ខេត្តប៉ៃលិន ៖ ក្រោយពីទទួលពាក្យបណ្តឹងពីឪពុកម្តាយជនរងគ្រោះនគរបាលស្នងការខេត្តដឹកនាំកម្លាំងចុះទៅឃាត់ខ្លួនជនសង្ស័យម្នាក់ក្នុងចំណោមបក្ខពួកជាច្រើននាក់ ដែលសង្ស័យមានគំនុំនឹងគ្នាដោយបានយកដុំថ្មគប់ទៅលើម៉ូតូ២គ្រឿងរបស់ជនរងគ្រោះចតទុកនៅចិញ្ចើមផ្លូវ បណ្តាលឱ្យខូចខាត ខណៈពួកគេនាំគ្នាទៅអង្គុយលេងនៅក្បែរនោះ ក្រោយពីបង្កហេតុរួចក៏នាំគ្នាគេចទៅផ្ទះរៀងៗខ្លួន ។ តែរហូតដល់ព្រឹកនគរបាលឃាត់ខ្លួនបានម្នាក់ រីឯបក្ខពួកដទៃទៀតរត់គេចខ្លួនបាត់ស្រមោល ហេតុការណ៍នេះបានកើតឡើងកាលពីយប់ថ្ងៃទី៧ មិថុនា ស្ថិតនៅចំណុចភូមិកូនភ្នំ សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន។
ប្រភពព័ត៌មានបានឱ្យដឹងថា ជនសង្ស័យឈ្មោះ វុធ ដេវីត ភេទប្រុស អាយុ១៦ឆ្នាំ ជាសិស្ស រស់នៅភូមិបរឌិននៀវ សង្កាត់ប៉ៃលិន ក្រុងប៉ៃលិន និងបក្សពួកមិនស្គាល់អត្តសញ្ញាណមានគ្នាប្រហែល១៦នាក់។ ចំណែកជនរងគ្រោះ ១-ឈ្មោះ កែម ភារម្យ ភេទប្រុស អាយុ១៨ឆ្នាំ ជាសិស្ស រស់នៅភូមិបុស្អំ ឃុំស្ទឹងកាច់ ស្រុកសាលាក្រៅ គ្មានរបួស តែខូចខាតម៉ូតូ១គ្រឿងម៉ាកហុងដាឌ្រីម C125 ពណ៌ខ្មៅ ស៊េរីឆ្នាំ២០១៨ ពាក់ស្លាកលេខប៉ៃលិន 1C-5579 ខូចផ្នែកខាងមុខ ២- ឈ្មោះ ឆាង វុទ្ធី ភេទប្រុស អាយុ១៩ឆ្នាំ ជាសិស្ស រស់នៅភូមិឃុំជាមួយគ្នា គ្មានរបួស រងការខូចខាតម៉ូតូ១គ្រឿងម៉ាកហុងដាឌ្រីម C125 ពណ៌ខ្មៅ ស៊េរីឆ្នាំ២០១៨ ពាក់ស្លាកលេខប៉ៃលិន 1C-2547 ខូចផ្នែកខាងក្រោយ ។
ប្រភពបន្តថា ក្រោយពេលធ្វើសកម្មភាពយកថ្មភ្នំគប់រួច ក្រុមជនសង្ស័យបាននាំគ្នាជិះម៉ូតូរត់គេចខ្លួនបាត់អស់ ចំណែកជនរងគ្រោះបាននាំគ្នាជិះម៉ូតូទៅដាក់ពាក្យបណ្តឹងនៅការិយាល័យនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្ត ដើម្បីចាត់ការតាមនីតិវិធី ។ បច្ចុប្បន្នជនសង្ស័យខាងលើកំពុងត្រូវនគរបាលសួរនាំ រីឯក្មេងទំនើងដទៃទៀតកំពុងស្រាវជ្រាវចាប់ឃាត់ខ្លួនយកមកដោះស្រាយតាមច្បាប់ ។
បើតាមប្រជាពលរដ្ឋរិះគន់ថា នៅក្មេងៗសោះមិនខិតខំប្រឹងប្រែងរៀនសូត្រ ដើម្បីឱ្យមានចំណេះដឹងនៅក្នុងខ្លួនចៀសផុតពីភាពល្ងង់ខ្លៅ និងភាពក្រីក្រ បែរជានាំគ្នាប្រព្រឹត្តអំពើវាយកាប់ចាក់គ្នាដែលសង្គមកំពុងស្អប់ខ្ពើម ។ ជាពិសេសឪពុកម្តាយគួរតែតាមដានមើលសកម្មភាពរៀនសូត្ររបស់កូនខ្លួនឱ្យបានដិតដល់ មិនត្រូវបណ្តែតបណ្តោយបែបនេះនាំឱ្យខូចអនាគតនោះទេ ព្រោះបើខ្វះការអប់រំល្អៗពីឪពុកម្តាយ ពួកគេនឹងទៅសេពគប់មិត្តភក្តិដែលមិនល្អ បង្វក់ស្មារតីឱ្យដើរតាមពួកគេក្លាយទៅជាក្មេងគេចសាលាជាក់ជាមិនខានឡើយ៕
ចែករំលែកព័តមាននេះ