ទីក្រុងបែរឡាំង ៖ លោកស្រីអធិការបតី របស់ប្រទេសអាល្លឺម៉ង់ Angela Merkel បាននិយាយកាលពីថ្ងៃអាទិត្យថា សហភាពអឺរ៉ុប (EU) នឹងអនុម័តវិធានការឆ្លើយតបនឹងការដាក់ពន្ធរបស់អាមេរិកលើដែកថែប…
ទីក្រុងបែរឡាំង ៖ លោកស្រីអធិការបតី របស់ប្រទេសអាល្លឺម៉ង់ Angela Merkel បាននិយាយកាលពីថ្ងៃអាទិត្យថា សហភាពអឺរ៉ុប (EU) នឹងអនុម័តវិធានការឆ្លើយតបនឹងការដាក់ពន្ធរបស់អាមេរិកលើដែកថែប និងអាលុយមីញ៉ូមនាំចូល ដូចប្រទេសកាណាដាដែរ។
ការសម្រេចចិត្តនេះ គឺបង្ហាញពីការសោកស្តាយដែលលោកប្រធានាធិបតីអាមេរិក ដូណាល់ ត្រាំ បានសម្រេចចិត្តមិនគាំទ្រសេចក្តីថ្លែងការណ៍រួមរបស់ G7 ។ លោកស្រីបន្តថា កិច្ចប្រជុំ G7 មិនមែនជាការបញ្ចប់នៃការចាប់ដៃគូឆ្លងសមុទ្រអាត្លង់ទិករវាងអឺរ៉ុប និងសហរដ្ឋអាមេរិកឡើយ ។ ប៉ុន្តែលោកស្រីបាននិយាយជាថ្មីថា អឺរ៉ុបមិនអាចពឹងផ្អែកលើសម្ព័ន្ធមិត្តរបស់ខ្លួនបន្តទៀតទេ និងគួរតែសម្រេចជោគវាសនាដោយខ្លួនឯង ។
លោកស្រី Merkel មានប្រសាសន៍ថា ៖«សហភាពអឺរ៉ុបកំពុងតែរៀបចំវិធានការឆ្លើយតបនឹងការដាក់ពន្ធរបស់អាមេរិកលើដែកថែប និងអាលុយមីញ៉ូមនាំចូល ដោយស្របនឹងច្បាប់របស់អង្គការពាណិជ្ជកម្មពិភពលោក (WTO) ដូចប្រទេសកាណាដាដែរ » ។ នៅពេលសួរថា តើលោកស្រីព្រួយបារម្ភថា លោកត្រាំ អាចនឹងឆ្លើយតបវិញដោយដាក់ពន្ធលើរថយន្តដែរឬទេ ? លោកស្រីថា ៖« ជាដំបូង ពួកយើងនឹងព្យាយាមមើលថា តើពួកយើងអាចចៀសវាងវាបានឬទេ ហើយយើងសង្ឃឹមថា EU នឹងឆ្លើយតបជាថ្មី ដោយការសាមគ្គីគ្នាម្តងទៀត » ។
លោកស្រី Merkel បានបន្តទៀតថា អ្នកដឹកនាំនៅក្នុង G7 បានព្រមព្រៀងគ្នាថា នឹងត្រួតពិនិត្យលើទំនាក់ទំនងពាណិជ្ជកម្មរបស់ពួកគេជាថ្មី និងសិក្សាពីពន្ធដែលកំពុងមានស្រាប់ ដើម្បីចៀសវាងពីឧបសគ្គពាណិជ្ជកម្មផ្សេងៗទៀត ៕
ចែករំលែកព័តមាននេះ