ខេត្តបន្ទាយមានជ័យ ៖ សេចក្តីរាយការណ៍ឱ្យដឹងថា គ្រួសារមួយត្រូវបានក្រុមជួយសង្គ្រោះបន្ទាន់របស់ថៃក្នុងស្រុកគ្លែង ខេត្តរ៉ាក់យ៉ង ដឹកទៅកាន់មន្ទីរ ដើម្បីជួយសង្គ្រោះភ្លាមៗ ក្រោយពីភ្ញាក់ផ្អើលសង្ស័យថាបានពុលផ្សិតក្រោយនាំគ្នាហូបសម្លផ្សិត បន្ទាប់ពីដកបានក្នុងព្រៃ ។ នេះបើយោងតាមគេហទំព័រក្នុងស្រុករបស់ថៃមួយបានចេញផ្សាយ ។
ហេតុការណ៍នេះ បានកើតឡើងកាលពីព្រឹកថ្ងៃទី១០ មិថុនា ស្ថិតនៅខេត្តរ៉ាក់យ៉ង ប្រទេសថៃ ។ ជនរងគ្រោះសរុបមានចំនួន៦នាក់ (ឱពុក ម្តាយ និងកូនប្រុស-ស្រី៤នាក់ ) និងជាពលករខ្មែរធ្វើការផ្នែកខាង
ចៀរជ័រកៅស៊ូ ។
ប្រភពបានប្រាប់ទៀតថា មុនកើតហេតុ គ្រួសាររងគ្រោះបានដកផ្សិតពីចំការកៅស៊ូ (កន្លែងធ្វើការ) យកទៅស្លហូប ព្រោះមិនដឹងថា ជាផ្សិតពុលទេ ។ ប្រភពបន្តថា ក្រោយស្លរួច គ្រាន់តែគ្រួសារនេះហូបបានម្នាក់ត្រឹមមួយស្លាបព្រា ក៏មានអាការៈរាក ក្អួតចង្អោរ ធ្វើឱ្យផ្អើលឆោឡោ ដោយគ្រួសារនេះ បានស្រែកហៅឱ្យគេឯងឱ្យជួយ ។ ភ្លាមៗ គ្រួសាររងគ្រោះត្រូវបានអាជ្ញាធរនិងសមត្ថកិច្ចថៃ ក្នុងស្រុកកើតហេតុអន្តរាគមន៍ ហៅក្រុមជួយសង្គ្រោះបន្ទាន់ដឹកទៅមន្ទីរពេទ្យទាន់ពេលវេលា កុំអីអាចរងគ្រោះដល់ជីវិតទាំងគ្រួសារតែម្តង ។
ក្រុមគ្រូពេទ្យបានធ្វើការណែនាំដល់គ្រួសារខាងលើ ឱ្យមានការប្រុងប្រយ័ត្ន មិនត្រូវទទួលផ្សិតដែលមិនស្គាល់នោះទេ ព្រោះវាអាចឆក់យកជីវិតយើងបាន ។
ព័ត៌មានលម្អឹតនឹងមានផ្សាយជូនលើទំព័រកាសែតកោះសន្តិភាព ។
ចែករំលែកព័តមាននេះ