ខេត្តកំពង់ឆ្នាំង ៖ ក្រៅពីការចិញ្ចឹមគោជាប់ចំណាត់ថ្នាក់លេខ១ពានរង្វាន់សម្តេចតេជោហ៊ុន សែនដែលទូរ ទស្សន៍អាស៊ីអាគ្នេយ៍ធ្លាប់បានផ្សាយកាលពីសប្តាហ៍មុនកសិករលោកណក់ ផល្លី អាយុ៣០ឆ្នាំ ជាកសិកររស់នៅភូមិដំណាក់ព្រីង ឃុំស្វាយជុក ស្រុកសាមគ្គីមានជ័យ ខេត្តកំពង់ឆ្នាំង បានពង្រីកវិស័យកសិកម្មរបស់ខ្លួនបន្ថែមទៀត គឺការចិញ្ចឹមមាន់ ដើម្បីបំពេញតម្រូវការទីផ្សារបន្ថែមទៀត ។
លោក ណក់ ផល្លីបានបញ្ជាក់ថា បច្ចុប្បន្នជាមធ្យមមាន់ក្នុងទ្រុងរបស់គាត់មានទំហំ១០គុណនឹង៣០ម៉ែត្រ មានជិត៣ពាន់ក្បាល ប៉ុន្តែមិនអាចបំពេញសេចក្តីត្រូវការរបស់ទីផ្សារបានទេហេតុនេះហើយគាត់បានពង្រីកទ្រង់មួយកន្លែងទៀតមានទំហំ១០គុណ និង៦០ម៉ែត្រ ប៉ុន្តែគួរសោកស្តាយកាលថ្មីៗនេះខ្យល់កន្ត្រាក់បានបំផ្លាញទ្រង់មាន់ដែលទើបសាងសង់មិនទាន់រួចរាល់នោះខ្ទេចរាបដល់ដីទៅហើយ យ៉ាងនេះក្តីលោកកំពុងឲ្យជាងកសាងថ្មីឡើងវិញ ។
លោកបានបញ្ជាក់ថា បច្ចុប្បន្នមានឈ្មួញមកកុម្ម៉ង់ទិញមាន់របស់គាត់ក្នុង១សប្តាហ៍២លើកក្នុង១លើកៗមានពី១៥០ទៅ២០០ក្បាល ។ ថ្មីៗនេះមានក្រុមហ៊ុនមួយបានមកកុម្ម៉ង់ឲ្យគាត់ផលិតលក់ឲ្យគេឲ្យបាន២០០ក្បាលក្នុង១ថ្ងៃ តែគាត់មិនអាចធ្វើទេ ប៉ុន្តែបានសន្យាថា សូមរង់ចាំប្រហែលជា ៤-៥ខែទៀត គាត់នឹងទទួលយកកុងត្រានេះពេលទ្រង់ថ្មីគាត់ធ្វើបាន ។
លោក ណក់ ផល្លីបានបញ្ជាក់ថា មាន់គាត់ចិញ្ចឹមជាមាន់ខ្មែរសុទ្ធដែលទិញពីកសិករ និងពីអង្គការមិនមានមាន់កាត់បីសាសន៍នោះទេ ហើយកូនមាន់គាត់ទិញមានអាយុ៣សប្តាហ៍ដោយក្នុង១ក្បាល៤៥០០រៀល គាត់យកមកចិញ្ចឹមរយៈពេល៣ខែ អាចចាប់លក់បាន ហើយក្នុង១ក្បាលមានទម្ងន់ ពី១,៤ ទៅ១,៨គីឡូក្រាមក្នុងតម្លៃពី១៥០០០រៀល ទៅ១៦០០០រៀលក្នុង១គីឡូក្រាម ទោះបីមានបុណ្យទានផ្សេងៗក៏តម្លៃនេះនៅថេរមិនឡើងចុះដែរ ។
ចំពោះការឲ្យចំណីគាត់មិនប្រើចំណីទិញពីទីផ្សារទេព្រោះ មានលក់មិនបានថ្លៃ សាច់មិនឆ្ងាញ់ ហើយគេមិនសូវទិញទៀត គឺគាត់កែឆ្នៃចំណីដោយខ្លួនឯងមាន ពោត កន្ទក់ សណ្តែកសៀង ម្សៅត្រី ម្សៅប៉ាស្មីក និងម្សៅកាល់ស្យូមជាដើមយកមកកិនលាយបញ្ចូលគ្នា ។ ចំពោះអតិថិជនកុម្ម៉ង់ទិញទៅប្រាប់ថា មាន់របស់គាត់មានសាច់ឆ្ងាញ់ល្អ មិនដូចមានឲ្យចំណី ឬមាន់បីសាសន៍ឡើយ ។
សូមរំឮកដែរថាលោកណក់ ផល្លី ធ្លាប់ជានិស្សិតរៀននៅសកលវិទ្យាល័យចំការដូង ផ្នែកពេទ្យសត្វ និងធ្លាប់ទទួលចំណាត់ថ្នាក់លេខ១ ក្នុងការប្រឡងពានរង្វាន់សម្តេចតេជោ ហ៊ុន សែន នៅឆ្នាំ២០១៨ពីវិធីចិញ្ចឹមគោ លើវិញ្ញាសាប្រឡងផ្នែកជំនាញបំប៉នសត្វគោពីស្គមមកធាត់ ៕
ចែករំលែកព័តមាននេះ