រាជធានីភ្នំពេញ ៖ ក្រសួងប្រៃសណីយ៍និងទូរគមនាគមន៍ បានចុះអនុស្សរណៈយោគយល់គ្នាជាមួយនឹងក្រសួងទូរគមនាគមន៍ និងសារគមនាគមន៍នៃសហព័ន្ធរុស្ស៊ី ស្តីពីកិច្ចសហប្រតិបត្តិការលើវិស័យបច្ចេកវិទ្យាគមនាគមន៍ និងព័ត៌មាន ក្នុងគោលបំណងអភិវឌ្ឍន៍ចំណេះដឹងផ្នែកបច្ចេកវិទ្យាក្នុងការឆ្ពោះទៅរកសេដ្ឋកិច្ចឌីជីថល ។ នេះបើយោងតាមសេចក្ដីប្រកាសព័ត៌មានរបស់ក្រសួងប្រៃសណីយ៍ និងទូរគមនាគមន៍ ចេញផ្សាយកាលពីថ្ងៃទី១ មិថុនា កន្លងមក ។
សេចក្ដីប្រកាសបានឲ្យដឹងថា អនុស្សរណៈនេះ ធ្វើឡើងកាលពីថ្ងៃទី២៨ ឧសភា ក្នុងអំឡុងកិច្ចប្រជុំលើកទី២ នៃក្រុមការងាររួម ស្តីពីកិច្ចសហប្រតិបត្តិការរវាងរាជរដ្ឋាភិបាលនៃព្រះរាជាណាចក្រកម្ពុជា និងគណៈកម្មការសេដ្ឋកិច្ចអាស៊ី-អឺរ៉ុប ដែលប្រព្រឹត្តទៅនៅទីក្រុងមូស្គូ សហព័ន្ធរុស្ស៊ី ដែលដឹកនាំដោយលោកជំទាវ តឹក រ៉េតកំរង រដ្ឋលេខាធិការក្រសួងពាណិជ្ជកម្ម និងជាប្រធានក្រុមការងាររួមសម្រាប់កម្ពុជានៃគណៈកម្មការសេដ្ឋកិច្ចអាស៊ី-អឺរ៉ុប ។
លោកបណ្ឌិត កាន ច័ន្ទមេត្តា រដ្ឋលេខាធិការក្រសួងប្រៃសណីយ៍ និងទូរគមនាគមន៍ បានថ្លែងថា កិច្ចសហប្រតិបត្តិការមានសារសំខាន់ណាស់ ដែលនឹងជំរុញបន្ថែមទៀតទៅលើការផ្លាស់ប្តូរបច្ចេកវិទ្យារវាងកម្ពុជា សហព័ន្ធរុស្ស៊ី និងបេឡារុស លើការអភិវឌ្ឍ High Tech Park និងការផ្លាស់ប្តូរចំណេះដឹងលើការអភិវឌ្ឍសេដ្ឋកិច្ចឌីជីថល ។
លោកបណ្ឌិតបន្ដថា ៖« កិច្ចសហប្រតិបត្តិការនេះ កម្ពុជាយើងនឹងអាចផ្លាស់ប្ដូរបទពិសោធន៍ និងឧត្តមានុវត្តន៍ក្នុងការអភិវឌ្ឍ Tech Startups និង MSMEs, ការផ្លាស់ប្តូរនិងអភិវឌ្ឍន៍កម្មវិធីកុំព្យូទ័រ (Application and Software Development), ហេដ្ឋារចនាសម្ព័ន្ធ និងសន្តិសុខបច្ចេកវិទ្យា គមនាគមន៍ និងព័ត៌មានវិទ្យា, ការបណ្តុះបណ្តាល និងការអភិវឌ្ឍសមត្ថភាព » ។
នៅក្នុងឱកាសនោះ លោកបណ្ឌិត កាន ច័ន្ទមេត្តា ក៏បានដឹកនាំប្រតិភូក្រសួងប្រៃសណីយ៍និងទូរគមនាគមន៍ ជួបពិភាក្សាដាច់ដោយឡែកជាមួយលោក Pretrov Alexander ជំនួយការសមាជិកគណៈកម្មការ(ឋានៈស្មើរដ្ឋមន្ត្រី) សម្រាប់ទីផ្សារអន្តរជាតិ គាំទ្រព័ត៌មាន និងទំនាក់ទំនងបច្ចេកវិទ្យា ដោយផ្តោតទៅលើ ៖
-ការចែករំលែកបទពិសោធន៍ និងការអភិវឌ្ឍធនធានមនុស្សសម្រាប់ Tech Startup Eco System និង ICT ។
-កិច្ចសហប្រតិបត្តិការលើផ្នែក Software ការចែករំលែកបទពិសោធន៍លើពាណិជ្ជកម្មតាមប្រព័ន្ធអេឡិចត្រូនិក ជាពិសេសពាក់ព័ន្ធនឹងហត្ថលេខាឌីជីថល ។
-ហេដ្ឋារចនាសម្ព័ន្ធឆ្អឹងខ្នង, សន្តិសុខបច្ចេកវិទ្យា គមនាគមន៍ និងព័ត៌មានវិទ្យា និងសេដ្ឋកិច្ចឌីជីថល ។
-កិច្ចសហប្រតិបត្តិការអភិវឌ្ឍប្រព័ន្ធឌីជីថលសម្រាប់MSMEs និងកិច្ចសហប្រតិបត្តិការរវាងអាជីវកម្មជាតិ និងអាជីវកម្មអន្តរជាតិ(B2B) ។
លោកបណ្ឌិតបញ្ជាក់ថា ៖« លទ្ធផលនៃកិច្ចពិភាក្សានេះ ភាគីទាំងពីរបានកំណត់ពេល៦០ថ្ងៃយ៉ាងយូរ ដើម្បីរៀបចំអនុស្សរណៈយោគយល់គ្នារវាងព្រះរាជាណាចក្រកម្ពុជាជាមួយនឹងគណៈកម្មការសេដ្ឋកិច្ចអាស៊ី-អឺរ៉ុប ស្តីពីកិច្ចសហប្រតិបត្តិការលើវិស័យទូរគមនាគមន៍ និងបច្ចេកវិទ្យាគមនាគមន៍និងព័ត៌មាន ជាពិសេសលើចំណុចសំខាន់ៗ ដែលមានក្នុងកិច្ចពិភាក្សាខាងលើនេះ » ៕
ចែករំលែកព័តមាននេះ