគរបាលខេត្ត ក្រោមអធិបតីភាពលោកឧត្តមសេនីយ៍ឯក ហុក ថាវណ្ណ អនុប្រធាននាយកដ្ឋានបុគ្គលិកក្រសួងមហាផ្ទៃ និងលោកបណ្ឌិត ម៉ៅ ធនិន អភិបាលនៃគណអភិបាលខេត្ត។
តាមប្រកាសរបស់ក្រសួងមហាផ្ទៃ បានតែងតាំងលោកវរសេនីយ៍ឯក ម៉ូ លីដា អតីតប្រធានការិយាល័យព្រហ្មទណ្ឌកម្រិតស្រាល ជាស្នងការរងនគរបាលខេត្តពោធិ៍សាត់។ផ្លាស់ប្ដូរភារកិច្ចមន្ត្រីនគរបាលតាមការិយាល័យនិងអធិការដ្ឋាននគរបាលក្រុង ស្រុកចំនួន៣៩រូប។បំពាក់ឋានន្ដរស័ក្កិចំនួន៨៦រូប ក្នុងនោះថ្នាក់វរសេនីយ៍ឯក១០រូប,ថ្នាក់វរសេនីយ៍ទោ២៨រូប,ថ្នាក់វរសេនីយ៍ត្រី៤៤រូប និងថ្នាក់អនុសេនីយ៍ឯក០៤រូប។ជាមួយគ្នានេះបានបំពាក់គ្រឿងឥស្សរិយយសដល់មន្ត្រីនគរបាលចំនួន២០រូបនិងជូនប័ណ្ណសរសើរចំនួន១០នាក់ផងដែរ។
លោកឧត្តមសេនីយ៍ ហុក ថាវណ្ណ និងលោកមបណ្ឌិត ម៉ៅ ធនិន បានកោតសរសើរដល់មន្ត្រីនគរបាលជាតិខេត្តពោធិ៍សាត់ ដែលបានសហការគ្នាបានល្អក្នុងការការពារសន្តិសុខសណ្ដាប់ធ្នាប់សង្គមនិងសុវត្ថិភាពជូនប្រជាពលរដ្ឋបានល្អប្រសើរ។ការផ្លាស់ប្ដូរភារកិច្ច តែងតាំងមុខតំណែង តម្លើងឋានន្តរស័ក្កិ និងបំពាក់គ្រឿងឥស្សរិយយសនាពេលនេះ គឺជាការយកចិត្តទុកដាក់របស់ថ្នាក់ដឹកនាំក្រសួងមហាផ្ទៃនិងថ្នាក់ដឹកនាំខេត្ត ដើម្បីលើកទឹកចិត្តដល់មន្ត្រីនគរបាលជាតិ ដែលបានខិតខំបំពេញការងារកន្លងមកនេះ។
បន្ទាប់ពីទទួលបានមុខតំណែងនិងឋានន្តរស័ក្កិពីថ្នាក់ដឹកនាំស្របតាមបំណងប្រាថ្នារបស់ខ្លួនហើយនេះ សូមឲ្យមន្ត្រីនគរបាលជាតិទាំងអស់បន្តខិតខំប្រឹងប្រែងតាមតួនាទីភារកិច្ចរបស់ខ្លួនឲ្យបានកាន់តែល្អប្រសើរឡើងថែមទៀតដើម្បីប្រជាពលរដ្ឋយើងរស់នៅសុខស្រួលនិងភូមិឃុំមានសុវត្ថិភាព។
ចែករំលែកព័តមាននេះ