ទីក្រុងប៉ារីស ៖ កាលពីថ្ងៃទី៣០ ឧសភា អង្គការកិច្ចសហប្រតិបត្តិការ និងអភិវឌ្ឍន៍សេដ្ឋកិច្ច (OECD) បានទាមទារឲ្យបញ្ចប់ភាពតានតឹងពាណិជ្ជកម្មពិភពលោកដែលកាន់តែធ្ងន់ធ្ងរឡើង ខណៈជិតដល់ពេលសហរដ្ឋអាមេរិកដាក់ពន្ធលើការនាំចូលដែកថែប និងអាលុយមីញ៉ូម ។
កាលពីខែមីនាកន្លងមកនេះ លោកប្រធានាធិបតីអាមេរិក ដូណាល់ ត្រាំ បានប្រកាសថា នឹងដាក់ពន្ធ២៥%លើដែកថែប និង១០%លើអាលុយមីញ៉ូមនាំចូល ។
ការដាក់ពន្ធនេះនឹងចូលជាធរមាននៅថ្ងៃទី១ ខែមិថុនា បើទោះជាលោកប្រធានាធិបតីបារាំង Emmanuel Macron និងលោកស្រីអធិការបតីអាល្លឺម៉ង់ Angela Merkel បានខិតខំប្រឹងប្រែងការពារប្រព័ន្ធពាណិជ្ជកម្មពហុភាគីក្តី ។
ជាមួយគ្នានេះ សហរដ្ឋអាមេរិកបានត្រៀមខ្លួនដាក់ទណ្ឌកម្មពាណិជ្ជកម្មលើចិន ដោយចោទប្រកាន់ថា ប្រទេសនេះបានលួចយកកម្មសិទ្ធិបញ្ញារបស់ខ្លួន ។
លោក Alvaro Pereira ប្រធានសេដ្ឋវិទូស្តីទីរបស់ OECD បាននិយាយថា ៖« ជាដំបូង យើងគួរតែចៀសវាងភាពតានតឹងពាណិជ្ជកម្មកាន់តែធ្ងន់ធ្ងរឡើង ព្រោះតែសេដ្ឋកិច្ចពិភពលោកមានភាពរួម និងតភ្ជាប់ជាងមុន ។ ភាពតានតឹងនេះ គឺអាចប៉ះពាល់ដល់ការលូតលាស់សេដ្ឋកិច្ចពិភពលោកយ៉ាងខ្លាំង » ។
លើសពីនេះ OECD បានបង្ហាញការព្រួយបារម្ភពីកំណើនតម្លៃប្រេងផងដែរ ។ កំណើនតម្លៃប្រេងកើតមានឡើង ក្រោយក្រុមប្រទេស OPEC និងប្រទេសរុស្ស៊ី បានសម្រេចកិច្ចព្រមព្រៀងមួយដើម្បីកាត់បន្ថយផលិតកម្មប្រេង បន្ទាប់ពីមានចំនួនប្រេងលើសលប់លើទីផ្សារធ្វើឲ្យតម្លៃធ្លាក់ចុះ ។
OECD បាននិយាយក្នុងសេចក្តីថ្លែងការណ៍ថា ៖« តម្លៃប្រេងបានកើនឡើងយ៉ាងខ្លាំងក្នុងរយៈពេល១ឆ្នាំកន្លងមកនេះ ហើយវាអាចនឹងជំរុញដល់អតិផរណា ខណៈប៉ះពាល់ដល់ការលូតលាស់នៃប្រាក់ចំណូលតាមផ្ទះ » ។
ពួកគេបន្ថែមថា ៖« ការគំរាមកំហែងរឹតបន្តឹងពាណិជ្ជកម្មបានចាប់ផ្តើមប៉ះពាល់ដល់ជំនឿចិត្ត ហើយបើវិធានការទាំងនេះអនុម័ត វានឹងផ្តល់ផលអវិជ្ជមានដល់ការវិនិយោគ និងការងារ » ៕
ចែករំលែកព័តមាននេះ