រាជធានីភ្នំពេញ ៖ លោកឃុំ ប៉ុណ្ណាដែតបានបើកចិត្តឲ្យអ្នកនាងយក់ ឋិតរដ្ឋា បន្តអាជីពសិល្បៈដោយលោកមិនបានហាមឡើយ ព្រោះជាអំណោយផលពីធម្មជាតិ និងជាការសាងកិត្តិយសក្នុងសង្គម ។ នៅមានហេតុផលធំមួយដែលលោកឃុំ ប៉ុណ្ណាដែត ជំរុញភរិយារបស់ខ្លួនបន្តអាជីពសិល្បៈខណៈមានរលកក្រោយច្រើនកំពុងតែប្រជែងគ្នា ។
លោកឃុំ ប៉ុណ្ណាដែត កាលពីពេលថ្មីៗកន្លងមកបញ្ជាក់ថា«ដើមហេតុដែលខ្ញុំបន្តឲ្យមានវត្តមានអ្នកនាងយក់ ឋិតរដ្ឋា ប្រឡូកអាជីពសិល្បៈទាំងដឹងថាភរិយាត្រូវមើលមុខរបរផ្ទាល់ខ្លួន និងជាស្ត្រីមេផ្ទះមានកូន នោះគឺមានហេតុផលមួយដែលខ្ញុំត្រូវតែបំពេញឲ្យបាន ។ ទាំងនោះជាបណ្តាំរបស់ឪពុកក្មេក និងត្រូវជាឪពុកបង្កើតភរិយាខ្ញុំដែរ ។ គាត់ផ្តាំឲ្យកូនស្រីខំសាងស្នាដៃក្នុងសិល្បៈឲ្យបានល្បីល្បាញបន្តទៀតដោយសារសិល្បៈមិនងាយស្រួលកសាងឲ្យមនុស្សជាច្រើនពេញចិត្តឡើយ ប៉ុន្តែកូនស្រីរបស់គាត់ធ្វើបាន ហើយនាំកិត្តិយសជូនគ្រួសារ ពិតជាមានមោទនភាព ។ ដូច្នេះហើយត្រូវបន្តអាជីពនេះឲ្យថ្កុំថ្កើងឡើងថែមទៀត ។ ម្ល៉ោះហើយរយៈពេលជិត១០ឆ្នាំក្រោយពេលចូលរោងការ ខ្ញុំបំពេញចិត្តតាមភរិយារហូត ។ មិនទាន់ដឹងថាឱកាសខ្ញុំផ្តល់ជូននេះនាងពេញចិត្តឬអត់ទេ ។
ភរិយាខ្ញុំស្រឡាញ់សិល្បៈណាស់ តស៊ូ ហើយមានតែសិល្បៈនេះហើយទើបមានថ្ងៃនេះ គេស្គាល់រូបខ្ញុំ និងភរិយា »។
បើទោះជាលោកឃុំ ប៉ុណ្ណាដែត បើកផ្លូវឲ្យប្រពន្ឋច្រៀងក្នុងពិភពសិល្បៈ ប៉ុន្តែតារាប្រុសរូបនេះនៅមានអ្នកគាំទ្រចង់ឲ្យលោកច្រៀងបន្តទៀតដូចភរិយាដែរព្រោះទឹកដមសំឡេងនៅល្អដដែល ។ ទោះជាយ៉ាងណាក្តីលោកឃុំ ប៉ុណ្ណាដែត នៅមិនទាន់សម្រេចចិត្តទេ ហើយបែរជាចង់ងាកទៅថតកុន ក្រោយមានវត្តមានចូលរួមសម្តែងជាថ្មីក្នុងរឿង«ចិញ្ចៀនខ្មោច»ដែលកំពុងចាក់បញ្ចាំងតាមរោងកុន ។
អ្នកនាងយក់ ឋិតរដ្ឋា ឲ្យដឹងថានាងនៅតែស្រឡាញ់អាជីពសិល្បៈដដែល បើទោះមានកូន២ក៏ដោយ ព្រោះតែចង់ធ្វើតាមបណ្តាំលោកឪពុក ។ «នាងខ្ញុំអរគុណស្វាមីដែលជានិច្ចកាលយល់ស្របតាមប្រពន្ឋ មិនដែលបដិសេធ និងសុំសរសើរចំពោះទឹកចិត្តគាត់ ហើយសន្យាថានឹងបន្តរួមសុខទុក្ខជាមួយគាត់រហូតតទៅ »៕
ចែករំលែកព័តមាននេះ