រាជធានីភ្នំពេញ ៖ មន្ត្រីរដ្ឋបាលរាជធានីភ្នំពេញបានឲ្យដឹងថា នៅព្រឹកថ្ងៃទី១២ មិថុនា នេះលោក ឃួង ស្រេង អភិបាលរាជធានីភ្នំពេញបានដឹកនាំមន្ត្រីជំនាញ ពាក់ព័ន្ធប្រជុំពិភាក្សាទៅលើផលប៉ះពាល់គម្រោងស្ថាបនាមហាវិថីព្រះឧកញ៉ាភក្តីសប្បុរសភោគាធិបតី ហ៊ុន នាង ដែលមានទទឹង៣០ម៉ែត្រឆ្លងកាត់តំបន់អភិវឌ្ឍន៏បឹងជើងឯកតភ្ជាប់ពីផ្លូវជាតិលេខ២ ដល់ផ្លូវ៣៧១ ។
លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញបានប្រាប់អ្នកសារព័ត៌មានក្រោយបញ្ចប់កិច្ចប្រជុំនៅសាលារាជធានីភ្នំពេញនោះថា អាជ្ញាធររាជធានីភ្នំពេញគ្រោងស្ថាបនាផ្លូវមួយខ្សែទទឹង៣០ម៉ែត្រដោយតភ្ជាប់ពីផ្លូវជាតិលេខ២ទៅតភ្ជាប់ផ្លូវ៦០ម៉ែត្រ និងបន្តទៅផ្លូវ៣៧១ស្ថិតនៅ តំបន់អភិវឌ្ឍន៍ជើងឯក ក្នុងខណ្ឌមានជ័យ ដែលជាគម្រោងធ្វើឲ្យមានជាសរសៃឈាមបន្ថែមទៀតនៅក្នុងការរៀបចំឲ្យមានប្រព័ន្ធចរាចរណ៍មានលក្ខណៈល្អប្រសើរ ដើម្បីកាត់បន្ថយការកកស្ទះនៅតំបន់ច្រមុះជ្រូកក្បាលថ្នល់ ។
លោកបន្តថា ផ្លូវថ្មីមួយខ្សែនេះត្រូវបានប្រសិទ្ធនាមថា មហាវិថីព្រះឧកញ៉ាភក្តីសប្បុរសភោគាធិបតីហ៊ុននាង ដែលជាផ្លូវថ្មីក្នុងគោលបំណងដើម្បីអនុវត្តន៍គម្រោងប្លង់មេនៃតំបន់អភិវឌ្ឍន៍ជើងឯក និងដើម្បីរៀបចំក៏ដូចសម្រួលឲ្យមានចរន្តសរសៃឈាមនៃការធ្វើចរាចរណ៍បានល្អប្រសើរ ។
លោក ម៉េត មាសភក្តី បានឲ្យដឹងទៀតថា នៅពេលដែលមានវត្តមានផ្លូវមួយខ្សែថ្មីនេះប្រជាពលរដ្ឋបានធ្វើដំណើរតាមផ្លូវ៣៧១អាចមានលទ្ធភាពធ្វើដំណើរទៅផ្លូវជាតិលេខ២ ឬតំបន់ផ្លូវ៦០ម៉ែត្រ បានងាយស្រួល ដោយពុំបាច់រង់ចាំធ្វើដំណើររហូតទៅដល់ច្រមុះជ្រូកក្បាលថ្នល់នោះទេ ។
លោកបញ្ជាក់ថា គម្រោងផ្លូវថ្មីនេះនឹងមានការតភ្ជាប់ជាមួយនឹងស្ពានមួយខ្សែដែលស្របជាមួយនឹងផ្លូវនេះ និងឆ្លងកាត់ប្រឡាយចុះពីបឹងទំពុនដែលត្រូវសាងសង់ស្ពានមួយប្រវែង៨០ម៉ែត្រ ដែលរដ្ឋបាលរាជធានីភ្នំពេញបានគិតគូរអំពីប្លង់មេ និងផលប៉ះពាល់នៃការស្ថាបនាផ្លូវនេះហើយគម្រោងអាចនឹងប៉ះពាល់ទៅលើគម្រោងអាងប្រព្រឹត្តិកម្មចម្រោះទឹកស្អាតដែលជាគម្រោងរបស់ចៃកា និងគម្រោងដទៃទៀតដែលប៉ះពាល់ដល់បងប្អូនប្រជាពលរដ្ឋដែលកំពុងរស់នៅតាមតំបន់ផ្លូវត្រូវស្ថាបនា ៕
ចែករំលែកព័តមាននេះ