ខេត្តបាត់ដំបង ៖ ប្រជាពលរដ្ឋបានចង្អុលចំៗទៅលើមន្ត្រីជំនាញនិងអាជ្ញាធរស្រុកសង្កែថា មិនបានអើពើនឹងបទល្មើសរុករានដីព្រៃលិចទឹកនៅតំបន់ហាមឃាត់ (តំបន់៣) ដែលជាជម្រកត្រីពងកូន ដែលមើលទៅហាក់ដូចជាកំពុងបើកដៃឱ្យជនទុច្ចរិតប្រើគ្រឿងចក្រឈូសឆាយរំលោភយកដីនៅតំបន់ហាមឃាត់ទាំងនោះ ធ្វើអាជីវកម្មឬលក់ដូរបន្ត ដោយគ្មានចំណាត់ការឡើយ ។
សកម្មភាពឈួសឆាយរំលោភយកដីព្រៃលិចទឹករបស់ជនទុច្ចរិតទាំងនេះ ត្រូវបានមហាជនថតសកម្មភាពយកទៅផ្សាយព្រោងព្រាតតាមបណ្ដាញសង្គមវាយប្រហារចំៗ ទៅលើភាពអសកម្មរបស់មន្ត្រីជំនាញ និងអាជ្ញាធរស្រុកសង្កែ ។ បើតាមប្រភពពីប្រជាពលរដ្ឋបានឲ្យដឹងថា ក្រុមជនទុច្ចិតបាននិងកំពុងប្រើប្រាស់គ្រឿងចក្រ (ត្រាក់ទ័រ) ឈូសឆាយព្រៃលិចទឹកនៅ «តំបន់៣» ក្នុងភូមិសាស្ត្រឃុំកំពង់ព្រះ និងតំបន់ហាមឃាត់ដទៃទៀត នៅក្នុងស្រុកសង្កែ ។
ប្រភពបានឱ្យដឹងទៀតថា សកម្មភាពជនទុច្ចរិតឈូសឆាយរំលោភយកដីព្រៃលិចទឹក ដែលជាជម្រកត្រីពងកូននេះ បានកើតឡើងច្រើនសប្ដាហ៍ហើយ ប៉ុន្តែគេមិនឃើញមានមន្ត្រីជំនាញ ឬអាជ្ញាធរដែនដីចុះទៅសួរនាំឬរារាំងនៅឡើយទេ រហូតមកដល់ពេលនេះ ។ បើយោងតាមបណ្ដាញសង្គមនានា មហាជនបានស្នើឲ្យមន្ត្រីជំនាញ និងអាជ្ញាធរស្រុកសង្កែ ឬអាជ្ញាធរខេត្តមានវិធានការទប់ស្កាត់ឬចុះបង្ក្រាបផង ។ បើមិនដូច្នេះទេព្រៃ លិចទឹកនៅតំបន់៣ ដែលជាតំបន់ហាមឃាត់នឹងត្រូវក្រុមទុច្ចរិតរុកទន្ទ្រានហែកចែកគ្នាគ្មានសល់ឡើយ ។
បើតាមប្រភពដដែលបានបញ្ជាក់ថា សកម្មភាពឈូសឆាយរំលោភយកដីព្រៃលិចទឹក ដែលជាជម្រកត្រី
ពងកូនដូចខាងលើនេះ ក៏កំពុងកើតមាននៅក្នុងភូមិសាស្ត្រស្រុកមោងប្ញស្សីយ៉ាងសកម្មផងដែរ ដោយគ្មានស្ថាប័នណាមួយ មានឆន្ទះក្នុងការចុះសួរនាំ ឬទប់ស្កាត់ឡើយ ។ ដោយសារតែមិនមានការអើពើនេះ ទើបមហាជនខ្លះ បានដាក់ការសង្ស័យថា ទំនងមានការឃុបឃិតពីមន្ត្រីជំនាញ ឬអាជ្ញាធរផង ទើបក្រុមជនទុច្ចរិតធ្វើសកម្មភាពយ៉ាងគគ្លើន ដោយគ្មានក្រែងញញើតច្បាប់បែបនេះ ។
ចែករំលែកព័តមាននេះ