រាជធានីភ្នំពេញ ៖ ក្រសួងមហាផ្ទៃ ក្រសួងព័ត៌មាន និងក្រសួងប្រៃសណីយ៍និងទូរគមនាគមន៍ បានចេញប្រកាសអន្តរក្រសួង ចុះថ្ងៃទី២៨ ខែឧសភា ឆ្នាំ២០១៨ និងទើបតែទទួលបាននៅព្រឹកថ្ងៃទី៥…
រាជធានីភ្នំពេញ ៖ ក្រសួងមហាផ្ទៃ ក្រសួងព័ត៌មាន និងក្រសួងប្រៃសណីយ៍និងទូរគមនាគមន៍ បានចេញប្រកាសអន្តរក្រសួង ចុះថ្ងៃទី២៨ ខែឧសភា ឆ្នាំ២០១៨ និងទើបតែទទួលបាននៅព្រឹកថ្ងៃទី៥ ខែមិថុុនា គឺជាប្រកាសស្តីពីការគ្រប់គ្រងគេហទំព័រនិងបណ្តាញទំនាក់ទំនងសង្គមឬហ្វេសប៊ុក ដែលដំណើរការប្រព័ន្ធអុីនធើរណេត ។ ការពង្រឹងនេះ ត្រូវបានប្រកាសផងដែរពីការតម្រូវដ៏ចាំបាច់និងសំណូមពរដោយក្រសួងព័ត៌មាន ។
ប្រកាសនេះ គឺមានគោលបំណងគ្រប់គ្រងការផ្សព្វផ្សាយរាល់ខ្លឹមសារព័ត៌មាន ឬសារជាអក្សរសំឡេង រូបភាព វីដេអូ និង/ឬទម្រង់ផ្សេងៗទៀត តាមគេហទំព័រ និងបណ្តាញទំនាក់ទំនងសង្គមដែលដំណើរការតាមប្រព័ន្ធអុីនធើរណេត (Internet)នៅក្នុងព្រះរាជាណាចក្រកម្ពុជា ស្របពេលអនុក្រឹត្យស្តីពីការរៀបចំនិងការប្រព្រឹត្តទៅរបស់ក្រសួងព័ត៌មាន និងច្បាប់ស្តីរបបសារព័ត៌មាន ។ ប្រកាស មានគោលដៅប្រឆាំងទប់ស្កាត់រាល់ការផ្សព្វផ្សាយ ឬការចែកចាយខ្លឹមសារព័ត៌មានឬសារជាអក្សរ សំឡេង រូបភាព និង/ឬទម្រង់ផ្សេងៗទៀត ដែលមានចេតនាបង្កជាចលាចលបណ្តាលឱ្យអន្តរាយដល់វិស័យការពារជាតិ សន្តិ
សុខជាតិ ទំនាក់ទំនងជាមួយប្រទេសដទៃ សេដ្ឋកិច្ចជាតិ សណ្តាប់ធ្នាប់សាធារណៈ ការរើសអើង និងវប្បធម៌ប្រពៃណីជាតិ ។
ប្រកាសនេះ មានវិសាលភាពអនុវត្តទៅលើការផ្សព្វផ្សាយតាមគេហទំព័រ និងរាល់បណ្តាញ
ទំនាក់ទំនងសង្គម ដែលដំណើរការតាមប្រព័ន្ធអុីនធើរណេតនៅក្នុងព្រះរាជាណាចក្រកម្ពុជា ។
ដើម្បីធានាការអនុវត្តប្រកាសនេះឲ្យមានប្រសិទ្ធភាពខ្ពស់ ក្រសួងព័ត៌មាន ក្រសួងមហាផ្ទៃ និងក្រសួងប្រៃសណីយ៍និងទូរគមនាគមន៍ ត្រូវចាត់តាំងអង្គភាពជំនាញជាសេនាធិការ ដើម្បីងាយស្រួលក្នុងកិច្ចសហការធ្វើការតាមដាន សិក្សាស្រាវជ្រាវ ស្វែងរក ការធ្វើអាជីវកម្ម និងការផ្សព្វផ្សាយល្មើសច្បាប់តាមគេហទំព័រ និងបណ្តាញទំនាក់ទំនងសង្គម ដើម្បីចាត់វិធានការតាមនីតិវិធីច្បាប់ ។ អង្គភាពជំនាញដែលមានកាតព្វកិច្ចអនុវត្តប្រកាសនេះ មានដូចខាងក្រោម ៖
-ក្រសួងព័ត៌មាន ប្រតិបត្តិការដោយអគ្គនាយកដ្ឋានព័ត៌មាននិងសោតទស្សន៍
-ក្រសួងមហាផ្ទៃ ប្រតិបត្តិការដោយអគ្គស្នងការដ្ឋាននគរបាលជាតិ
-ក្រសួងប្រៃសណីយ៍និងទូរគមនាគមន៍ ប្រតិបត្តិការដោយនិយ័តករទូូរគមនាគមន៍កម្ពុជា ។
ប្រកាសដដែលបន្តថា ស្ថាប័ន អង្គភាពជំនាញនីមួយៗ ត្រូវបំពេញកាតព្វកិច្ចតាមភារកិច្ចរៀងៗខ្លួន និងត្រូវសហការគ្នា និង/ឬសហការជាមួយក្រសួង ស្ថាប័នពាក់ព័ន្ធដទៃទៀត ដើម្បីចាត់វិធានការប្រឆាំង ទប់ស្កាត់ការផ្សព្វផ្សាយរាល់ខ្លឹមសារព័ត៌មាន ឬសារជាអក្សរ សំឡេង រូបភាព វីដេអូ និង/ឬទម្រង់ផ្សេងៗទៀតដែលមានចេតនាបង្កភាពចលាចល អាចបណ្តាលឱ្យអន្តរាយដល់វិស័យការពារជាតិ សន្តិសុខជាតិ ទំនាក់ទំនងជាមួយប្រទេសដទៃ សេដ្ឋកិច្ចជាតិ សណ្តាប់ធ្នាប់សាធារណៈ ការរើសអើង និងវប្បធម៌ប្រពៃណីជាតិ ។
ស្ថាប័ន អង្គភាពជំនាញនីមួយៗ ត្រូវសុំគោលការណ៍ពីថ្នាក់ដឹកនាំក្រសួង ស្ថាប័នសាមី ដើម្បីអនុវត្តសកម្មភាពការងាររបស់ខ្លួន និងរាយការណ៍ជូនថ្នាក់ដឹកនាំក្រសួង ស្ថាប័នសាមី អំពីលទ្ធផលការងារដែលបានអនុវត្តជាប្រចាំ ។ក្រសួងព័ត៌មានត្រូវធានានូវ ៖
ក-គ្រប់គ្រងព័ត៌មានដែលផ្សព្វផ្សាយតាមប្រព័ន្ធអេឡិចត្រូនិកជាអាទិ៍៖ រាល់ខ្លឹមសារព័ត៌មាន ឬសារជាអក្សរ សំឡេង រូបភាព វីដេអូ និង/ឬទម្រង់ផ្សេងៗទៀត តាមគេហទំព័រ និងបណ្តាញទំនាក់ទំនងសង្គមដែលដំណើរការតាមប្រព័ន្ធអុីនធើរណេត (Internet) នៅក្នុងព្រះរាជាណាចក្រកម្ពុជា ។
ខ-ចាត់វិធានការលើប្រព័ន្ធផ្សព្វផ្សាយតាមអេឡិចត្រូនិក ដែលមានច្បាប់អនុញ្ញាតធ្វើអាជីវកម្មពីក្រសួងព័ត៌មាន ដែលធ្វើការផ្សព្វផ្សាយល្មើសច្បាប់ ។
គ-ផ្តល់ព័ត៌មានជូនក្រសួងប្រៃសណីយ៍ និងទូរគមនាគមន៍ ចាត់វិធានការបិទគេហទំព័រ និង/
ឬPageបណ្តាញទំនាក់ទំនងសង្គម ដែលបើកអាជីវកម្មផ្សព្វផ្សាយដោយខុសច្បាប់ និង/ឬការផ្សព្វផ្សាយព័ត៌មានដោយចេតនា ដើម្បីបង្កជាចលាចលក្នុងសង្គមធ្វើឱ្យអន្តរាយដល់វិស័យការពារជាតិ សន្តិសុខជាតិ ទំនាក់ទំនងជាមួយប្រទេសដទៃ សេដ្ឋកិច្ចជាតិ សណ្តាប់ធ្នាប់សាធារណៈ ការរើសអើង និងវប្បធម៌ប្រពៃណីជាតិ ។
ឃ-សហការជាមួយក្រសួងមហាផ្ទៃ និងស្ថាប័នពាក់ព័ន្ធ ចាត់វិធានការបង្ក្រាបការធ្វើអាជីវកម្មតាមប្រព័ន្ធអុីនធើរណេតដែលល្មើសច្បាប់ ។
ង-ផ្តល់ព័ត៌មានជូនក្រសួងមហាផ្ទៃនូវអាសយដ្ឋាន គេទំព័រ និងគណនី បណ្តាញទំនាក់ទំនងសង្គមទាំងឡាយណាដែលធ្វើការផ្សព្វផ្សាយល្មើសច្បាប់ ដើម្បីចាត់វិធានការតាមនីតិវិធីច្បាប់ ។ ក្រសួងប្រៃសណីយ៍និងទូរគមនាគមន៍ត្រូវធានានូវ ៖
ក-ចាត់វិធានការតឹងរឹុងចំពោះក្រុមហ៊ុនផ្តល់សេវាអុីនធើរណេតទាំងអស់ ដែលកំពុងដំណើរ
ការធ្វើអាជីវកម្មនៅក្នុងព្រះរាជាណាចក្រកម្ពុជា គ្មានច្បាប់អនុញ្ញាតពីក្រសួងប្រៃសណីយ៍និងទូរគមនាគមន៍ ។
ខ-តម្រូវឱ្យក្រុមហ៊ុនផ្តល់សេវាអុីនធើរណេតទាំងអស់ ដែលកំពុងប្រតិបត្តិការអាជីវកម្មនៅក្នុងព្រះរាជាណាចក្រកម្ពុជា មានកម្មវិធីសុហ្វវែរ និងបំពាក់ឧបករណ៍គ្រប់គ្រងអុីនធើរណេតដើម្បីងាយស្រួលក្នុងការច្រោះ(Fitter) ឬធ្វើការរាំងខ្ទប់(Block) ចំពោះគេហទំព័រ គណនី (Account) ឬទំព័រ(Page) របស់បណ្តាញទំនាក់ទំនងសង្គមដែលធ្វើអាជីវកម្ម និង/ឬធ្វើការផ្សព្វផ្សាយល្មើសច្បាប់ ។
គ-សហការជាមួយក្រសួងពព័ត៌មាន ឬក្រសួង ស្ថាប័នពាក់ព័ន្ធ និង/ឬស្នើសុំកិច្ចសហការពីក្រសួង ស្ថាប័នអន្តរជាតិពាក់ព័ន្ធដទៃទៀត រាំងខ្ទប់(Block) ឬបិទគេហទំព័រ និង/ឬទំព័រ(Page) បណ្តាញទំនាក់ទំនងសង្គម ដែលធ្វើអាជីវកម្មខុសច្បាប់ និង/ឬធ្វើការផ្សព្វផ្សាយល្មើសច្បាប់ ដែលមានលក្ខណៈញុះញង់ បំបែក
បំបាក់សាមគ្គីភាព ការរើសអើង ចេតនាបង្កចលាចល ដែលអាចបណ្តាលឱ្យអន្តរាយដល់សន្តិសុខជាតិ ផលប្រយោជន៍សាធារណៈ និងសណ្តាប់ធ្នាប់សង្គម ។ល។
ឃ-សហការផ្តល់ព័ត៌មានជូនក្រសួង ស្ថាប័នពាក់ព័ន្ធ ដើម្បីចាត់វិធានការតាមនីតិវិធីច្បាប់ ។
ក្រសួងមហាផ្ទៃត្រូវធានានូវ ៖
ក-ធ្វើការសិក្សា ស្រាវជ្រាវ ស្វែងរកប្រភពគេហទំព័រ និងបណ្តាញទំនាក់ទំនងសង្គម ដែលធ្វើការផ្សព្វផ្សាយល្មើសច្បាប់ បង្កចលាចលក្នុងសង្គមអាចបណ្តាលឱ្យអន្តរាយដល់វិស័យការពារជាតិ សន្តិសុខជាតិ ទំនាក់ទំនងជាមួយប្រទេសដទៃ សណ្តាប់ធ្នាប់សាធារណៈ ការរើសអើង និងវប្បធម៌ប្រពៃណីជាតិ ដើម្បីចាត់វិធានការតាមនីតិវិធីច្បាប់ ។
ខ-សហការផ្តល់ព័ត៌មានជូនក្រសួង ស្ថាប័នពាក់ព័ន្ធ ដើម្បីមានវិធានការចំពោះការធ្វើអាជីវ
កម្មប្រព័ន្ធផ្សព្វផ្សាយតាមគេហទំព័រ និងបណ្តាញទំនាក់ទំនងសង្គម ដែលគ្មានច្បាប់អនុញ្ញាត ។
គ-សហការជាមួយក្រសួង ស្ថាប័នពាក់ព័ន្ធ ចាត់វិធានការបង្ក្រាបបទល្មើសការធ្វើអាជីវកម្មតាមបណ្តាញទំនាក់ទំនងសង្គម ដែលប្រតិបត្តិការតាមប្រព័ន្ធអុីនធើរណេត និង/ឬធ្វើការផ្សព្វផ្សាយព័ត៌មាន ឬសារជាអក្សរ សំឡេង រូបភាពវីដេអូ និង/ឬទម្រង់ផ្សេងៗទៀតដែលល្មើសច្បាប់នៃព្រះរាជាណាចក្រកម្ពុជា ៕
ចែករំលែកព័តមាននេះ