ខេត្តកំពង់ឆ្នាំង ៖ ប្រជាពលរដ្ឋចំនួន៤គ្រួសារក្នុងនោះមួយគ្រួសារ គឺជាលោកមេឃុំកំពង់ត្រឡាចបានកំពុងសាងសង់សំណង់រឹងមាំតាមច្រាំងទន្លេ នៅក្នុងភូមិកំពង់ត្រឡាច ឃុំកំពង់ត្រឡាច ស្រុកកំពង់ត្រឡាច ដែលជាការបំពានទៅនឹងច្បាប់ក៏ដូចជា សេចក្តីជូនដំណឹងរបស់អាជ្ញាធរខេត្តដែលហាមមិនឲ្យធ្វើសំណង់រឹងតាមច្រាំងទន្លេនោះទេ ។ កាលពីចុងសប្តាហ៍កន្លងទៅនេះអាជ្ញាធរខេត្ត និងស្រុកហាមឃាត់មិនឲ្យបន្តធ្វើសំណង់រឹងមាំនៅតាមច្រាំងទន្លេឡើយព្រោះ វាអាចនឹងប៉ះពាល់ច្រើនយ៉ាង ដូចជា បរិស្ថាន ទេសចរ និងដល់ការអភិវឌ្ឍធ្វើជម្រាលបេតុងតាមច្រាំងទន្លេ ក្នុងពេលខាងមុខនេះ ។
យ៉ាងនេះក្តីលោកស្រី អឿ ណាគ្រី អាយុ៥៥ឆ្នាំ ដែលជាភរិយាលោកប៉ា សារួន មេឃុំកំពង់ត្រឡាចបានមានប្រសាសន៍ក្នុងន័យសំណូមពរថា លោកស្រីមានរោងឈើនៅទីនេះ រយៈពេល២៧ឆ្នាំហើយ ។ ស្ទើររាងរាល់ឆ្នាំ គាត់បានបោះបង្គោលទប់ដីច្រាំងទន្លេដែលតែងតែបាក់ជារៀងរាល់ឆ្នាំ ។ ពេលនេះគាត់គ្រាន់តែចាក់បេតុធ្វើជាខឿន ដើម្បីទប់ច្រាំងទន្លេ រួចចាក់ដីបំពេញវិញ បន្ទាប់នឹងធ្វើរោងលក់ឈើពីលើ ដើម្បីបន្តមុខរបរតែប៉ុណ្ណោះ មិនហ៊ានធ្វើសំណង់រឹងពីលើនោះទេ ហើយបើគាត់ហ៊ានធ្វើសំណង់រឹងពីលើគាត់នឹងសុំទទួលខុសត្រូវចំពោះមុខច្បាប់ ។
លោកសន សំអាត អភិបាលរងស្រុកកំពង់ត្រឡាចបានឲ្យដឹងថា ដំបូងឡើយលោកប៉ា សារួន មេឃុំកំពង់ត្រឡាចបានសុំតែមាត់ មិនមានលិខិតស្នាមទេ ដោយសុំជួសជុលរោងលក់ឈើរបស់លោកដែលសង់អំពីឈើមានការពុកផុយ និងសុំចាក់បេតុងរៀបជញ្ជាំងឥដ្ឋ ដើម្បីទប់ដីថ្នល់ក៏ដូចជា ច្រាំងទន្លេកុំឲ្យរលុះបាក់ ហើយគាត់ និងចាក់ដីបំពេញ រួចនឹងសង់រោងអំពីឈើវិញ ដើម្បីដាក់ឈើលក់ ។
ចំណែកប្រជាពលរដ្ឋ៣គ្រួសារទៀតពួកគាត់ក៏បានជួលជាងមកចាក់សរសរបេតុងធ្វើជញ្ជាំងឥដ្ឋទប់ដី ដើម្បីសង់រោងដាក់ឈើលក់ដូចលោកមេឃុំដែរ ។
ក្រោយមកព័ត៌មាននេះ ក៏បានឮដល់លោកអភិបាលខេត្តក៏បានចាត់តាំងលោកប្រធានមន្ទីរទំនាក់ទំនងរដ្ឋសភា ព្រឹទ្ធសភា និងអធិការកិច្ចខេត្តកំពង់ឆ្នាំង ចុះមកហាមឃាត់ប្រជាពលរដ្ឋទាំង៣គ្រួសារ និងលោកមេឃុំកំពង់ត្រឡាច ដោយមិនអនុញ្ញាតឲ្យធ្វើសំណង់រឹងខាងលើនេះ នៅច្រាំងទន្លេឡើយ ៕
ចែករំលែកព័តមាននេះ