ខេត្តបាត់ដំបង ៖ សេចក្តីរាយការណ៍បឋមឱ្យដឹងថា បុរសម្នាក់ត្រូវកម្លាំងផ្នែកអនុវត្តដីកានៃស្នងការខេត្ត ដែលមានការរួមសហការជាមួយមន្ត្រីនគរបានខេត្តកំពតផងនោះ ចាប់ខ្លួនតាមដីកា កាលពីវេលាម៉ោង១០ព្រឹកថ្ងៃទី០៤ មិថុនា នេះ ខណ:ជននេះរត់គេចមកសំងំលាក់ខ្លួននៅកន្លែងកសិដ្ឋានចិញ្ចិមទាមួយកន្លែង នៅក្នុងភូមិស្វាយជ្រុំ ឃុំជ្រៃ ស្រុកថ្មគោល ក្រោយពីប្រព្រឹត្តបទល្មើសកាលពី២ឆ្នាំមុន ហើយត្រូវតុលាការកាត់ទោសកំបាំងមុខឱ្យជាប់គុក៣ឆ្នាំនៅខេត្តកំពត ។
ទណ្ឌិតរូបនេះ ឈ្មោះកង បេន អាយុ៣៧ឆ្នាំ រស់នៅប្រជ្រាយ ឃុំអង្គរប្រាសាទ ស្រុកគិរីវង្ស ខេត្តតាកែវ។ លោកបានបញ្ជាក់ថា ជននេះប្រព្រឹត្តបទល្មើសលួច កាលពីអំឡុងឆ្នាំ២០១៦ នៅខេត្តកំពត ហើយរត់គេចមកលាក់ខ្លួននៅខេត្តបាត់ដំបង ។ ប៉ុន្តែក្រោយពីធ្វើការស្រាវជ្រាវរកឃើញមុខសញ្ញា ទើបលោកស្នងការខេត្តបញ្ជាឲ្យកម្លាំងរបស់លោកសហការជាមួយកម្លាំងអនុវត្តដីកាខេត្តកំពតចុះចាប់ខ្លួនតែម្ដង។
ជុំវិញបទល្មើសដែលជននេះបានប្រព្រឹត្ត បើតាមលោកឧត្តមសេនីយត្រី ជេត វណ្ណនី ស្នងការរងខេត្តបានប្រាប់ថា កាលនោះ ទណ្ឌិតឈ្មោះកង បេន នេះបានធ្វើសកម្មភាព «លួចគោអ្នកភូមិ» ហើយក្រោយប្រព្រឹត្តជននេះបានរត់គេចខ្លួនពីមូលដ្ឋានបាត់ស្រមោល ។ ប៉ុន្តែលោកស្នងការរងបានបញ្ជាក់ថា ក្រោយមកមន្ត្រីជំនាញខេត្តកំពត និងខេត្តបាត់ដំបង បានធ្វើការស្រាវជ្រាវដោយចំណាយពេលជាង២ឆ្នាំ ទើបឈានដល់កំណត់មុខសញ្ញាបានថា ជននេះបានសំងំលាក់ខ្លួនពូនអាត្មាធ្វើកសិដ្ឋានចិញ្ចិមទានៅភូមិ-ឃុំខាងលើ ទើបលោកស្នងការខេត្តបញ្ជាឲ្យកម្លាំងជំនាញចុះទៅចាប់ខ្លួនតាមដីការបស់តុលាការខេត្តកំពតតែម្ដង។
ចែករំលែកព័តមាននេះ