ខេត្តបន្ទាយមានជ័យ ៖ ពលករវ័យចំណាស់ម្នាក់បានស្លាប់ពេលបញ្ជូនទៅមន្ទីរពេទ្យ បន្ទាប់ពីធ្លាក់ពីរថយន្ត ខណៈជិះទៅធ្វើការសំណង់ក្នុងខេត្តឈុនបុរីប្រទេសថៃ។ សពត្រូវបានភាគីថៃបញ្ជូនឲ្យសាច់ញាតិតាម ច្រកទ្វារអន្តរជាតិប៉ោយប៉ែត នៅម៉ោង៥ និង៣០នាទីល្ងាច ថ្ងៃទី៥ មិថុនា ២០១៨។ ជនរងគ្រោះឈ្មោះ គង់ ចេង អាយុ៥១ឆ្នាំ ជាកម្មករសំណង់នៅក្នុងខេត្តកើតហេតុខាងលើ និងមានទីលំនៅភូមិមិត្តភាព សង្កាត់និងក្រុងប៉ោយប៉ែត។
សាច់ញាតិសពប្រាប់កោះសន្តិភាពថា ជនរងគ្រោះបានធ្លាក់ពីលើរថយន្តដឹកកម្មករខណៈគាត់ជិះខាងក្រោយគេ ហើយពេលរថយន្តបើកដល់ចំណុចផ្លូវកោងក៏ធ្លាក់របួសធ្ងន់កាលពីម៉ោង៨ព្រឹក ថ្ងៃទី៤ម្សិលមិញ។ ជនរងគ្រោះបានស្លាប់ពេលបញ្ជូនទៅកាន់មន្ទីរពេទ្យព្រោះពេលធ្លាក់ពីរថយន្តបោកក្បាលនឹងផ្លូវរបួសធ្ងន់។ សពត្រូវបាន រថយន្តរបស់មន្ត្រីអាវុធហត្ថក្រុងប៉ោយប៉ែតជួយដឹកបញ្ជូនទៅលំនៅដ្ឋានដើម្បីធ្វើបុណ្យតាមប្រពៃណី៕
ចែករំលែកព័តមាននេះ