ទីក្រុងបាងកក ៖ អ្នកគ្រប់គ្រងអាជីវកម្មមកពីបណ្តាប្រទេសក្នុងតំបន់ទន្លេមេគង្គក្រោម បានស្នើឲ្យរដ្ឋាភិបាលរបស់ខ្លួនប្រើប្រាស់រូបិយប័ណ្ណក្នុងស្រុកសម្រាប់ការធ្វើពាណិជ្ជកម្មនៅតាមព្រំដែន ដើម្បីសម្រួលដល់ការទិញដូរ និងកាត់បន្ថយការចំណាយលើការប្តូរប្រាក់ផងដែរ ។ ប្រទេសទាំងនេះរួមមាន កម្ពុជា ឡាវ មីយ៉ាន់ម៉ា វៀតណាម និងថៃ (CLMVT)។ ផែនការប្រើប្រាស់រូបិយប័ណ្ណក្នុងស្រុកនេះ នឹងស្នើនៅក្នុងកិច្ចប្រជុំកំពូល ស្តីពីយុទ្ធសាស្ត្រកិច្ចសហប្រតិបត្តិការសេដ្ឋកិច្ចមេគង្គ Ayeyawady-Chao Phraya-Mekong Economic Cooperation Strategy (ACMECS) នាថ្ងៃទី១៥-១៦ ខែមិថុនា នៅទីក្រុងបាងកក ប្រទេសថៃ ។
លោក Sanan Angubolkul ប្រធានក្រុមប្រឹក្សាអាជីវកម្ម ACMECS បាននិយាយថា អ្នកគ្រប់គ្រងអាជីវកម្មមកពីប្រទេសនីមួយៗគិតថា ការប្រើប្រាស់រូបិយប័ណ្ណក្នុងស្រុកនឹងជួយសម្រួលដល់ការធ្វើពាណិជ្ជកម្មតាមព្រំដែន ព្រមទាំងកាត់បន្ថយការប្តូរប្រាក់ ។ លោកថា ៖ «យើងសង្ឃឹមថា រដ្ឋាភិបាលថៃនឹងយល់ស្របជាមួយផែនការរូបិយប័ណ្ណនេះរបស់យើង » ។
ក្នុងកិច្ចប្រជុំនាពេលខាងមុខនេះ អ្នកគ្រប់គ្រងអាជីវកម្មនឹងស្នើឲ្យរដ្ឋាភិបាលរបស់ខ្លួន ផ្តល់ទិដ្ឋាការ ដើម្បីសម្រួលដល់ភ្ញៀវទេសចរបរទេសដែលទៅកាន់ប្រទេសឡាវ មីយ៉ាន់ម៉ា និងវៀតណាម ។ បច្ចុប្បន្ន មានតែប្រទេសថៃ និងកម្ពុជាប៉ុណ្ណោះ ដែលបានលើកលែងទិដ្ឋាការនេះ ។
លោក Sanan បានបន្ថែមថា ពួកគេក៏បានស្នើឲ្យរដ្ឋាភិបាលរៀបចំមជ្ឈមណ្ឌលស៊ើបអង្កេតនៅកន្លែងត្រួតពិនិត្យតាមព្រំដែនតែម្តង ដែលអាចជួយសម្រួលដល់រថយន្តដឹកជញ្ជូនផលិតផលក្នុងតំបន់អាស៊ីអាគ្នេយ៍ ។ រថយន្តដឹកជញ្ជូនផលិតផលជាច្រើនគ្រឿងត្រូវរង់ចាំអស់រយៈពេលយ៉ាងយូរសម្រាប់ការត្រួតពិនិត្យនៅតាមព្រំដែន មានន័យថា ផលិតផលស្រស់ៗអាចនឹងខូចគុណភាព មុននឹងដឹកទៅដល់គោលដៅរបស់ពួកគេ ៕
ចែករំលែកព័តមាននេះ