ប្រធានាធិបតីរុស្ស៊ីលោក វ៉ា្លឌីមៀរ ពូទីនបាននិយាយថា «ក្រុមម្ចាស់ផ្ទះរុស្ស៊ីត្រូវតស៊ូប្រយុទ្ធរហូតដល់ទីបញ្ចប់ទោះបីទម្រង់លេងក្នុង World Cup ខ្សោយក្ដី» ។
ក្នុងនាមជាម្ចាស់ផ្ទះ ក្រុមជម្រើសជាតិរុស្ស៊ីទទួលបានសិទ្ធិលេង World Cup ២០១៨ ដោយស្វ័យប្រវត្តិ ខណៈបច្ចុប្បន្នក្រុមដែលមានរហស្សនាម «ខ្លាឃ្មុំទឹកកក» មួយនេះមិនត្រឹមតែមិនទាន់ភ្លក់រសជាតិឈ្នះនៅឡើយទេថែមទាំងស្ថិតក្នុងចំណាត់ថ្នាក់ទាបជាងគេលេខ៧០ក្នុងចំណោម៣១ក្រុមផ្សេងទៀតរបស់ស្ថាប័ន FIFA ។ ក្រុមរុស្ស៊ីនឹងបើកឆាកប្រកួតដោយស្វាគមន៍ក្រុមអារ៉ាប៊ីសាអូឌីតនៅពហុកីឡដ្ឋាន Luzhniki Stadium ក្រុងម៉ូស្គូ នៅវេលាម៉ោង១០យប់នេះ ។
លោកពូទីននិយាយថា «ក្រុមបាល់ទាត់របស់យើងមិនទាន់ទទួលលទ្ធផលល្អសោះក្នុងពេលថ្មីៗនេះ» ។ ជ័យជម្នះរបស់ក្រុមរុស្ស៊ីកាលពីថ្ងៃទី៧ តុលា ២០១៧ ដោយលត់ក្រុមកូរ៉េខាងត្បូង៤-២នៅក្នុងជំនួបមិត្តភាព តែបានចាញ់ក្រុមអាហ្សង់ទីន ប្រេស៊ីល បារាំង និងអូទ្រីស ហើយថ្មីៗនេះស្មើជាមួយក្រុមអុីរ៉ង់ អេស្ប៉ាញ និងតួកគី ។
ទោះជាយ៉ាងណាក៏ដោយលោកពូទីនរំពឹងថា លោក Stanislav Cherchesov នឹងដឹកនាំក្រុមរុស្ស៊ីបោះជំហានទៅមុខជាមួយនឹងឆន្ទះគាំទ្ររបស់ប្រជាជន ១៤៤ លាននាក់ ៕
ចែករំលែកព័តមាននេះ