ទីក្រុងហាណូយ ៖ យោងតាមការិយាល័យស្ថិតិទូទៅ (GSO) បានឲ្យដឹងថា ប្រទេសវៀតណាមបន្តមានផលលើសពាណិជ្ជកម្មប្រមាណ៣,៣៩ប៊ីលានដុល្លារក្នុងរយៈពេល៥ខែដំបូងឆ្នាំ២០១៨នេះ ។
ការវិនិយោគផ្ទាល់ពីបរទេស (FDI) បាននាំមុខគេ ដោយមានផលលើសពាណិជ្ជកម្មប្រមាណ១៣,៧៨ប៊ីលានដុល្លារ ។
ចំណូលពាណិជ្ជកម្មរបស់ប្រទេសនេះបានកើនឡើង១៥,៨%បើធៀបនឹងឆ្នាំមុន មកស្មើ៩៣,០៩ប៊ីលានដុល្លារក្នុងអំឡុងពេល៥ខែដំបូងនេះ ក្នុងនោះការវិនិយោគក្នុងស្រុកស្មើ២៦,៤៣ប៊ីលានដុល្លារ កើនឡើង១៧% និងការវិនិយោគដោយបរទេសស្មើ៦៦,៦៦ប៊ីលានដុល្លារ កើនឡើង១៥% ។
ផលិតផលនាំចេញសំខាន់ៗដែលទទួលបានប្រាក់ចំណូលច្រើនរួមមាន គ្រឿងអេឡិចត្រូនិកនិងកុំព្យូទ័រ គឺនាំចេញបាន១០,៩ប៊ីលានដុល្លារ កើន១៤,២%, ទូរស័ព្ទដៃនិងគ្រឿងនាំចេញបាន៣,៣ប៊ីលានដុល្លារ កើន១៧,២%, ឈើនិងផលិតផលធ្វើពីឈើនាំចេញបាន៣,៣ប៊ីលានដុល្លារ កើន១០%, គ្រឿងសមុទ្រនាំចេញបាន៣,១ប៊ីលានដុល្លារ កើន១១,១%, បន្លែនិងផ្លែឈើនាំចេញបាន១,៧ប៊ីលានដុល្លារ កើន១៩,៦%, អង្ករនាំចេញបាន១,៦ប៊ីលានដុល្លារ កើន៥១,១% និងគ្រាប់ស្វាយចន្ទីនាំចេញបាន១,៤ប៊ីលានដុល្លារ កើន២៥,៣% ។
តាមការិយាល័យស្ថិតិទូទៅ ប្រាក់ចំណូលពីការនាំចេញផលិតផលមួយចំនួនបានធ្លាក់ចុះ រួមមាន កាហ្វេនាំចេញបាន១,៦ប៊ីលានដុល្លារ ធ្លាក់ចុះ១២%, កៅស៊ូនាំចេញបាន៦៣០លានដុល្លារ ធ្លាក់ចុះ១០,៨%, ម្រេចនាំចេញបាន៣៧៩លានដុល្លារ ធ្លាក់ចុះ៣៧,១% និងប្រេងឆៅនាំចេញបាន៩១៩លានដុល្លារ ធ្លាក់ចុះ២០,៤% ។
វៀតណាមបាននាំចេញទៅកាន់អាមេរិក ស្មើ១៧,៤ប៊ីលានដុល្លារ កើន៩% ។ សហភាពអឺរ៉ុប និងប្រទេសចិន ជាប់ចំណាត់ថ្នាក់លេខ២ និងលេខ៣រៀងគ្នា ដោយចំណូលពីការនាំចេញពីវៀតណាមស្មើ១៦,៩ប៊ីលានដុល្លារ កើន១៣,៦% និង១៣,៨ប៊ីលានដុល្លារ កើន៣០,៨% ។
តំបន់អាស៊ានបានជាប់ចំណាត់ថ្នាក់លេខ៤ ដោយវៀតណាមនាំចេញបានចំនួន៩,៨ប៊ីលានដុល្លារ ។ វៀតណាមនាំចេញបាន៧,២ប៊ីលានស្មើគ្នាទៅកាន់ប្រទេសជប៉ុន និងកូរ៉េខាងត្បូង ៕
ចែករំលែកព័តមាននេះ