ខេត្តស្វាយរៀង ៖ នារសៀលថ្ងៃទី៣០ ខែឧសភា ឆ្នាំ២០១៨ កន្លកមកនេះនៅសាលប្រជុំសាលាខេត្តមានរៀបចំកិច្ចប្រជុំស្ដីពីកិច្ចការពារសន្តិសុខ សណ្ដាប់ធ្នាប់សាធារណៈ និងកិច្ចការពារការបោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨ ក្រោមអធិបតីភាពលោក ម៉ែន វិបុល អភិបាលនៃគណៈអភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តស្វាយរៀង ។
កិច្ចប្រជុំនេះមានការអញ្ជើញចូលរួមពីលោកអភិបាលរងខេត្ត លោក លោកស្រីនាយក នាយករងរដ្ឋបាលសាលាខេត្ត លោកមេបញ្ជាការ មេបញ្ជាការរង អនុប្រធានសេនាធិការ នាយរងសេនាធិការ និងលោក លោកស្រីនាយការិយាល័យ នៃកងកម្លាំងប្រដាប់អាវុធទាំងបី លោក លោកស្រីប្រធានមន្ទីរ-អង្គភាពនានាក្នុងខេត្ត លោកអភិបាល អធិការនគបាល មេបញ្ជាការផ្នែកសឹករង និងមេបញ្ជាការមូលដ្ឋានកងរាជអាវុធហត្ថក្រុង ស្រុកទាំង៨ ព្រមទាំងលោកនាយកទីចាត់ការចំណុះសាលាខេត្ត សរុបប្រមាណ១៥០នាក់ ។
មានប្រសាសន៍ក្នុងឱកាសនោះលោកអភិបាលខេត្តបានថ្លែងនូវការអរគុណ និងការកោតសរសើរចំពោះកងកម្លាំងប្រដាប់អាវុធ អាជ្ញាធរក្រុង ស្រុក និងគ្រប់អង្គភាពពាក់ព័ន្ធទាំងអស់ ដែលនាពេលកន្លងមកបានចូលរួមជាមួយរដ្ឋបាលខេត្ត ក្នុងការថែរក្សាសន្តិសុខ សុវត្ថិភាពបានយ៉ាងល្អប្រសើរក្នុងកម្មវិធីធំៗនានាដែលប្រារព្ធធ្វើនៅខេត្តស្វាយរៀង ដោយទទួលបាននូវការកោតសរសើរពីក្រុមការងារ និងថ្នាក់ដឹកនាំ ។
ជាមួយនេះលោកក៏បានលើកឡើងពីបរិយាកាស និងស្ថានភាពនយោបាយល្អប្រសើរនៅក្នុងប្រទេសកម្ពុជានាពេលបច្ចុប្បន្ន ព្រមទាំងបានដាក់ចេញនូវវិធានការចាំបាច់នានាដល់គ្រប់អង្គភាពពាក់ព័ន្ធ គណៈបញ្ជាការឯកភាពរដ្ឋបាល និងកងកម្លាំងគ្រប់ប្រភេទ ត្រូវរួមសហការគ្នាការពារសន្តិសុខ សុវត្ថិភាព និងសណ្ដាប់ធ្នាប់សម្រាប់ដំណើរការរៀបចំការបោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨ ដោយប្រើប្រាស់កម្លាំងដើម្បីការពារដំណើរការនេះឲ្យបានល្អប្រសើរ ប្រព្រឹត្តទៅដោយរលូន ទាំងនៅក្នុងពេលឃោសនា ពេលបោះឆ្នោត ពេលរាប់សន្លឹកឆ្នោត និងក្រោយពេលបោះឆ្នោត ព្រមទាំងត្រូវមានវិធានការបង្ការ ទប់ស្កាត់ និងប្រយុទ្ធប្រឆាំងនូវរាល់បទល្មើសគ្រប់ប្រភេទ ក៏ដូចឧបាយកល និងសកម្មភាពរារាំង ដែលប៉ុនប៉ងបំផ្លិចបំផ្លាញ ឬធ្វើឲ្យរាំងស្ទះដល់ដំណើរការរៀបចំការបោះឆ្នោត ៕
ចែករំលែកព័តមាននេះ