ខេត្តកំពង់ស្ពឺ ៖ ចោរមួយក្រុមមានគ្នា២នាក់ប្រដាប់ដោយកាំបិត បានសម្រុកចូលចាប់ចងចៅស្រី និងជីដូននៅលើផ្ទះប្លន់យកលុយនិងគ្រឿងអលង្ការអស់មួយចំនួន ព្រមទាំងធ្វើសកម្មភាពរំលោភចៅស្រីទៀតផង ។ ក្រោយធ្វើសកម្មភាពរួច ក្រុមចោរព្រៃផ្សៃក៏នាំគ្នាគេចខ្លួនអស់ដោយសុវត្ថិភាព ។ ចំណែកជីដូនបានរត់ទាំងដៃជាប់ចំណងទៅរកអ្នកស្រុកឱ្យជួយ ទើបមានការភ្ញាក់ផ្អើលប្តឹងឱ្យសមត្ថកិច្ចជួយអន្តរាគមន៍ តែហាក់ដូច ជាមិនមានសង្ឃឹមឡើយ ព្រោះក្រុមចោរមិនដឹងរត់ទៅដល់ណាអស់ទៅហើយ ។
អំពើប្លន់ និងរំលោភនេះ បានកើតឡើងកាលពីយប់ថ្ងៃទី៥ មិថុនា នៅឃុំតាំងសំរោង ស្រុកភ្នំស្រួច ដែលជីដូនឈ្មោះ ងិន សុន អាយុ៦៩ឆ្នាំ ឯចៅស្រីអាយុ១២ឆ្នាំ ។ នៅព្រឹកថ្ងៃទី៦ ខែមិថុនា ពេលជួបជាមួយអ្នកយកព័ត៌មាន ស្ត្រីជាជីដូនរៀបរាប់ថា មុនពេលកើតហេតុ គាត់និងចៅបានរៀបចំចូលសម្រាកនៅផ្ទះដូចសព្វ ដង ។ លុះនៅម៉ោង១១និង៣០នាទីយប់ ស្រាប់តែមានមនុស្សបិទមុខ២នាក់ មកចាប់ទាញគាត់និងចៅទម្លាក់ពីលើគ្រែ ហើយយកខ្សែចងគាត់និងចៅស្រី រួចឈ្លេចសួររកមាសនិងលុយដែលកូនគាត់ផ្ញើទុក ។
គាត់បន្តថា ពេលនោះចោរបានវាយគាត់ឱ្យប្រាប់ពីកន្លែងលាក់លុយនិងមាស ហើយដោយទ្រាំមិនបានគាត់ក៏ប្រាប់ពីកន្លែងលាក់ខ្សែ.កដែលកូនស្រីគាត់ផ្ញើ និងលុយ១លានរៀល ។ ពេលប្រមូលបានមាស និងលុយហើយ ក្រុមចោរក៏បានបន្តដោះយកក្រវិលមាស១ជីពីចៅស្រីគាត់ ព្រមទាំងចិញ្ចៀនមាស១ជីពីគាត់ ហើយប្រមូលយកខ្សែ.កប្លាទីន៥ជី ដែលលាក់ទុកក្រោមខ្នើយទៀតផង ។ លោកយាយបន្តទៀតថា ក្រោយពីប្រមូលយកលុយនិងគ្រឿងអលង្ការហើយ ក្រុមចោរបានចាប់ចៅស្រីគាត់អូសទៅក្រោយផ្ទះ ហើយធ្វើសកម្មភាពរំលោភទៀត តែគាត់មិនអាចជួយអ្វីបានក្រៅពីអាណិតចៅខ្លោចចិត្តប៉ុណ្ណោះ ព្រោះមិនអាចតតាំងជាមួយចោរទាំងនោះបានទេ ។
ចំណែកក្មេងស្រីរងគ្រោះរៀបរាប់ថា មុនកើតហេតុ នាងកំពុងដេកជាមួយជីដូន ស្រាប់តែមានមនុស្សមកចាប់អូសទម្លាក់ពីលើគ្រែ ហើយយកកាំបិតភ្ជង់មិនឱ្យស្រែក ព្រមទាំងគំរាមថា បើស្រែកពួកគេនឹងសម្លាប់ចោល ។ ពេលនោះ ពួកវាចាប់ចងនាងនិងយាយ ហើយគ្នាវាម្នាក់បានអូសនាងទៅក្រៅផ្ទះរំលោភ ។ ដោយទ្រាំនឹងការឈឺពុំបាន នាងក៏ស្រែកហៅយាយឱ្យជួយ ដែលទំនងខ្លាចបែកការណ៍ ដោយគ្នាវាហៅផងនោះទើបពួកវានាំគ្នារត់គេចបាត់អស់ទៅ ឯនាងក៏បានរួចខ្លួនមកវិញ ។
តាំងពីយប់កើតហេតុ រហូតដល់ព្រឹកថ្ងៃទី៦ មិថុនា ក្រុមគ្រួសារបានអះអាងថា នគរបាលមិនទាន់បានកំណត់មុខសញ្ញាក្រុមចោរទាំងនោះនៅឡើយទេ ។ ប្រជាពលរដ្ឋរស់នៅក្នុងមូលដ្ឋានខាងលើ បានលើកឡើងថា ក្រុមចោរទាំងនេះអាចមិនមែនជាមនុស្សក្រៅភូមិទេ ព្រោះពួកវាដឹងពីសកម្មភាពជីដូននិងចៅ ហើយដឹងថាម្តាយក្មេងស្រីផ្ញើខ្សែ.កប្លាទីននៅនឹងជីដូនទៀតផង ។
មន្ត្រីនគរបាលខេត្តមួយរូបបានបង្ហើបថា ក្រោយពេលទទួលព័ត៌មានអំពីករណីនេះភ្លាម ថ្នាក់លើបានចាត់ឲ្យកម្លាំងព្រហ្មទណ្ឌខេត្តចុះស្រាវជ្រាវជាបន្ទាន់ផងដែរ ។ បើតាមព័ត៌មានក្រៅផ្លូវការ រហូតមកដល់ពេលនេះ សមត្ថកិច្ចបានឃាត់ខ្លួនក្រុមជនសង្ស័យមួយចំនួន និងកំពុងសាកសួរតែមិនដឹងថា ជនសង្ស័យជាបក្សពួកក្រុមចោរទាំងនេះ ពិតប្រាកដឬបែបណានោះនៅឡើយទេ ៕
ចែករំលែកព័តមាននេះ