ខេត្តប៉ៃលិន ៖ គេដឹងហើយថា ម្ហូបអាហារនំចំណីគ្រប់ប្រភេទទាំងអស់ដែលអាជីវករកំពុងដាក់តាំងលក់តាមតូប និងផ្ទះជាហូរហែ គឺជារបស់សម្រាប់ទ្រទ្រង់សុខភាពរាងកាយមនុស្សក្មេង ចាស់ ប្រុស-ស្រីគ្រប់ៗរូប ។ ប៉ុន្តែគេត្រូវប្រុងប្រយ័ត្ននឹងចំណីអាហារទាំងនោះជាប់ជានិច្ចព្រោះ…
ខេត្តប៉ៃលិន ៖ គេដឹងហើយថា ម្ហូបអាហារនំចំណីគ្រប់ប្រភេទទាំងអស់ដែលអាជីវករកំពុងដាក់តាំងលក់តាមតូប និងផ្ទះជាហូរហែ គឺជារបស់សម្រាប់ទ្រទ្រង់សុខភាពរាងកាយមនុស្សក្មេង ចាស់ ប្រុស-ស្រីគ្រប់ៗរូប ។ ប៉ុន្តែគេត្រូវប្រុងប្រយ័ត្ននឹងចំណីអាហារទាំងនោះជាប់ជានិច្ចព្រោះ របស់ខ្លះមានរយៈពេលកំណត់ខ្លីត្រឹមតែ៣ ទៅ៦ខែ បើសិនជាយើងបន្តទិញយកទៅទទួលទានអាចប្រឈមនឹងប៉ះពាល់សុខភាពជាក់ជាមិនខាន ។
ដូច្នេះហើយទើបកាលពីពេលថ្មីៗនេះមន្ត្រីកាំកុងត្រូលសាខាខេត្តប៉ៃលិនដឹកនាំដោយលោកឈឹម វាសនា ប្រធានកាំកុងត្រូលសាខាខេត្ត សហការជាមួយមន្ទីរពាណិជ្ជកម្មខេត្តបានចុះត្រួតពិនិត្យ និងដកហូតទំនិញហួសកាលបរិច្ឆេទ និងខូចគុណភាពនៅតាមផ្សារនានាដូចជា ផ្សារសាមគ្គីហៅប៉ាហ៊ី ផ្សារសាលាក្រៅ និងផ្សារប៉ាងរលឹម ស្ថិតក្នុងសង្កាត់ អូរតាវ៉ៅ ក្រុងប៉ៃលិនផងដែរ ។
ប្រពភព័ត៌មានបានឱ្យដឹងថា មន្ត្រីកាំកុងត្រូលចុះត្រួតពិនិត្យ និងដកហូតទំនិញខូចគុណភាព និងហួសកាលបរិច្ឆេទ កាលពីពេលថ្មីៗបានជាច្រើនរាប់រយគីឡូក្រាម ដោយទំនិញដែលខូចគុណភាពទាំងនោះមានដូចជា ទឹកក្រូចដបជ័រ ធំ តូច មីកញ្ចប់ និងនំកញ្ចប់ជាដើម ក្រោយមកគេយកទៅរក្សានៅទីស្នាក់ការសាខាកាំកុងត្រូលក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ។
ប្រភពបន្តទៀតថា ដូច្នេះប្រជាពលរដ្ឋទាំងអស់ត្រូវតែមានការប្រុងប្រយ័ត្នខ្ពស់ ចំពោះនំ ចំណី ម្ហូបអាហារ ដោយមុននឹងទិញយកទៅទទួលទានក្នុងក្រុមគ្រួសារត្រូវពិនិត្យមើលលេខកាលបរិច្ឆេទនៅលើសំបកដប ឬសំបកកញ្ចប់ឱ្យបានច្បាស់លាស់ជាមុនសិន ដើម្បីជៀសវាងប៉ះពាល់ដល់សុខភាព និងការពារគ្រោះថ្នាក់ដល់អាយុជីវិតផងដែរព្រោះទំនិញម្ហូបអាហារទាំងអស់នោះត្រូវគេនាំចូលមកពីគ្រប់ទីកន្លែងដូចជា ប្រទេសថៃ ចិន កូរ៉េ និងប្រទេសវៀតណាមជាដើម សម្រាប់ឱ្យអាជីវករយកទៅដាក់លក់នៅតាមភូមិនានាទូទាំងខេត្តប៉ៃលិនតែម្តង ។
សូមបញ្ជាក់ផងដែរថា កាលពីថ្មីៗកន្លងទៅនេះមានប្រជាពលរដ្ឋប្រុសស្រីចំនួន៥នាក់ រស់នៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិនបានពុលខ្យងសមុទ្រដែលគេទិញពីឈ្មួញនាំយកមកពីប្រទេសថៃ បណ្តាលឱ្យក្អួតចង្អោរ និងរាគរុសជាច្រើនដង ហើយក៏ទៅសម្រាកព្យាបាលនៅមន្ទីរពេទ្យបង្អែកទាន់ពេល ។ អ្នកខ្លះសង្ស័យថា ប្រហែលជានៅក្នុងខ្យងសមុទ្រនោះត្រូវបានគេប្រើសារធាតុគីមីពុល ដើម្បីរក្សាទុកឱ្យបានយូរ លុះពេលយើងទទួលទានរួចក៏ពុលតែម្តង ៕
ចែករំលែកព័តមាននេះ