ខេត្តបន្ទាយមានជ័យ ៖ ស្រីស្អាតស្លៀកពាក់ខើចខ្លីម្នាក់ដែលអ្នកស្រុកប្រទះឃើញដេកសន្លប់ស្តូកស្តឹងជិតម៉ូតូស្គូពីមួយគ្រឿង ហើយត្រូវបានអ្នកចិត្តធម៌នាំគ្នានៅមើលការពារ និងរាយការណ៍ប្រាប់សមត្ថកិច្ចឲ្យរករថយន្តសង្គ្រោះដឹកទៅមន្ទីរពេទ្យនោះ ពេលនេះដឹងការពិតហើយគឺនាងជិះម៉ូតូដួលខ្លួនឯង ដែលសង្ស័យស្រវឹងព្រោះទើបវិលត្រឡប់ពីចូលរួមកម្មវិធីមិត្តភក្តិ ។
ហេតុការណ៍ខាងលើ កើតឡើងនៅលើផ្លូវបេតុងក្នុងភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត កាលពីវេលាម៉ោង១រំលងអធ្រាត្រឈានចូលថ្ងៃទី៩ ខែមិថុនា ។ នារីរូបនេះឈ្មោះ ពេជ្រ ស៊ីថា អាយុ៣៣ឆ្នាំ ជាបុគ្គលិកកាស៊ីណូមួយនៅក្រុងប៉ោយប៉ែត និងមានទីលំនៅក្នុងភូមិខាងលើ ។នាងជិះម៉ូតូស្គូពីពណ៌ស ពាក់ផ្លាកលេខ បាត់ដំបង ១T-៥១០៣បើកបរពីទិសខាងលិច ។
មកទល់នឹងព្រឹកថ្ងៃទី៩ ខែមិថុនា ស្ត្រីរងគ្រោះនៅមិនទាន់ដឹងខ្លួនអាចសួរនាំបាននៅឡើយទេ ។ ប៉ុន្តែយោងតាមស្ត្រីជាម្តាយបានប្រាប់ថា កូនគាត់ក្រោយចេញពីធ្វើការ បានផ្លាស់សម្លៀកបំពាក់រួចទៅចូលរួមកម្មវិធីមិត្តភក្តិ ។ លុះនៅវេលាទៀបភ្លឺ ស្រាប់តែទទួលដំណឹងថា កូនស្រីគាត់ដេកពេទ្យ ។
ស្ត្រីរងគ្រោះ ត្រូវបាននគរបាលក្រុងប៉ោយប៉ែតហៅរថយន្តសង្គ្រោះរបស់អង្គការកាម៉ាដឹកទៅមន្ទីរពេទ្យបង្អែកក្រុងប៉ោយប៉ែត ចំណែកម៉ូតូយកទៅរក្សាទុកបណ្តោះអាសន្ននៅអធិការដ្ឋាននគរបាលក្រុង ។ អ្នកភូមិនិយាយថា បើជនមិនល្អបានជួបនាងក្នុងស្ថានភាពបែបនេះ អាចអស់ទាំងខ្លួនប្រាណពិសេសម៉ូតូនិងទូរស័ព្ទដ៏ល្អមួយគ្រឿង ក៏អាចគេយកទៅក៏ថាបានដែរ ៕
ចែករំលែកព័តមាននេះ