ខេត្តប៉ៃលិន ៖ ដោយសារតែលំបាកក្នុងការផ្គត់ផ្គង់ទឹកស្អាតតាមតម្រូវការប្រជាពលរដ្ឋ ក៏ដូចជាក្រុមហ៊ុនវិនិយោគនានាដែលកំពុងធ្វើអាជីវកម្មនៅស្រុកសាលាក្រៅ និងកាស៊ីណូ សណ្ឋាគារ និងផ្ទះសំណាក់នៅតាមព្រំដែន អាជ្ញាធរ ក៏ដូចជាមន្ទីរបរិស្ថាន បានអនុញ្ញាតឱ្យក្រុមហ៊ុនទឹកស្អាតធ្វើអាងស្តុកទឹកលើភ្នំ…
ខេត្តប៉ៃលិន ៖ ដោយសារតែលំបាកក្នុងការផ្គត់ផ្គង់ទឹកស្អាតតាមតម្រូវការប្រជាពលរដ្ឋ ក៏ដូចជាក្រុមហ៊ុនវិនិយោគនានាដែលកំពុងធ្វើអាជីវកម្មនៅស្រុកសាលាក្រៅ និងកាស៊ីណូ សណ្ឋាគារ និងផ្ទះសំណាក់នៅតាមព្រំដែន អាជ្ញាធរ ក៏ដូចជាមន្ទីរបរិស្ថាន បានអនុញ្ញាតឱ្យក្រុមហ៊ុនទឹកស្អាតធ្វើអាងស្តុកទឹកលើភ្នំ សារ៉ាវ៉ាន់ ដើម្បីងាយស្រួលចែកចាយឲ្យបានទូលំទូលាយ ។
បើតាមលោក ចាន់ ថានី ម្ចាស់ក្រុមហ៊ុនផ្គត់ផ្គង់ទឹកស្អាត បានឱ្យដឹងថា បច្ចុប្បន្ន ក្រុមហ៊ុនរបស់លោកបានកប់ទុយោក្នុងដី និងលក់ចែកចាយទឹកដល់ភូមិជាច្រើន ដូចជា ភូមិបរហ៊ុយ បរតាំងស៊ូ អូរច្រា អូរបេង បឹងព្រលឹត និងភូមិជាច្រើនទៀតក្នុងស្រុកសាលាក្រៅ រហូតដល់ផ្សារព្រំ ឃុំស្ទឹងកាច់ ស្រុកសាលាក្រៅតែម្តង ប៉ុន្ដែដោយសារនីវ៉ូប្រព័ន្ធទឹកស្អាតរបស់លោកទាបជាងភូមិមួយចំនួន ធ្វើឱ្យម៉ាស៊ីនមិនអាចរុញទឹកដល់គ្រប់ទិសទី ជាហេតុធ្វើឱ្យប្រជាពលរដ្ឋប្រើប្រាស់ទឹកមិនគ្រប់គ្រាន់ ខណៈអ្នកប្រើទឹកស្អាតកាន់តែច្រើនឡើងៗ ។
លោកបន្ដថា ៖« ដោយសារតែជួបបញ្ហាបែបនេះ ទើបយើងបានស្នើសុំអាជ្ញាធរខេត្ត និងមន្ទីរបរិស្ថាន ធ្វើការឈូសឆាយផ្នែកខាងជើងភ្នំសារ៉ាវ៉ាន់ ដើម្បីដាក់អាងធំៗស្តុកទឹកទុក ងាយស្រួលបង្ហូរទឹកចែកចាយជូនប្រជាពលរដ្ឋប្រើប្រាស់ ជាពិសេសដល់ខាងក្រុមហ៊ុនកាស៊ីណូ និងអ្នកដែលបង្កើតផ្ទះសំណាក់ ព្រមទាំងផ្ទះល្វែង ដែលនៅជាប់នឹងព្រំដែនត
ែម្តង » ។
ប្រធានមន្ទីរបរិស្ថានខេត្ត លោក គឹម សុខា បានឱ្យដឹងដែរថា ក្រុមហ៊ុនផ្គត់ផ្គង់ទឹកស្អាតនេះ បានស្នើសុំច្បាប់មកមន្ទីររួចហើយ ដើម្បីសុំឈូសឆាយភ្នំសម្រាប់ដាក់អាងស្តុកទឹក យកទៅផ្គត់ផ្គង់ដល់អ្នករស់នៅក្នុងភូមិផ្សារព្រំ ។
លោកបញ្ជាក់ថា ៖« ការឈូសឆាយនេះ មិនមានប៉ះពាល់អ្វីដល់ភ្នំនោះទេ គ្រាន់តែពង្រាបព្រៃឈើស្ថិតនៅចំហៀងខាងជើងភ្នំសារ៉ាវ៉ាន់មួយភាគឱ្យរាបស្មើ និងស្រឡះល្អ រួចធ្វើផ្លូវឡើង ដើម្បីងាយស្រួលក្នុងការដឹកសម្ភារយកទៅធ្វើអាងប៉ុណ្ណោះ ហើយខ្ញុំក៏សប្បាយរីករាយដែរ ដែលខាងក្រុមហ៊ុនធ្វើការអភិវឌ្ឍពង្រីកផ្នែកទឹកស្អាតរបស់ខ្លួន ដើម្បីឱ្យទាន់នឹងតម្រូវការចាំបាច់របស់ពលរដ្ឋរស់នៅក្នុងភូមិ ជាពិសេស បច្ចុប្បន្ននៅក្នុងភូមិផ្សារព្រំ ប្រជាពលរដ្ឋបានសាងសង់ផ្ទះជាច្រើនបន្ថែមទៀត » ។
ចំណែកប្រជាពលរដ្ឋដែលរស់នៅក្នុងភូមិខាងលើមានការសប្បាយរីករាយផងដែរ ដែលអាជ្ញាធរ ក៏ដូចជាខាងក្រុមហ៊ុនបានរៀបចំដាក់ទឹកស្អាតនៅលើភ្នំ បង្ហូរលក់ចែកចាយបានទាន់ពេលវេលា ។ ជាមួយគ្នានេះ គេសង្កេតឃើញថា ការទិញលក់ដីសាងសង់ផ្ទះបានចាប់ផ្ដើមមានសកម្មភាពកាន់តែច្រើនឡើងៗថែមទៀត ព្រោះបច្ចុប្បន្ន តំបន់នោះមានការអភិវឌ្ឍហេដ្ឋារចនាសម្ព័ន្ធគ្រប់បែបយ៉ាង ពិសេសផ្លូវ ទឹក និងភ្លើង។ ចំណែកឯដីធ្លីនៅតំបន់ក្បែរភ្នំនេះ ក៏ហាក់ដូចជាកាន់តែឡើងថ្លៃគួរឱ្យកត់សម្គាល់ផងដែរ ៕
ចែករំលែកព័តមាននេះ