រាជធានីភ្នំពេញ ៖ ក្រោយពីបែកធ្លាយព័ត៌មានអតីតបេក្ខជនក្នុងកម្មវិធី «ផ្កាយរះក្នុងសួន» ទួន ឆានឈុន ត្រូវបានសមត្ថកិច្ចចាប់ខ្លួនកន្លងទៅ ពីបទជិះម៉ូតូឆក់ទូរស័ព្ទនារីម្នាក់រួចមក ធ្វើឱ្យលោក ហ្វៃ សំអាង ខកចិត្តនិងសោកស្ដាយបំផុត ចំពោះហេតុការណ៍មួយនេះ ។
លោក ហ្វៃ សំអាង គឺជាអ្នករៀបចំកម្មវិធី «ផ្កាយរះក្នុងសួន» ដែលកម្មវិធីនេះ បានទាក់ទាញទស្សនិកជនយ៉ាងខ្លាំងនាពេលនោះ ។ លោកបានរៀបរាប់ថា លោកមានអារម្មណ៍សោកស្ដាយ និងខកចិត្តយ៉ាងខ្លាំង ដោយមិននឹកស្មានថា អតីតបេក្ខជនរូបនេះទៅប្រព្រឹត្តអំពើដែលសង្គមស្អប់ខ្ពើមដូច្នេះសោះ ។ គួរតែយកសមត្ថភាពដែលខ្លួនមានទៅប្រកបរបរចិញ្ចឹមជីវិត មិនគួរយកកេរ្តិ៍ឈ្មោះដែលខំកសាងឡើងយ៉ាងលំបាកលំបិនទៅបំផ្លាញត្រឹមមួយប៉ប្រិចភ្នែក ។
លោកនិយាយថា ទោះបីជា ទួន ឆានឈុន មិនបានកាន់ពានក្នុងកម្មវិធី «ផ្កាយរះក្នុងសួន» ក្ដី តែរូបគេបានទទួលពានប្រជាប្រិយភាពពីគណៈកម្មការ និងស្សនិកជនជាច្រើន ចំពោះសមត្ថភាពសំឡេងរបស់គេ ។«ខ្ញុំគ្មានពាក្យអ្វីត្រូវនិយាយ ក្រៅពីសោកស្ដាយនោះទេ ព្រោះខ្ញុំមិននឹកស្មានថា គាត់ទៅប្រព្រឹត្តអំពើដើរឆក់គេដូច្នេះសោះ ។ ហេតុអ្វីគាត់មិនយកសមត្ថភាពដែលគាត់មានទៅប្រើប្រើប្រាស់ប្រកបរបរចិញ្ចឹមជីវិត» លោក ហ្វៃ សំអាង បញ្ជាក់ ។
ទួន ឆានឈុន ជាអតីតបេក្ខជនក្នុងកម្មវិធី «ផ្កាយរះក្នុងសួន» រដូវកាលទី១ ឆ្នាំ២០១៣ ត្រូវបានសមត្ថកិច្ចចាប់ខ្លួន កាលពីថ្ងៃទី៨ មេសា ឆ្នាំ២០១៨ ពីបទធ្វើសកម្មភាពឆក់ទូរស័ព្ទ ពីនារីម្នាក់នៅកែងផ្លូវលេខ២១៥និងផ្លូវលេខ១៤៦ ស្ថិតក្នុងសង្កាត់វាលវង់ ខណ្ឌ៧មករា រាជធានីភ្នំពេញ ៕
គួររំលឹកថា ៖ ម្នាក់ៗធ្លាក់ថ្លើមក្ឌុក… ពេលចាប់បានចោរជាតារា
ចែករំលែកព័តមាននេះ