ខេត្តកំពង់ធំ ៖ ថ្លែងប្រតិកម្មជាសាធារណៈនៅក្នុងពិធីសម្ពោធដាក់ឱ្យប្រើប្រាស់ជាផ្លូវការកំណាត់ផ្លូវជាតិលេខ៦ ពីខេត្តកំពង់ចាមទៅខេត្តសៀមរាប នាព្រឹកថ្ងៃ១១ ខែមិថុនា សម្តេចតេជោនាយករដ្ឋមន្ត្រី ហ៊ុនសែន មានប្រសាសន៍ទាក់ទងទៅនឹងការផ្សព្វផ្សាយរឿងអាស្រូវព្រះសង្ឃមួយអង្គនិងនារីម្នាក់នៅក្នុងខេត្តបន្ទាយមានជ័យ និងបានអំពាវនាវឱ្យបញ្ចប់ការផ្សព្វផ្សាយពីរឿងនេះតទៅទៀត…
ខេត្តកំពង់ធំ ៖ ថ្លែងប្រតិកម្មជាសាធារណៈនៅក្នុងពិធីសម្ពោធដាក់ឱ្យប្រើប្រាស់ជាផ្លូវការកំណាត់ផ្លូវជាតិលេខ៦ ពីខេត្តកំពង់ចាមទៅខេត្តសៀមរាប នាព្រឹកថ្ងៃ១១ ខែមិថុនា សម្តេចតេជោនាយករដ្ឋមន្ត្រី ហ៊ុនសែន មានប្រសាសន៍ទាក់ទងទៅនឹងការផ្សព្វផ្សាយរឿងអាស្រូវព្រះសង្ឃមួយអង្គនិងនារីម្នាក់នៅក្នុងខេត្តបន្ទាយមានជ័យ និងបានអំពាវនាវឱ្យបញ្ចប់ការផ្សព្វផ្សាយពីរឿងនេះតទៅទៀត ដើម្បីការពារតម្លៃព្រះពុទ្ធសាសនា និងតម្លៃស្ត្រីខ្មែរផងដែរ ។
ប្រតិកម្មរបស់ប្រមុខរាជរដ្ឋាភិបាលនេះ ធ្វើឡើងក្រោយពីរឿងរ៉ាវអា- ស្រូវ របស់អតីតព្រះសង្ឃនិងនារីវ័យក្មេងម្នាក់នៅក្នុងខេត្តបន្ទាយមានជ័យ នៅតែបន្តកើតឡើងមិនចប់សោះ និងក្លាយជាការតភាគនៅលើបណ្តាញសង្គម ។ សម្តេចតេជោនាយករដ្ឋមន្ត្រី បានមានប្រសាសន៍ចំឈ្មោះអ្នកលេងហ្វេសប៊ុក២នាក់ ដែលល្បីឈ្មោះគឺ លោក ផែង វណ្ណៈ និងលោក ខ័ណ្ឌ ច័ន្ទសុផល ថាជាអ្នកបញ្ឆេះរឿងនេះឱ្យកាន់តែសុសសាយ ។ លោក ផែង វណ្ណៈ និងលោក ខ័ណ្ឌ ច័ន្ទសុផល ដែលសុទ្ធតែជាអ្នកល្បីល្បាញនៅលើបណ្តាញសង្គមហ្វេសប៊ុក បានចុះទៅសម្ភាសន៍ដាច់ដោយឡែកពីគ្នា ដោយលោក ផែង វណ្ណៈ សម្ភាសន៍ជាមួយអតីតសង្ឃ ឯលោក ខ័ណ្ឌ ច័ន្ទសុផល សម្ភាសន៍ជាមួយនារីដែលពាក់ព័ន្ធក្នុងរឿងអាស្រូវនេះ ។
ទង្វើទាំងនេះ ត្រូវបានសម្តេចតេជោនាយករដ្ឋមន្ត្រីចាត់ទុកថា ជាការបង្កើតរឿងឱ្យកាន់តែវែងឆ្ងាយដែលគ្មានចំណេញអ្វីសោះដល់សង្គម ។ សម្តេចតេជោ បានឱ្យអ្នកទាំង២បញ្ចប់ការផ្សព្វផ្សាយបន្តនូវរឿងរ៉ាវទាំងនេះ ។ តាមវិទ្យុបារាំងអន្តរជាតិផ្សាយវេលាថ្ងៃត្រង់ថ្ងៃ១១ ខែមិថុនា បានឱ្យដឹងថា ភ្លាមៗក្រោយពីរងការស្តីបន្ទោសនិងព្រមានពីសម្តេចតេជោនាយករដ្ឋមន្ត្រី លោក ផែង វណ្ណៈ និងលោកខ័ណ្ឌ ច័ន្ទសុផល តាមរយៈគណនេយ្យហ្វេសប៊ុករៀងៗខ្លួន បានចេញមកសន្យាឈប់ផ្សព្វផ្សាយបន្តនូវរឿងអាស្រូវនេះ ។ ក្រៅពីសន្យា លោក ផែង វណ្ណៈ ក៏បានសុំទោសសម្តេចតេជោនាយករដ្ឋមន្ត្រី ចំពោះកំហុសដែលបានប្រព្រឹត្ត ។ ចំណែកលោក ខ័ណ្ឌ ច័ន្ទសុផល បានអរគុណសម្តេចតេជោនាយករដ្ឋមន្ត្រី ដែលបានណែនាំរូបលោកចំពោះរឿងនេះ ។ សម្តេចតេជោនាយករដ្ឋមន្ត្រី បានអំពាវនាវឱ្យបញ្ចប់រឿងនេះ ដើម្បីការពារព្រះពុទ្ធសាសនា និងការពារតម្លៃស្ត្រីខ្មែរ ដោយសារតែជារឿងមិនសមហេតុផលទាល់តែសោះ វាមិនខុសពីការចាប់សង្អារបញ្ជល់គ្នាទេ ។ សម្តេចតេជោបន្ទោសថា អ្នកទាំង២សុទ្ធតែជាមន្ត្រីយោធាអស់លោកមិនខំរំងាប់អធិករណ៍ បែរជាបញ្ឆេះ ។
សម្តេចតេជោបានព្រមានថា រឿងបុគ្គលតែ២នាក់អស់លោកធ្វើឱ្យកក្រើក តើវាមានផលចំណេញអ្វីទៅ? ខាងលោកសង្ឃក៏បានទទួលវិន័យរួចទៅហើយ ឯខាងស្រីក៏ទទួលភាពអាម៉ាស់ច្រើនណាស់ទៅហើយ ។ តើខ្ញុំអាចសុំបានទេ អស់លោកអ្នកលេងហ្វេសប៊ុកទាំងឡាយបង្ករឿងដល់ណាទៀត ។ សម្តេចតេជោមានប្រសាសន៍ថា ខាង ផែង វណ្ណៈ និង ខ័ណ្ឌ ច័ន្ទសុផល អ្នកលេងហ្វេសប៊ុកគឺអត់ត្រូវគ្នាទេ ។ ផែង វណ្ណៈ ទៅសម្ភាសន៍លោកសង្ឃ ឯខ័ណ្ឌ ចាន់សុផល សម្ភាសន៍ខាងស្រី នាងទប់ចិត្តមិនបានក៏បង្ហោះទាំងអស់ ទាំងសារសំឡេង ។ បើយ៉ាងដូច្នេះ តើដំណើរជាតិយើងវាយ៉ាងម៉េច គ្រាន់តែរឿងប៉ុណ្ណឹង ។សម្តេតេជោថ្លែងថា ព្រះពុទ្ធសាសនាមិនគប្បីអាប់ឱនទៅតាមរយៈការប្រព្រឹត្តអំពើមិនគប្បីដោយសង្ឃមួយអង្គ ឬពីរអង្គនោះទេ ។ ឯស្ត្រីខ្មែរ ក៏មិនគប្បីត្រូវបានបង្ខូចកិត្តិយសដោយសារទង្វើខុសឆ្គងរបស់ស្ត្រីម្នាក់ឬពីរនាក់ដែរ ។តើខ្ញុំអាចសុំបានទេ ពីមន្ត្រីយោធាទាំងពីរនាក់នេះ ។ បើសុំមិនបាន ជម្រើសដែលនៅសេសសល់មានតែដេញចោលពីជួរយោធា ឱ្យធ្វើអ្នកហ្វេសប៊ុកតែម្តងទៅ កុំឱ្យនៅក្នុងកងទ័ពនាំចង្រៃទ័ពតទៅទៀត ។ជាមួយគ្នានេះ សម្តេចតេជោបានព្រមានដល់លោក ផែង វណ្ណៈ ផងដែរ ដែលមានការពាក់ព័ន្ធរឿងរ៉ាវជាមួយអាជ្ញាធរខេត្តសៀមរាបដោយសម្តេចបន្ទោសថា បែរទៅជាចេះដឹងរឿងប្លង់ដី(ផ្សារផល្លារាត្រីអង្គរ៥) ។ គេចង់ល្បីខាងហ្វេសប៊ុកឬ? សម្តេចបន្តថា ចង់ធ្វើតុលាការប៉ាវចិនឬ? ឬចង់ឱ្យនាយករដ្ឋមន្ត្រីបានដឹង ? នាយករដ្ឋមន្ត្រីហៅទូរស័ព្ទទៅ ផែង វណ្ណៈ ។ ផែង វណ្ណៈ សុំទោស ។
ដូច្នេះអ្នកដែលពឹង ផែង វណ្ណៈ លើបញ្ហាបើកផ្លូវនៅខេត្តសៀមរាប មិនត្រូវយកជាការបានតទៅទៀតទេ ។ សម្តេចបានឱ្យលោក ផែង វណ្ណៈ ដកឃ្លីបហ្នឹងចេញ ។ សម្តេចតេជោមានប្រសាសន៍ថា មនុស្សណាដែលមិនប្រព្រឹត្តខុសនោះ តែគ្រាន់តែទុកពេលវេលាឱ្យគ្នាកែប្រែទៅបានហើយ បែរជាចង់ឈ្នះចង់ចាញ់ ។ បើចង់ឈ្នះចង់ចាញ់ ឱ្យគាត់តែពីរនាក់ហ្នឹងទៅ នេះបែរជាយើងទៅបង្ហោះរឿងផ្អើលពេញពិភពលោក ។
សូមរំឭកថា រឿងរ៉ាវអាស្រូវស្នេហាខុសសីលធម៌រវាងអតីតសង្ឃស្រិល វណ្ណា និងនាង កាយវីតា បានកើតឡើងនៅក្នុងខេត្តបន្ទាយមានជ័យកាលពីសប្តាហ៍មុនតាមរយៈវីដេអូឃ្លីបបង្ហោះក្នុងហ្វេសប៊ុករឿងសង្ឃឆាន់ពោតបែបអាសអាភាស និងអង្គុយលេងល្បែង ។ លុះបែកធ្លាយរឿងនោះមក រឿងនិយាយពី«ពោត»បានក្លាយជាពាក្យមានប្រជាប្រិយភាព ។
ក្រោយពីបែកធ្លាយរឿងរ៉ាវនេះ ព្រះសង្ឃអង្គនោះត្រូវបានចាប់ផ្សឹក ហើយត្រូវនារីជាដៃគូប្តឹងទៅកាន់តុលាការថែមទៀត ។ បើទោះបីរឿងនេះបានបញ្ចប់តាមវិន័យសង្ឃយ៉ាងណាក៏ដោយ ប៉ុន្តែមកដល់ពេលនេះវានៅតែកក្រើកនៅក្នុងចំណោមមហាជនខ្មែរដដែល ជាពិសេសតាមបណ្តាញសង្គមហ្វេសប៊ុក ។
ប្រឈមនឹងបញ្ហានេះ សម្តេចតេជោនាយករដ្ឋមន្ត្រីបានអំពាវនាវឱ្យប្រជាពលរដ្ឋធ្វើចិត្តឱ្យស្ងប់ និងបញ្ចប់ការផ្សព្វផ្សាយរឿងរ៉ាវនេះតទៅទៀត ព្រោះវានឹងប៉ះពាល់ដល់ព្រះពុទ្ធសាសនា និងតម្លៃនៃស្ត្រីខ្មែរ ៕
ចែករំលែកព័តមាននេះ