ខេត្តកំពង់ធំ ៖ ឧប្បត្តិហេតុបុរសវ័យចំណាស់ម្នាក់ជិះម៉ូតូឡើងវ៉ារថយន្តពេទ្យមិនទាន់ផុតស្រាប់តែរថយន្តសាំងយ៉ុងមកពីមុខបុកទំហឹងបណ្តាលឱ្យបែកក្បាលស្លាប់ភ្លាមៗ បានកើតឡើងកាលពីរសៀលថ្ងៃទី៣១ ខែឧសភា ឆ្នាំ២០១៨ នៅតាមបណ្តោយផ្លូវជាតិលេខ៦ ចន្លោះគីឡូមែត២៩-៣០ ស្ថិតនៅភូមិព្រៃភ្លូ ឃុំកំពង់ថ្ម ស្រុកសន្ទុក ខេត្តកំពង់ធំ ។
សមត្ថកិច្ចនគរបាលបានឱ្យដឹងថា បើយោងតាមការឲ្យដឹងពីកន្លែងកើតហេតុនិយាយថា នៅមុនពេលកើតហេតុគេឃើញជនរងគ្រោះមានឈ្មោះ ឯក យ៉ិន ភេទប្រុស អាយុ៥៧ឆ្នាំ មានទីលំនៅភូមិក្រចាប់ សង្កាត់អាចារ្យលាក់ ក្រុងស្ទឹងសែន ខេត្តកំពង់ធំ ជិះម៉ូតូម៉ាកវីវ៉ា ពណ៌ខ្មៅ ពាក់ស្លាកលេខ កំពង់ធំ 1A-1461 ចេញពីកើតទៅលិចនៅក្នុងល្បឿនយ៉ាងលឿនឡើងវ៉ារថយន្តពេទ្យ១គ្រឿងតែវ៉ាមិនផុតហើយក៏ត្រូវរថយន្តសាំងយ៉ុងពណ៌ស ពាក់ស្លាកលេខ ភ្នំពេញ 2Y-3062 ចេញពីលិចទៅកើតក្នុងទិសដៅបញ្ច្រាសទិសគ្នាបុកចំពីមុខពេញទំហឹងអូសប្រមាណ៧០ទៅ៨០ម៉ែត្រ បណ្តាលអោយជនរងគ្រោះបែកក្បាលស្លាប់ភ្លាមៗនៅនឹងកន្លែងកើតហេតុ ម៉ូតូខូចខាតទាំងស្រុង ។
សមត្ថកិច្ចបញ្ជាក់ថា មូលហេតុករណីគ្រោះថ្នាក់ចរាចរណ៍ខាងលើនេះបង្កឡើងដោយភាគីម៉ូតូបើកជែងក្នុងស្ថានភាពគ្រោះថ្នាក់ គួបផ្សំនឹងរថយន្តបើកលឿន ។ បន្ទាប់ពីកើតហេតុអ្នកបើកបររថយន្តសាំងយ៉ុងបានចុះរត់គេចខ្លួនបាត់ ចំណែកវត្ថុតាងរថយន្ត និងម៉ូតូប៉ូលិសចរាចរណ៍ស្រុកយកទៅរក្សារទុកនៅអធិការនគរបាលស្រុក សាកសពជនរងគ្រោះសមត្ថកិច្ចបានប្រគល់ឱ្យក្រុមគ្រួសារយកទៅធ្វើបុណ្យ ៕
ចែករំលែកព័តមាននេះ