រាជធានីភ្នំពេញ ៖ បន្ទាប់ពីបានទទួលជោគជ័យក្នុងការប្រមូលផ្ដុំជើងខ្លាំងក្នុងប្រភេទផ្សេងៗឱ្យឡើងប្រកួតដណ្ដើមជើងឯកកាលពីពេលកន្លងទៅ ពេលនេះ ប៉ុស្ដិ៍លេខ៥បានប្រកាសរដូវកាលថ្មីដោយបើករេញឱ្យកីឡាករក្នុងប្រភេទទម្ងន់៦០គីឡូក្រាម បានឡើងប្រកួតយកកៅអីជើងឯកម្ដងហើយ ដោយការប្រកួតរដូវកាលថ្មីនេះ បើកឆាកកាលពីថ្ងៃទី៩ មិថុនា នៅស្ថានីយទូរទស្សន៍ប៉ុស្តិ៍លេខ៥(TV5) ព្រែកកំពិស ។ នេះជាការប្រកួតដណ្ដើមតំណែងជើងឯក TV5 Kkock Out Series By K.cement រដូវកាលទី៣ បន្ទាប់ពីព្រឹត្តិការណ៍មួយនេះ ត្រូវបានធ្វើឡើង២ដងរួចម្ដងហើយដោយចម្រាញ់បានជើងខ្លាំងក្នុងប្រភេទទម្ងន់៦៥គីឡូក្រាម និង៦៣គីឡូក្រាម ។
លោក សេង កដិកា អ្នករៀបចំការប្រកួត បានអះអាងថា ក្រោយការបញ្ចប់ការប្រកួតជម្រើសជើងឯកក្នុងប្រភេទទម្ងន់ផ្សេងៗ ប៉ុស្ដិ៍លេខ៥បានសម្រេចបើកការប្រកួតក្នុងប្រភេទទម្ងន់៦០គីឡូក្រាមវិញម្ដង ។ លោកថា កីឡាករក្នុងប្រភេទទម្ងន់៦០គីឡូក្រាម មានច្រើនសម្រាប់ការប្រកួតដែលតម្រូវឱ្យមានកីឡាកររហូតដល់៣២រូបមកពីក្លិបផ្សេងគ្នា ដោយឡើងប្រកួតជម្រុះចាញ់ធ្លាក់ៗ ដែលព្រឹត្តិការណ៍នេះលោកមិនងាយនឹងរកកីឡាករមកប្រកួតនោះទេ ដោយសារតែរូបមន្តប្រកួតដែលលោកបង្កើតឡើង ត្រូវការអ្នកប្រកួតក្នុងចំនួនច្រើន។
លោកថា ប៉ុស្ដិ៍លេខ៥បើកការប្រកួតក្នុងរូបមន្តបែបនេះ ច្រើនលើកមកហើយ ហើយសម្រាប់ប្រភេទទម្ងន់៦០គីឡូក្រាមក៏ធ្លាប់ជ្រើសរើសដែរ ដោយកីឡាករស្ទើរគ្រប់ប្រភេទទម្ងន់លោកថាត្រូវរើសជាថ្មី ដោយការប្រកួតលើកនេះ គឺជម្រើសជើងឯកក្នុងប្រភេទទម្ងន់៦០គីឡូក្រាមវិញម្ដង ។ ការប្រកួតលើកនេះ ត្រូវបានប្រកាសថាមានកីឡាករចាស់ថ្មី៣២នាក់ណាត់គ្នាប្រកួតចាញ់ធ្លាក់ដើម្បីដណ្តើមពានរង្វាន់«TV5 Knock Out Series By K.cement» និងប្រាក់លានដូចគ្នានឹងការប្រកួតដែលធ្លាប់ធ្វើឡើងមុនៗនោះដែរ ។
នេះជាព្រឹត្តិការណ៍លើកទី៣ដែលបានធ្វើឡើងនៅប៉ុស្ដិ៍លេខ៥ នៅព្រែកកំពិស បន្ទាប់ពីការប្រកួតក្នុងព្រឹត្តិការណ៍នេះត្រូវបានបញ្ចប់ចំនួន២លើកយ៉ាងជោគជ័យនៅលើសង្វៀនព្រែកកំពិសកន្លងមក ។ ការប្រកួតនេះត្រូវបានប្រកាសឡើងតាមរយៈវេទិកាសន្និសីទសារព័ត៌មាន អមដោយការប្រកួតជម្រុះចាញ់ធ្លាក់ៗរបស់កីឡាករ៤រូប ដោយការប្រកួតនេះ គឺអ្នកឈ្នះបានឡើងទៅវគ្គបន្ត ហើយអ្នកចាញ់បានត្រឹមហាលអាវ ។
ព្រឹត្តិការណ៍នេះ មានការប្រកួតជម្រុះ៣ជុំ ដោយជុំទី១គឺតម្រូវឱ្យកីឡាករ៣២រូបប្រកួតគ្នាចាញ់ធ្លាក់ៗជម្រុះយក១៦នាក់ ។ ជុំទី២តម្រូវឱ្យអ្នកឈ្នះ១៦នាក់ប្រកួតគ្នាចាញ់ធ្លាក់ៗបន្តដើម្បីជម្រុះ៨នាក់ និងជុំទី៣តម្រូវឱ្យអ្នកឈ្នះប្រកួតជម្រុះបន្តយក៤នាក់ដើម្បីជម្រើសយកតំណែងម្ចាស់ពានលេខ១ ។ គួរបញ្ជាក់ថា ព្រឹត្តិការណ៍ «ជើងឯក K-Cement TV5 Knock Out Series » ផ្សាយផ្ទាល់រៀងរាល់ថ្ងៃសៅរ៍ ចាប់ពីម៉ោង៥ល្ងាចដល់ម៉ោង៧យប់ ដោយក្នុងការប្រកួតជម្រុះនោះ ក៏មានការប្រកួតអន្តរជាតិមួយគូៗផងដែរ ទើបធ្វើឱ្យព្រឹត្តិការណ៍នោះមានភាពទាក់ទាញយ៉ាងខ្លាំងពីអ្នកគាំទ្រ ។ នៅក្នុងការប្រកួតបើកឆាកនោះ ក៏មានការប្រកួតរវាងកីឡាករ៤រូបដែលជាសមាសភាពក្នុងចំណោម៣២រូប ដោយការប្រកួតនៅក្នុងពេលនោះ កីឡាករ ម៉ន ព្រហ្មម៉ាញ បានឈ្នះកីឡាករ លីន វិរៈ ដោយពិន្ទុ ដែលការប្រកួតមួយគូនេះ ទទួលបានការចាប់អារម្មណ៍យ៉ាងខ្លាំង ដោយសារតែបើកឆាកភ្លាម ក៏វាយសម្រុកដាក់គ្នាតែម្ដង ធ្វើឱ្យអ្នកគាំទ្រពេញចិត្ត ។
កីឡាករម៉ន ព្រហ្មម៉ាញ បានក្លាយជាកីឡាករដំបូងគេឡើងអង្គុយកៅអី១៦នាក់មុនគេ ក្នុងចំណោម៣២រូបដែលត្រូវគេឱ្យប្រកួតចាញ់ឈ្នះៗ ដែលអ្នកឈ្នះបានឡើងបន្ត ហើយអ្នកចាញ់គឺធ្លាក់ហាលអាវ ។ កីឡាករអ្នកឈ្នះបានអះអាងថា ទម្រាំតែបានឈ្នះហើយបានឡើងអង្គុយកៅអី១៦នាក់មុនគេ គឺលោកបានប្រឹងប្រែងហ្វឹកហាត់យ៉ាងអស់ពីសមត្ថភាព ស្របគ្នាដែលលោកក៏មានបំណងចង់បានជ័យជម្នះក្នុងថ្ងៃបើកសម្ពោធព្រឹត្តិការណ៍ ដែលមានទាំងអ្នកគាំទ្រកុះករ និងតំណាងសហព័ន្ធចូលរួមនោះផង។
លោកថា ជ័យជម្នះដែលបានធ្វើឡើងនៅក្នុងថ្ងៃនោះ មិនមែនជារឿងចៃដន្យនោះទេ គឺបានពីការប្រកួតប្ដូរ ហើយលោកក៏មិនទាន់អស់បន្ទុក ក្នុងការហ្វឹកហាត់នោះដែរ ដោយសារតែលោកចង់បន្តឡើងអង្គុយកៅអីក្នុងវគ្គ៨នាក់ និងវគ្គបន្តបន្ទាប់បន្ថែមទៀត ។ ក្នុងនោះក្រោយទទួលជ័យជម្នះ លោកក៏ត្រូវរក្សាទម្ងន់ឱ្យនៅតែ៦០គីឡូក្រាមកុំឱ្យឡើងចុះនោះផងដែរ ដើម្បីកុំឱ្យទទួលរងពិន័យពីគណៈកម្មការថា រក្សាគីឡូអត់បាន ហើយតម្រូវឱ្យធ្លាក់ដោយស្វ័យប្រវត្តិ។
លោក សេង កដិកា ថា ការប្រកួតជម្រើសជើងឯករដូវកាលថ្មីនេះ លោកសម្រេចធ្វើការប្រកួតក្នុងប្រភេទទម្ងន់៦០គីឡូក្រាម ដើម្បីឱ្យកីឡាករចាស់ថ្មីក្នុងប្រភេទទម្ងន់៦០គីឡូក្រាម បានបង្ហាញសមត្ថភាពឡើងប្រកួតគ្នាដណ្ដើមជើងឯក បន្ទាប់ពីការប្រកួតក្នុងប្រភេទទម្ងន់៦៥គីឡូក្រាម និង៦៣គីឡូក្រាម ត្រូវបានបញ្ចប់ដោយជោគជ័យ ។ លោកថា ការប្រកួតវគ្គនេះ មានកីឡាករក្នុងប្រភេទទម្ងន់៦០គីឡូក្រាមដែលរួមមានទាំងកីឡាករជើងចាស់ និងជើងថ្មីច្រើននាក់ ដែលលោកបញ្ជាក់ថា ការប្រកួតក្នុងប្រភេទទម្ងន់នេះក៏ល្អមើលមិនចាញ់ការប្រកួតមុនៗនោះដែរ ជាពិសេសក្នុងពេលដែលកីឡាករចាស់ថ្មី ដែលមានសមត្ថភាព និងល្បីឈ្មោះ នៅក្នុងប្រភេទទម្ងន់៦០គីឡូក្រាម ប៉ះគ្នាក្នុងវគ្កបន្តបន្ទាប់ ដើម្បីប្រកួតជម្រុះពី៣២នាក់យក១៦នាក់ ។ លោកថា ការប្រកួតវគ្គនេះ មានការសម្រិតសម្រាំងកីឡាករខុសប្លែកពីមុន ដោយមុនឈានដល់ការជ្រើសរើសឱ្យប្រកួត គឺសុទ្ធតែបានឆ្លងកាត់ការប្រកួតជម្រុះក្នុងក្លិបក្នុងប្រភេទទម្ងន់ដូចគ្នារួចជាស្រេច៕
ចែករំលែកព័តមាននេះ