ទីក្រុងរីយ៉ាដ ៖ ភ្នាក់ងារសារព័ត៌មានក្នុងស្រុករបស់ប្រទេសកូវ៉ែត បានឲ្យដឹងកាលពីថ្ងៃអាទិត្យថា រដ្ឋមន្ត្រីប្រេងរបស់ OPEC និងប្រទេសមិនមែនសមាជិក បានសង្កត់ធ្ងន់លើកិច្ចព្រមព្រៀងកាត់បន្ថយការផ្គត់ផ្គង់សកល ដែលនឹងផុតកំណត់នៅចុងឆ្នាំ២០១៨នេះ។
អង្គការនៃប្រទេសនាំចេញប្រេង (OPEC) ប្រទេសរុស្ស៊ី និងប្រទេសផលិតប្រេងផ្សេងទៀត បានព្រមព្រៀងកាត់បន្ថយផលិតកម្មប្រេងប្រមាណ១,៨លានធុងក្នុង១ថ្ងៃ ចាប់ពីខែមករា ឆ្នាំ២០១៧ តទៅ ។ ជាលទ្ធផល ចំនួនប្រេងក្នុងស្តុកបានធ្លាក់ចុះ ខណៈតម្លៃកើនឡើង ។
រដ្ឋមន្ត្រី OPEC មកពីអារ៉ាប៊ីសាអូឌីត, អេមីរ៉ាតអារ៉ាប់រួម, កូវ៉ែត, អាល់ហ្សេរី និងប្រទេសមិនមែនសមាជិកដូចជា អូម៉ង់ បានជួបគ្នាកាលពីថ្ងៃសៅរ៍កន្លងមក នៅប្រទេសកូវ៉ែត ក្នុងកិច្ចប្រជុំក្រៅផ្លូវការរបស់គណៈកម្មាធិការថ្នាក់រដ្ឋមន្ត្រី ដែលតាមដានការអនុម័តកិច្ចព្រមព្រៀង ។
យោងតាមសេចក្តីថ្លែងការណ៍របស់គណៈកម្មាធិការនេះ រដ្ឋមន្ត្រីបានសង្កត់ធ្ងន់លើតម្រូវការរក្សាកិច្ចសហប្រតិបត្តិការ និងបន្តខិតខំប្រឹងប្រែងពីប្រទេសចូលរួម ។ ពួកគេបានស្នើឲ្យរក្សាការចាប់ដៃគូបច្ចុប្បន្ន បន្តសម្របនឹងការផ្លាស់ប្តូរទីផ្សារ ដើម្បីអត្ថប្រយោជន៍របស់អតិថិជន និងអ្នកផលិត ខណៈលើកតម្កើងការលូតលាស់របស់សេដ្ឋកិច្ចពិភពលោក ។
រដ្ឋមន្ត្រីទាំងនេះក៏បានសង្កត់ធ្ងន់លើតម្រូវការទីផ្សាររឹងមាំ ដែលជំរុញដល់ការវិនិយោគក្នុងវិស័យថាមពល ដើម្បីធានាថា ការផ្គត់ផ្គង់ប្រេងក្នុងពិភពលោកដោយមានលំនឹង អាចនឹងកើតមានឡើងក្នុងរយៈពេលសមរម្យ ស្របនឹងតម្រូវការ និងកាត់បន្ថយផលប៉ះពាល់ដែលបង្កពីការអន់ថយផ្នែកមួយចំនួនក្នុងពិភពលោក ។
កិច្ចព្រមព្រៀងនេះបានជួយឲ្យតម្លៃប្រេងកើនឡើងមកជាង៨០ដុល្លារក្នុង១ធុង និងជួយកាត់បន្ថយការផ្គត់ផ្គង់ប្រេងលើសលប់ផងដែរ ៕
ចែករំលែកព័តមាននេះ