ខេត្តបន្ទាយមានជ័យ ៖ ជនសង្ស័យដែលបោកស្រី្តមេម៉ាយតាមហ្វេសប៊ុក រហូតឡើងផ្ទះសំណាក់លង់ខ្លួនអស់ទាំងប្រាក់និងខ្លួនប្រាណ រួចគេចបាត់បង្កការភ្ញាក់ផ្អើលកាលពីព្រឹកព្រលឹមថ្ងៃទី២៨ ខែឧសភា នៅក្រុងប៉ោយប៉ែតនោះ មកដល់ពេលនេះបានស្គាល់មុខមាត់ពិតហើយ ។
ទោះជាយ៉ាងណា ប្រុសព្រានរូបនេះមិនទាន់បានស្គាល់អត្តសញ្ញាណពិតប្រាកដនៅឡើយទេ ប៉ុន្តែបើយោងតាមអ្នកមេម៉ាយចាយសម្រស់តាមហ្វេសប៊ុកឈ្មោះ ឡត មុំ អាយុ៣៧ឆ្នាំ មានទីលំនៅក្នុងភូមិលាបទង ឃុំទ្រា ស្រុកស្ទោង ខេត្តកំពង់ធំ ប្រាប់ថា នាងមានទំនាក់ទំនងស្នេហ៍ជាមួយម្ចាស់ហ្វេសប៊ុកមួយជាខ្មែរតែសរសេរជាអក្សរថៃគឺឈ្មោះ វ៉ាន់ រយៈពេលជិត១ខែ ។
ក្រោយពីស្គាល់គ្នាតាមហ្វេសប៊ុក ជននេះបានលួងលោមនាងសុំស្នេហ៍ ហើយបបួលនាងធ្វើលិខិតឆ្លងដែនទៅធ្វើការនៅប្រទេសថៃ ដោយគេឱ្យនាងរកប្រាក់ត្រឹម១ម៉ឺនបាត(ប្រាក់ថៃ) ខ្វះប៉ុន្មានគេនឹងជួយ ។
ក្រោយពីមកដល់ក្រុងប៉ោយប៉ែត ប្រុសព្រាននេះបាននាំឡើងផ្ទះសំណាក់ ហើយព្យាយាមបោក
យកប្រាក់ពីនាងអស់សរុប៤លានរៀល រួចគេចខ្លួនទៅបាត់នៅព្រឹក២៨ ខែឧសភា ។ ពេលបោកយកខ្លួនប្រាណនិងប្រាក់របស់នាងអស់ហើយ ដំបូងទាក់ទងតាមទូរស័ព្ទចូលគឺគេឱ្យនាងរង់ចាំនៅបរិវេណវត្តបាលិលេយ្យ តែតាមពិតគឺជននោះគេចបាត់ហើយ ថែមទាំងបិទទូរស័ព្ទនិងបិទហ្វេសប៊ុកទៀត ។
នៅថ្ងៃកើតហេតុ គេឃើញនគរបាលប៉ុស្តិ៍សង្កាត់ប៉ោយប៉ែត ដឹកស្ត្រីរងគ្រោះទៅផ្ទះសំណាក់ស្ទឹងមាស ជាប់ផ្លូវជាតិលេខ៥ ក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ដើម្បីឆែកមើលកាមេរ៉ាសុវត្ថិភាពរកមុខជនសង្ស័យ ។ ប៉ុន្តែទោះជាបែបនេះក្តី ក៏ជនរងគ្រោះនៅតែរងគ្រោះដដែល ព្រោះកាមេរ៉ាសុវត្ថិភាពផ្ទះសំណាក់នោះមើលមិនច្បាស់ ។ យ៉ាងណាក៏ដោយបើទោះជាជនសង្ស័យបានរៀបគម្រោងជាមុនដោយយកទូរស័ព្ទជនរងគ្រោះលុបរូបផ្សេងៗដែលពាក់ព័ន្ធនឹងខ្លួនក្តី ក៏រូបភាព២សន្លឹករបស់ប្រុសព្រានត្រូវបានស្ត្រីរងគ្រោះរកឃើញ ដោយសារកាលពីថ្ងៃមុននាងបានបញ្ជូនទៅឱ្យក្មួយស្រីតាមឆាតហ្វេសប៊ុក ។ នាងប្រាប់តាមទូរស័ព្ទថា នាងបានទៅដាក់ពាក្យបណ្តឹងឱ្យសមត្ថកិច្ចជួយស្រាវជ្រាវរកជនកំហូចរូបនោះរួចហើយ កាលពីថ្ងៃ២៩ ខែឧសភា នៅប៉ុស្តិ៍នគរបាលសង្កាត់ប៉ោយប៉ែត ។
នាយប៉ុស្តិ៍នគរបាលសង្កាត់ប៉ោយប៉ែត លោក អុឹម សុភារៈ ប្រាប់តាមទូរស័ព្ទថា ស្ត្រីរងគ្រោះបានមកដាក់ពាក្យបណ្តឹងទាមទាររកយុត្តិធម៌នៅប៉ុស្តិ៍របស់លោកពិតប្រាកដមែន កាលពីព្រឹកថ្ងៃ២៩ ខែឧសភា ហើយពេលនេះសមត្ថកិច្ចកំពុងតាមស្រាវជ្រាវរកជនកំហូចនោះ ៕
ចែករំលែកព័តមាននេះ