ខេត្តបន្ទាយមានជ័យ ៖ ដេកលើកន្ទេលក្រោកទៅណាមិនរួច ព្រោះស្លាប់មួយចំហៀងខ្លួនក្រោយដើរដួលសង្ស័យជម្ងឺលើសឈាម១០ឆ្នាំមកហើយ បុរសពោះម៉ាយម្នាក់បានលើកដៃសំពះអំពាវនាវរកការជួយឧបត្ថម្ភពីសប្បុរសជនក្នុង និងក្រៅប្រទេសសម្រាប់ដង្ហើមចុងក្រោយ ។ បុរសពិការខាងលើរស់នៅក្នុងខ្ទមស័ង្កសីដែលអ្នកស្រុកជួយសាងសង់ឲ្យលើដីចំណីផ្លូវ ប៉ុន្តែដាច់ស្រយ៉ាលពីគេហាក់ដូចនៅកណ្តាលព្រៃសូម្បីតែផ្លូវចូលទៅទីនោះក៏ពិបាកធ្វើដំណើរដែរគឺកាត់ភក់ និងទឹកហើយគ្មានភ្លើងប្រើប្រាស់ទៀតផង ។
បុរសពិការរូបនេះឈ្មោះ ទុយ តឹម អាយុ៥៥ឆ្នាំ ប្រពន្ធស្លាប់ចោលដោយសារកើតជម្ងឺតៀចទឹកកាលពី៦ឆ្នាំមុន មានកូនប្រុស៣នាក់ កូនច្បងជាប់គុកដោយសាជាប់ចោទសេពថ្នាំញៀន កូនទី២បែកគ្រួសារ ប៉ុន្តែក្រស្ទើររកអង្កដាំបាយគ្មាន រស់នៅជាមួយសាច់ញាតិខាងប្រពន្ធ និងកូនប្រុសពៅវ័យ២០ឆ្នាំ ពុំមានការងារធ្វើរស់នៅមើលថែគាត់រាល់ថ្ងៃមិនបានរៀនសូត្ររហូតមក ។
បុរសរូបនេះរៀបរាប់ថា គាត់ធ្លាក់ខ្លួនជាជនពិការ១០ឆ្នាំមកហើយដោយសាដើរដួលសង្ស័យជម្ងឺលើសឈាម ។ គាត់បន្តថាការរស់នៅ១០ឆ្នាំកន្លងមកនេះគឺអាស្រ័យលើអ្នកស្រុកហុចបាយម្ហូបឲ្យតែប៉ុណ្ណោះលុះមួយរយៈចុងក្រោយដងផ្លូវពិបាកធ្វើដំណើរព្រោះទឹកលិចនិ ងមានភក់ផងគាត់ និងកូនត្រូវរស់ទាំងវេទនាមានពេលខ្លះដេកអត់បាយក៏មានដែរ ព្រោះអ្នកស្រុកមិនបានយកបាយម្ហូបឲ្យដូចសព្វដង ។
អ្វីដែលមើលទៅសង្វែកមែនទែននោះបុរសពិការពេលបទជើងតូចធំនៅនឹងកន្លែងតាមប្រហោងរនាបដាក់ទៅក្នុងប្រឡាយទឹកពីខាងក្រោមនោះតែម្តង ព្រោះមិនអាចក្រោកដើរទៅណាបាន ។ ងាកទៅឆ្នាំងចាន និងចង្ក្រានបាយនៅជាប់ចុងជើងបុរសពិការ ចំណែកកូនប្រុសពៅចេញទៅរកបាចត្រីដើម្បីយកមកធ្វើម្ហូប ។ បុរសខាងលើបានអំពាវនាវសប្បុរសជនក្នុងនិងក្រៅប្រទេសមេត្តជួយគ្រួសារគាត់ផងដើម្បីជាដង្ហើមចុងក្រោយព្រោះគ្មានសង្ឃឹមអ្វីឡើយ ៕
ចែករំលែកព័តមាននេះ