ខេត្តកំពង់ឆ្នាំង ៖ កសិកររស់នៅភូមិត្រពាំងស្បូវ ឃុំស្រែថ្មី ស្រុករលាប្អៀរ ដែលធ្លាប់ដាំដំណាំ និងបន្លែបង្ការផ្សេងៗ បានបន្ថែមមុខរបរថ្មីមួយទៀតគឺដាំទំពាំងបារាំង ដែលជាមុខរបរថ្មីបំផុត មិនធ្លាប់មានពីមុនមក ។ ដោយសារតែគាត់បានទទួលព័ត៌មានពីអត្ថប្រយោជន៍ជាច្រើននៃដើមទំពាំងបារាំងនេះ ទើបគាត់សម្រេចចិត្តដាំជាការសាកល្បងផង និងបើអាចទទួលផលច្រើនពីការដាំទំពាំងបារាំងនេះ នឹងពង្រីកបន្ថែមទៀត។
អ្នកស្រី ទេព វ៉ាន់ថុន អាយុ៦០ឆ្នាំ មានទីលំនៅភូមិឃុំខាងលើបានឲ្យដឹងថា បន្ទាប់ពីទទួលបានព័ត៌មានអំពីការដាំទំពាំងបារាំងតាមរយៈបណ្ដាញសង្គម ក៏ដូចជាតាមការណែនាំពីក្រុមគ្រួសារ អ្នកស្រីក៏បានទៅស្វែងយល់ពីការដាំទំពាំងបារាំងនេះដល់ខេត្តបាត់ដំបង ដោយបានទទួលយកចំណេះដឹងដែលបង្ហាត់បង្ហាញពីលោកគ្រូនៅទីនោះអំពីវិធីសាស្ត្រដាំ និងការថែទាំ ការដាក់ជី និងពីគុណប្រយោជយ៉ាងច្រើនពីដើមទំពាំងបារាំងនេះ ទើបគាត់សម្រេចចិត្តទិញពូជមកធ្វើការដាំដុះដោយខ្លួនឯង រួមជាមួយកូនប្រុសរបស់គាត់ ។
អ្នកស្រីបានបញ្ជាក់ថា អត្ថប្រយោជន៍នៃដើមទំពាំងបារាំងនេះគឺជាបន្លែអាចហូបស្រស់ និងក៏ជាបន្លែសម្រាប់ ឆា ស្ល និងស្ងោរផងដែរ ។ ក្រៅពីនោះទំពាំងបារាំងនៅអាចព្យាបាលជំងឺដូចជាខ្លាញ់រុំបេះដូង សម្ពាធសរសៃឈាម និងធ្វើឲ្យសាច់មនុស្សនៅតែចាំទៀតផង ។
ចំពោះរយៈពេលនៃការដាំរហូតដល់ទទួលផលគឺមានរយៈពេល៦ខែ ប៉ុន្តែរយៈពេលត្រឹម៤ខែ យើងអាចទទួលផលណ្តើរៗហើយ តែត្រឹមអាយុនេះ គេមិនទាន់ប្រមូលផលទេ ទុកឲ្យដើមធំរហូតដល់រយៈពេល៦ខែទើបដើមទំពាំងធំ និងថ្លោសៗល្អ ។ ដើមទំពាំងបារាំងមានអាយុកាលច្រើនឆាំ្នណាស់ សម្រាប់ការប្រមូលផល គឺរហូតដល់១៥ឆ្នាំឯណោះ គ្រាន់តែយើងថែទាំ និងកាត់ដើមចាស់ចេញ ទុកដើមថ្មីដុះជាបន្តបបន្ទាប់ ។
សព្វថ្ងៃមានក្រុមហ៊ុនចាំទិញយកទៅប្រទេសថៃ ក្នុង១គីឡូក្រាម៣ពាន់រៀល ប៉ុន្តែគាត់ថា មិនលក់អោយហ៊ុនទេ គាត់នឹងយកទៅលក់ក្នុងផ្សារ យ៉ាងហោចណាស់១គីឡូក្រាមបានតម្លៃ១ម៉ឺនរៀលដែរ ព្រោះតាមគាត់ដឹងពីអ្នកធ្លាប់ទិញយកទៅពិសារ នៅផ្សារទំនើបទំពាំងបារាំងដែលចងដុំត្រឹមប៉ុនកំភួនដៃអាចមានទម្ងន់៣ទៅ៤ខាំ តម្លៃ១ម៉ឺន៥ពាន់រៀល ចំណែកនៅផ្សារទំនើបខ្លះតម្លៃដល់១០ដុល្លារឯណោះ ។
ជាមួយគ្នានេះ អ្នកស្រីនៅបានអះអាងថា ការដាំទំពាំងបារាំងគឺមិនប្រើជីគីមីជាដាច់ខាត ព្រោះបើហ៊ានប្រើ នឹងខូចដើមទំពាំងបារាំងជាមិនខាន គឺប្រើបានតែជីកំប៉ុស តែមួយមុខគត់ ៕
ចែករំលែកព័តមាននេះ