ខេត្តប៉ៃលិន ៖ ស្ត្រីម្នាក់រងរបួសជាំមុខ ដោយសារត្រូវប្តីដាល់ចំមុខមួយដៃ ខណៈដឹកដៃគ្នាទៅផ្ទះមេភូមិ ដើម្បីសុំលែងលះ ព្រោះខឹងនឹងប្តីផឹកស្រាស្រវឹងអួរទីណួ រករឿងវាយដំទាត់ធាក់ប្រពន្ធកូន គ្មានថ្ងៃស្រាកស្រាន្ត ទើបនាងដាច់ចិត្តចាប់អូសដៃប្តីចេញពីផ្ទះ…
ខេត្តប៉ៃលិន ៖ ស្ត្រីម្នាក់រងរបួសជាំមុខ ដោយសារត្រូវប្តីដាល់ចំមុខមួយដៃ ខណៈដឹកដៃគ្នាទៅផ្ទះមេភូមិ ដើម្បីសុំលែងលះ ព្រោះខឹងនឹងប្តីផឹកស្រាស្រវឹងអួរទីណួ រករឿងវាយដំទាត់ធាក់ប្រពន្ធកូន គ្មានថ្ងៃស្រាកស្រាន្ត ទើបនាងដាច់ចិត្តចាប់អូសដៃប្តីចេញពីផ្ទះ តែមិនទាន់បានចេញទៅដល់ផ្ទះលោកមេភូមិផង ស្រាប់តែប្តីខឹងនឹងនាងខ្លាំង ក៏ដាល់មួយដៃចំមុខរងរបួសហើមជាំតែម្តង ។
ហេតុការណ៍ប្តីដាល់ប្រពន្ធហើមមុខនេះ បានកើតឡើងកាលពីវេលាម៉ោង៥ល្ងាចថ្ងៃទី៩ ខែមិថុនា ឆ្នាំ២០១៨ ស្ថិតនៅក្នុងភូមិស្លា ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
ប្រភពព័ត៌មានពីលោក រី ដារ៉ា អធិការរងនៃអធិការនគរបាលស្រុកសាលាក្រៅបានឱ្យដឹងថា ប្រពន្ធដែល រងគ្រោះឈ្មោះ វណ្ណា មុំ អាយុ២៥ឆ្នាំ រស់នៅភូមិកើតហេតុខាងលើ រងរបួសហើមមុខ ។ ចំណែកប្ដីឈ្មោះ ចេន វិចិត្រ អាយុ៣២ឆ្នាំ រស់នៅជាមួយគ្នា ។
លោក រី ដារ៉ា បានបន្តទៀតថា ប្តីប្រពន្ធខាងលើ រស់នៅជាមួយគ្នាមិនសូវចុះសម្រុងនោះទេ ដោយសារតែលោកប្តីកំហូចជាមនុស្សប្រមឹកស្រវឹងខួប មួយថ្ងៃៗមិនជួយធ្វើការងារប្រពន្ធកូននោះទេ ដោយគិតតែពីដើរផឹកស៊ីជាមួយមិត្តភក្តិក្នុងភូមិ លុះត្រឡប់មកផ្ទះវិញ រករឿងប្រចណ្ឌប្រពន្ធជាមួយអ្នកជិតខាង និងបានប្រើអំពើហិង្សាវាយដំប្រពន្ធរបស់ខ្លួនជាញឹកញាប់ថែមទៀតផង ។ រហូតមកដល់រសៀលថ្ងៃកើតហេតុ ប្រពន្ធទ្រាំមិនបានក៏ដឹកដៃប្តីបម្រុងទៅផ្ទះលោកមេភូមិ ក្នុងគោលបំណងសុំឱ្យលោកមេភូមិធ្វើសំបុត្រលែងលះគ្នា ។ តែមិនទាន់ទៅដល់ផ្ទះរបស់លោកមេភូមិផង ស្រាប់តែប្តីប្រមឹកដាល់១ដៃចំមុខប្រពន្ធ បណ្តាលឱ្យរងរបួសហើមជាំ ក្រោយមកប្រពន្ធបានដាក់ពាក្យបណ្តឹងទៅប៉ុស្តិ៍នគរបាលរដ្ឋបាលឃុំស្ទឹងកាច់ឱ្យធ្វើការឃាត់ខ្លួនប្តីភ្លាមៗតែម្តង ។
លោកបញ្ជាក់ថា រហូតមកដល់ពេលនេះ ខាងអធិការនគរបាលស្រុកសាលាក្រៅ កំពុងរៀបចំកសាងសំណុំរឿង ដើម្បីបញ្ជូនទៅអយ្យការអមសាលាដំបូងខេត្តប៉ៃលិនឱ្យចាត់ការតាមនីតិវិធី ៕
ចែករំលែកព័តមាននេះ