ចក្រភពអង់គ្លេសព្រមានពីគ្រោះថា្នក់
ទីក្រុង LA MALBAIE ៖ កាលពីថ្ងៃសុក្រកន្លងមកនេះ លោកស្រីនាយករដ្ឋមន្ត្រីចក្រភពអង់គ្លេស Theresa May បានព្រមានប្រធានាធិបតីសហរដ្ឋអាមេរិក លោក…
ទីក្រុង LA MALBAIE ៖ កាលពីថ្ងៃសុក្រកន្លងមកនេះ លោកស្រីនាយករដ្ឋមន្ត្រីចក្រភពអង់គ្លេស Theresa May បានព្រមានប្រធានាធិបតីសហរដ្ឋអាមេរិក លោក ដូណាល់ ត្រាំ និងសហភាពអឺរ៉ុប (EU) ពីគ្រោះថ្នាក់នៃសង្គ្រាមពាណិជ្ជកម្ម ព្រោះតែការដាក់ពន្ធ និងបានជំរុញឲ្យភាគីទាំងសងខាងផ្តោតសំខាន់លើផលិតកម្មដែកថែបដ៏ច្រើនលើសលប់របស់ប្រទេសចិនវិញ ។
កាលពីសប្តាហ៍មុន រដ្ឋាភិបាលរបស់លោក ដូណាល់ ត្រាំ បានដាក់ពន្ធលើដែកថែប និងអាលុយមីញ៉ូមនាំចូលពីប្រទេសកាណាដា, EU និងប្រទេសម៉ិកស៊ិក ដែលបង្កឲ្យមានការឆ្លើយតប និងភាពតានតឹងក្នុងកិច្ចប្រជុំ G7 នៅប្រទេសកាណាដា ។
មន្ត្រីជាន់ខ្ពស់របស់ចក្រភពអង់គ្លេសបាននិយាយថា ៖« រួមជាមួយអ្នករួមការងារដទៃទៀត លោកស្រី May គិតថា ការសម្រេចចិត្តរបស់សហរដ្ឋអាមេរិកលើការដាក់ពន្ធដែកថែប និងអាលុយមីញ៉ូម ដែលនាំចូលពីប្រទេសសម្ព័ន្ធមិត្តសំខាន់ៗមួយចំនួន គឺពិតជាគួរឲ្យសោកស្តាយណាស់ » ។
មន្ត្រីរូបនេះបន្តទៀតថា ប្រសិនបើពួកយើងមិនអាចស្វែងរកវិធីងាកចេញពីស្ថានការណ៍បច្ចុប្បន្នឲ្យបានឆាប់ៗទេនោះ វិធានការឆ្លើយតបពីសហភាពអឺរ៉ុបនឹងមិនអាចចៀសផុតឡើយ » ។
ទោះបីជាប្រទេសអង់គ្លេសបានបង្ហាញគោលជំហរប្រឆាំងនឹងការដាក់ពន្ធរបស់សហរដ្ឋអាមេរិកក្តី ប៉ុន្តែលោកស្រី Theresa May និយាយថា ការឆ្លើយតបរបស់ EU គឺត្រូវតែសមរម្យ និងសមស្របតាមច្បាប់ផងដែរ ។
គោលជំហរនេះបង្ហាញពីភាពចាំបាច់ក្នុងការរក្សាទំនាក់ទំនងជិតស្និទ្ធជាមួយរដ្ឋាភិបាលលោក ដូណាល់ ត្រាំ ព្រោះលោកស្រី May ចង់សម្រេចបានកិច្ចព្រមព្រៀងពាណិជ្ជកម្មទ្វេភាគី ដើម្បីកាត់បន្ថយផលប៉ះពាល់ដែលបង្កឡើងពីការចាកចេញពី EU ៕
ចែករំលែកព័តមាននេះ