ខេត្តប៉ៃលិន ៖ មានសេចក្តីរាយការណ៍ថា ប្រជាកសិករជាច្រើននាក់រស់នៅក្រុងប៉ៃលិនកំពុងតែទទួលរងការខូចខាតដំណាំពោតក្រហមរបស់ខ្លួនអស់ជាច្រើនហិកតា ខណៈភ្លៀងធ្លាក់រាល់ថ្ងៃបណ្តាលឱ្យទឹកដក់នៅតាមកន្លែងទំនាបបង្កឱ្យរលួយគល់ និងពោតដែលជិតដាក់ស្នៀតទៅហើយ ក៏ទទួលរងការខូចខាតផងដែរ ។
បើតាមប្រភពព័ត៌មានពីស្ត្រីម្នាក់ឈ្មោះទូច ពៅ អាយុ៤៩ឆ្នាំ រស់នៅភូមិក្បាលព្រលានសង្កាត់អូរតាវ៉ៅ ក្រុងប៉ៃលិន បានឱ្យដឹងថា គាត់បានដាំពោតក្រហមចំនួន១ហិកតានៅក្នុងចម្ការរបស់ខ្លួន ចម្ងាយពីផ្ទះប្រហែល៣គីឡូម៉ែត្រ ។
បន្ទាប់ពីដំណាំនេះដុះលូតលាស់យ៉ាងល្អជិតបញ្ចេញស្នៀតទៅហើយ ស្របពេលដែលមេឃភ្លៀងធ្លាក់រាល់ថ្ងៃបណ្តាលឱ្យទទួលរងខូចខាតអស់ទាំងស្រុងតែម្តង ។ គាត់បន្តទៀតថា គាត់ពិតជាមានការព្រួយបារម្ភចំពោះបញ្ហាជីវភាព ខណៈដំណាំរបស់ខ្លួនមិនបានផលសម្រាប់យកលក់ទិញម្ហូបអាហារ និងសងបំណុលគេនោះឡើយ ហើយរហូតមកដល់ពេលនេះមិនត្រឹមតែដំណាំពោតនៅក្នុងចម្ការរបស់គាត់ទទួលរងការខូចខាតប៉ុណ្ណោះទេ សូម្បីតែចម្ការផ្សេងៗជាច្រើនទៀតក៏ទទួលរងការខូចអស់ជាច្រើនផងដែរ ហើយបើសិនជាភ្លៀងនៅបន្តធ្លាក់ជាប់បែបនេះទៀតមើលទៅចម្ការដទៃទៀតនឹងងាប់ជាបណ្តើរៗផងដែរ ។
ចំណែកប្រជាពលរដ្ឋរស់នៅក្នុងភូមិសួនអំពៅ ភូមិបាហ៊ីជើង ប៉ាហ៊ីត្បូង ភូមិទឹកថ្លា សង្កាត់ប៉ៃលិន ក្រុងប៉ៃលិន ដែលបានដាំដំណាំពោតក្រហមដូចៗគ្នាត្រង់កន្លែងទំនាបបណ្តាលឱ្យត្រូវទឹករយៈពេលយូរទទួលរងការខូចខាតអស់ជាច្រើនដែរ ។
ប្រភពបន្តទៀតថា មើលទៅពួកគាត់ប្រហែលជាមិនទទួលបានផលច្រើនប៉ុន្មានទេនៅដើមរដូវឆ្នាំ២០១៨នេះ បើសិនជាភ្លៀងនៅបន្តធ្លាក់បែបនេះទៀត ។ មិនត្រឹមតែដំណាំពោតប៉ុណ្ណោះទេ សូម្បីតែដំឡូងមី ដែលស្ថិតនៅត្រង់តំបន់ទំនាបកំពុងទទួលរងការរលួយងាប់អស់ច្រើន គួរឱ្យកត់សម្គាល់ ហើយម្នាក់ៗលាន់មាត់ថា នៅឆ្នាំថ្មីនេះមានភ្លៀងធ្លាក់ច្រើនជាងឆ្នាំណាៗទាំងអស់ ដោយពួកគាត់មិនធ្លាប់ជួបប្រទះនោះឡើយ ។
ពាក់ព័ន្ធទៅនឹងបញ្ហានេះលោក សាយ សុផាត ប្រធានមន្ទីរកសិកម្មខេត្តប៉ៃលិនបានឱ្យដឹងដែរថា រហូតមកដល់ពេលនេះដំណាំពោតក្រហមនៅតាមចម្ការនីមួយៗក្នុងខេត្តប៉ៃលិនដែលស្ថិតនៅត្រង់កន្លែងដីទំនាបទទួលរងការខូចខាតអស់ជាច្រើន ។ លោកបន្តថា តែមិនទាន់ទទួលបានរបាយការណ៍ជាក់លាក់ស្តីពីការខូចខាតដំណាំរបស់ប្រជាពលរដ្ឋនៅឡើយទេ ។
ដូច្នេះនៅពេលក្រោយៗ បើសិនជាអាចសូមឱ្យប្រជាពលរដ្ឋដែលមានដីទំនាបរៀបចំធ្វើការឈូសឆាយបង្កើតជាប្រឡាយទឹកបង្ហូរចូលទៅក្នុងអូរនៅក្នុងចម្ការរបស់ខ្លួនឱ្យបានច្រើន ខណៈភ្លៀងធ្លាក់ច្រើនប៉ុណ្ណាក៏មិនព្រួយបារម្ភដក់ទឹករងការខូចខាតនោះដែរ ៕
ចែករំលែកព័តមាននេះ