រាជធានីភ្នំពេញ ៖ មន្ត្រីជំនាញក្រសួងរៀបចំដែនដីនគរូបនីយកម្ម និងសំណង់បានអះអាងថា ប្រជាពលរដ្ឋកម្ពុជាមានតម្រូវការលំនៅឋានជាង១,១លានខ្នងផ្ទះថ្មីបន្ថែមទៀតនៅក្នុងឆ្នាំ២០៣០ ទើបអាចបំពេញតាមតម្រូវការជាមួយនឹងកំណើនប្រជាពលរដ្ឋ និងកើនដល់១៨លាននាក់ ដល់ឆ្នាំ២០៣០ ។
ក្នុងជំនួបសម្ភាសន៍ផ្តាច់មុខជាមួយអ្នកយកព័ត៌មានកោះសន្តិភាពលោក ឡៅ ទិព្វសីហាអនុរដ្ឋលេខាធិការទទួលបន្ទុកសំណង់ របស់ក្រសួងរៀបចំដែនដីនគរូបនីយកម្ម និងសំណង់បានឲ្យដឹងថា ប្រជាពលរដ្ឋកម្ពុជាមានតម្រូវការចាំបាច់លំនៅឋានជាង១,១លានខ្នងផ្ទះថ្មីបន្ថែមទៀតក្នុងឆ្នាំ២០៣០ ទើបអាចតម្រូវតាមសេចក្តីត្រូវការបានជាមួយកំណើនប្រជាពលរដ្ឋនឹងកើនដល់១៨លាននាក់ ។ លោកបន្តថា ដោយឡែកនៅរាជធានីភ្នំពេញមានតម្រូវការ៨០ម៉ឺនខ្នងផ្ទះបន្ថែមទៀត បើគិតជាមធ្យមមានតម្រូវការ៥ម៉ឺនខ្នងផ្ទះក្នុងមួយឆ្នាំ ដូចនេះក្នុងមួយឆ្នាំៗ គឺវិស័យឯកជនក៏ដូចជាប្រជាពលរដ្ឋទូទាំងប្រទេសបាន និងកំពង់ខិតខំធ្វើការវិនិយោគលើវិស័យលំនៅដ្ឋាននេះ ដើម្បីផ្គត់ផ្គង់លើការស្នាក់នៅ កន្លែងធ្វើការ និងការពង្រីកទីក្រុងផងដែរ ។
លោក ឡៅ ទិព្វសីហាបានឲ្យដឹងទៀតថា ចាប់ពីឆ្នាំ២០០៣ ដល់ឆ្នាំ២០១៧នេះនៅទូទាំងប្រទេសមានបុរីលំនៅឋានចំនួន១៨៨ទីតាំង ចំណែកអគារខ្ពស់ៗចាប់ពី៥ជាន់ឡើងទៅ ពីឆ្នាំ២០០៥ ដល់ឆ្នាំ២០១៧ មានចំនួន៩៩៦អគារ ទាំងអគារស្នាក់នៅរួមទាំងអគារលំនៅឋាន មានការអភិវឌ្ឍយ៉ាងខ្លាំងនេះ គឺជាការផ្លាស់ប្តូរមុខមាត់ ជាពិសេសរាជធានីភ្នំពេញឲ្យមានលក្ខណទំនើប ។ លោកបន្តថា វិស័យសំណង់នៅតែជាវិស័យមួយក្នុងការជុំរុញសេដ្ឋកិច្ចជាតិ ហើយការវិនិយោគលើវិស័យឯកជននៅកម្ពុជា គឺមានច្រើនវិស័យ ប៉ុន្តែវិស័យដែលយើងមើលឃើញ និងកត់សម្គាល់ជាងគេ គឺវិស័យកាត់ដេរ ឧស្សាហ៍កម្ម ទេសចរកសិកម្ម និងវិស័យសំណង់ និងអចលនទ្រព្យ ។
នៅកម្ពុជាមានគម្រោងសាងសង់ជាច្រើន បន្ទាប់ពីប្រទេសទទួលបាននូវស្ថេរភាពនយោបាយ សន្តិសុខសង្គម និងមានការអភិវឌ្ឍ គឺចាប់ផ្តើមខ្លាំងពីឆ្នាំ២០០៥ មានការវិនិយោគលើវិស័យសំណង់ខ្លាំងតែម្តង ហើយការវិនិយោគនេះមានការគាំទ្រ និងលើកទឹកចិត្តពីរាជរដ្ឋាភិបាល ។ លោកឡៅ ទិព្វសីហាបានឲ្យដឹងទៀតថា ភាគច្រើននៃកំណើនវិស័យសំណង់ គឺបណ្តាលមកពីមានសំណង់អគារធំៗ ពិសេសអគារពាណិជ្ជកម្ម សណ្ឋាគារ រមណីយដ្ឋាន ផ្សារទំនើបធំៗ អគារខ្ពស់ៗចាប់ពី៥ជាន់ឡើងលើ ទីក្រុងរណប បុរីលំនៅដ្ឋាន រោងចក្រផលិតគ្រឿងអេឡេចត្រូនិច រោងចក្រកាត់ដេរសម្លៀកបំពាក់ និងស្បែកជើង រោងចក្រកិនស្រូវ និងតំបន់សេដ្ឋកិច្ចពិសេស ។
ដោយសារតែវិស័យសំណង់មានពាក់ពន្ធ័ជាមួយនឹងក្រុមហ៊ុនសាងសង់ក៏ដូចជា ក្រុមហ៊ុនសិក្សាគម្រោងប្លង់ដែរ រហូតមកដល់ពេលនេះ យើងនៅមានក្រុមហ៊ុនដែលនៅមានសុពលភាពចំនួន១.០៤៨ក្រុមហ៊ុន ។ ក្រុមហ៊ុនសិក្សាគម្រោងប្លង់ គឺជាក្រុមហ៊ុនមួយដែលទទួលខុសត្រូវការងាររៀបចំប្លង់សាងសង់មានចំនួន៤២ក្រុមហ៊ុន ឯក្រុមហ៊ុនទទួលបន្ទុកលើការងារសាងសង់តែម្តង មានចំនួន១.០០៦ក្រុមហ៊ុន ។ ទន្ទឹមនេះក្រសួងក៏បានរៀបចំឲ្យមានចុះបញ្ជីឲ្យមានរូបវន្តបុគ្គលសិក្សាគម្រោងប្លង់ ដែលមានសុពលភាពចំនួន១៤០នាក់បន្ថែមទៀត ក្នុងនោះស្ថាបត្យករចំនួន៩៨នាក់ និងវិស្វករចំនួន៤២នាក់ ដែលមានសិទ្ធិស៊ីញ៉េលើប្លង់ បុគ្គលដែលមានសិទ្ធិស្នើសុំការសាងសង់ទាល់តែមានរូបវន្តបុគ្គល ឬអាជ្ញាបណ្ណទើបអាចឲ្យស៊ីញ៉េបាន ដើម្បីឲ្យមានការទទួលខុសត្រូវលើការងារសិក្សាលើគម្រោងប្លង់ពិតប្រកដ ត្រូវធានាគុណភាព សោភ័ណ្ឌភាពឲ្យអ្នកទិញមានការជឿជាក់ទៅលើគម្រោងនីមួយៗ ។
គួររំលឹកថា ក្នុងរយៈពេល៥ឆ្នាំ ឬមួយអាណត្តិទី៥ របស់រាជរដ្ឋាភិបាលកម្ពុជាក្រោមការដឹកនាំរបស់សម្តេចតេជោ ហ៊ុន សែនជានាយករដ្ឋមន្ត្រីនាពេលកន្លងមកនេះបានធ្វើឲ្យរីកចម្រើនលើគ្រប់វិស័យ ជាពិសេសវិស័យសំណង់មានការកើនឡើងចំនួន១១.៩៥៩គម្រោង ដែលមានទុនវិនិយោគសរុបប្រមាណ២០.៩៧៧ លានដុល្លារសហរដ្ឋអាមេរិកទៀតផង ៕
ចែករំលែកព័តមាននេះ