ខេត្តពោធិ៍សាត់ ៖ មុខសញ្ញាប្រើប្រាស់ និងជួញដូរថ្នាំញៀនចំនួន៥នាក់ រួមនឹងវត្ថុតាងមួយចំនួនទៀត ត្រូវបានកម្លាំងសមត្ថកិច្ចនគរបាលបង្ក្រាបកាលពីរសៀលថ្ងៃទី៥ ខែមិថុនា ឆ្នាំ២០១៨ កន្លងមកនេះនៅស្រុកបាកាន និងស្រុកក្រគរ។
តាមរបាយការណ៍បានឲ្យដឹងថា មុខសញ្ញាទាំង២នាក់បានឃាត់ខ្លួននៅភូមិក្ដីស្នួល ឃុំត្រពាំងជង ស្រុកបាកាន រួមមាន ម្នាក់ឈ្មោះ គង់ ភារម្យ ភេទប្រុស អាយុ១៦ឆ្នាំ និងម្នាក់ទៀតឈ្មោះ សយ ម៉ុន ភេទប្រុស អាយុ៣០ឆ្នាំ រស់នៅភូមិ-ឃុំកើតហេតុជាមួយគ្នា ។ ក្នុងការឃាត់ខ្លួនមុខសញ្ញាទាំង២នាក់ សមត្ថកិច្ចដកហូតបានម្សៅក្រាមពណ៌សថ្លាជាសារធាតុញៀនបានចំនួន២កញ្ចប់តូច ។
ដោយឡែក មុខសញ្ញាចំនួន៣នាក់ទៀតបានឃាត់ខ្លួននៅចំណុចព្រៃអ្នកតាក្របៅ ស្ថិតក្នុងភូមិទី៤ ឃុំកំពង់លួង ស្រុកក្រគរ រួមមាន ១-ឈ្មោះ ជឹម ភ័ណ្ឌ ភេទប្រុស អាយុ២៥ឆ្នាំ ២-ឈ្មោះ រស់ សុខដេត ភេទប្រុស អាយុ២៥ឆ្នាំ អ្នកទាំង២រស់នៅភូមិទី៤ ឃុំកំពង់លួង ស្រុកក្រគរ និង៣- ឈ្មោះ ទិត្យ វិទូ ភេទប្រុស អាយុ២៤ឆ្នាំ រស់នៅភូមិកំពង់លើ ឃុំក្បាលត្រាច ស្រុកក្រគរ។ ក្នុងនោះសមត្ថកិច្ចដកហូតវត្ថុតាងរួមមានម្សៅក្រាមពណ៌សថ្លាជាសារធាតុញៀនចំនួន១កញ្ចប់ធំ និង៧កញ្ចប់តូច ព្រមទាំងសម្ភារមួយចំនួនទៀត។
ជនសង្ស័យទាំង៥នាក់ រួមនឹងវត្ថុតាង ត្រូវបានសមត្ថកិច្ចបានបំពេញនីតិវិធីនៅអធិការដ្ឋាននគរបាលស្រុករៀងៗខ្លួន បញ្ជូនទៅកាន់ការិយាល័យជំនាញនៃស្នងការដ្ឋាននគរបាលខេត្តពោធិ៍សាត់ដើម្បីចាត់បន្ត៕
ចែករំលែកព័តមាននេះ