ខេត្តកំពង់ឆ្នាំង ៖ អ្នកគ្រូបង្រៀនមសាលាតេយ្យម្នាក់បានសំរេចចិត្តចង.កសម្លាប់ខ្លួននៅក្នុងផ្ទះបាយ បណ្តាលមានការភ្ញាក់ផ្អើលនៅវេលាម៉ោង៦ព្រឹកថ្ងៃទី២ ខែមិថុនា ឆ្នាំ២០១៨ នៅភូមិស្រង៉ាំទេ ឃុំប្រស្នឹប ស្រុករលាប្អៀរ ខេត្តកំពង់ឆ្នាំង ។
សមត្ថកិច្ចនគរបាលនៅកន្លែងកើតហេតុបានឲ្យដឹងថា អ្នកគ្រូបង្រៀនខាងលើមានឈ្មោះ ភួន ភា អាយុ៤៧ឆ្នាំ មានប្ដីឈ្មោះ សឹង ប៉ាញ អាយុ៥៨ឆ្នាំ មានមុខរបរជាគ្រូបង្រៀនដូចគ្នា មានកូន២នាក់រស់នៅភូមិ-ឃុំកើតហេតុខាងលើ ។
ប្រភពដដែលបានឲ្យដឹងថា គ្រួសារប្ដីប្រពន្ធទាំងពីរនាក់ខាងលើរស់នៅមិនចុះសម្រុងនឹងគ្នាទេគឺបានបែកគ្នារយៈពេលជាង២ឆ្នាំមកហើយដោយប្ដីចុះពីលើផ្ទះធំទៅនៅផ្ទះតូចចម្ងាយប្រមាណ១០ម៉ែត្រពីគ្នា ចំណែកប្រពន្ធរស់នៅលើផ្ទះធំជាមួយកូនៗ ។ នៅយប់ថ្ងៃកើតហេតុ (ថ្ងៃទី១ ខែមិថុនា ឆ្នាំ២០១៨) ប្តីប្រពន្ឋបានឈ្លោះទាស់សំដីគ្នាជាខ្លាំង ហើយយប់នោះប្តីបានយកកូនមកដេកនៅផ្ទះតូចជាមួយខ្លួន ។ លុះព្រឹកឡើងស្រាប់តែឃើញស្ត្រីជាប្រពន្ធបានចង.កនៅនឹងផ្ទះបាយស្លាប់បាត់ទៅហើយ ។ បន្ទាប់មកប្តីក៏បានរាយការប្រាប់សមត្ថកិច្ចក៏បានទៅពិនិត្យកន្លែងកើតហេតុ ។
សមត្ថកិច្ចបានធ្វើកោសល្យវិច្ច័យយ៉ាងយកចិត្តទុកដាក់ព្រោះខ្លាចមានអំពើឃាតកម្មណាមួយកើតឡើង ។ ប៉ុន្តែក្រោយពីការពិនិត្យសាកសពយ៉ាងយកចិត្តទុកដាក់សមត្ថកិច្ចបានសន្និដ្ឋានបានថា ស្ត្រីជាគ្រូបង្រៀនខាងលើពិតបានចង.កស្លាប់ខ្លួនឯងពិតប្រាកដមែន ជាមួយគ្នានេះសមត្ថកិច្ចបានរកឃើញសំបុត្រមួយច្បាប់ដែលជាបណ្ដាំរបស់ស្ត្រីរងគ្រោះមានខ្លឹមសារសង្ខេបប្តឹងទៅស្នងការនគរបាលខេត្ត សូមជួយពិចារណា និងរកយុត្តិធម៍ ពីការធ្វើបាបរបស់ប្តី និងមានទាំងថតសម្លេងដាក់ក្នុងទូរស័ព្ទដៃអំពីការឈ្លោះទាស់សំដីគ្នាកាលពីយប់ថ្ងៃទី១ ខែមិថុនា ទៀតផង ។ ជាមួយគ្នានេះខ្លឹមសារសំបុត្រក៏បានផ្តាំអោយបងស្រីលក់ផ្ទះ លក់ដីភូមិ យកលុយសងគេនឹងមិនបាច់ធ្វើបុណ្យអោយខ្លួនឡើយ ។
បើតាមការបញ្ជាក់របស់ឈ្មោះ សឹង ប៉ាញ ដែលជាប្ដីរបស់ស្ត្រីខាងលើបានបញ្ជាក់ថា ប្រពន្ធគាត់បានជំពាក់គេច្រើនណាស់ ដោយសាររឿងចាញ់ល្បែង តែយ៉ាងនេះក្តីមនុស្សបានស្លាប់ទៅហើយមិនដឹងថា គាត់ពិតជាជំពាក់ព្រោះរឿងល្បែង ឬយ៉ាងណានោះទេ ៕
ចែករំលែកព័តមាននេះ