ខេត្តកំពង់ចាម ៖ អាជ្ញាធរខេត្តកំពង់ចាមបានអះអាងថា បច្ចុប្បន្ននៅទូទាំងខេត្តកំពង់ចាមមានក្រុមគ្រូពេទ្យដើរចាក់ថ្នាំ គ្មានច្បាប់ ដោយគ្រាន់តែរៀនចេះតៗគ្នា មានជាង៥០០នាក់ ដោយមិនមានការទទួលខុសត្រូវ និងមិនមានវិជ្ជាជីវៈត្រឹមត្រូវនោះទេ ដែលមន្ទីរសុខាភិបាលត្រូវតែ ណែនាំនៅតាមគ្លីនិកឯកជន ឬទីតាំងផ្សេងៗ ទៀតឲ្យបញ្ឈប់ជាបន្ទាន់នូវការបង្រៀន ឬបណ្តុះបណ្តាលបន្តគ្នាបែបនេះតទៅទៀត ។
ក្នុងពិធីជួបសំណេះសំណាលជាមួយមន្ត្រីនៃមន្ទីរសុខាភិបាលខេត្តកំពង់ចាម កាលពីថ្ងៃទី ៣០ ខែឧសភា ឆ្នាំ២០១៨នេះ លោក គួច ចំរើន អភិបាលខេត្តកំពង់ចាមបានលើកឡើងថា បញ្ហាឱថសក្លែងកា្លយត្រូវបង្កើនការទប់ស្កាត់ឱ្យមានប្រសិទ្ធភាព ពិសេស គឺក្រុមពេទ្យដែល បានដើរចាក់ថ្នាំគ្មានច្បាប់ ដោយមានរហូតដល់ជាង៥០០នាក់ ត្រូវតែមានវិធានការទប់ស្កាត់ ហើយបើគ្លីនិកឯកជនណា បើកបង្រៀនផ្នែកពេទ្យត្រូវតែបញ្ឈប់ជាបន្ទាន់ ដោយនេះជាអំពើល្មើសច្បាប់ ដែលអាចបង្កគ្រោះថ្នាក់ដល់ប្រជាពលរដ្ឋ ។
លោកបន្តថា ជំនាញផ្នែកសុខាភិបាលនេះមិនមែនចេះតែបង្រៀនបន្តៗគ្នានៅតាមគ្លីនិក រួចទៅបើកទីតាំងមួយផ្សេងទៀតនោះទេ គឺត្រូវមានការបណ្តុះបណ្តាលត្រឹមត្រូវច្បាស់លាស់ចេញពីសាលាដែលមានការអនុញ្ញាតិពីក្រសួងសុខាភិបាល ។
លោកគួច ចំរើន បានជំរុញឲ្យមន្ត្រីពាក់ព័ន្ធផ្នែកសុខាភិបាលទាំងអស់ត្រូវយកចិត្តអ្នកជំងឺមក ដាក់ក្នុងខ្លូន ចំណែកអ្នកជំងឺក៏ត្រូវយកចិត្តគ្រូពេទ្យមកដាក់ខ្លួនផងដែរ ព្រោះរាល់ពេលអ្នកជំងឺ មកជួបគ្រូពេទ្យ ពិតជាចង់បានចម្លើយនៃការពិគ្រោះយោបល់រវាងអ្នកជំងឺ និងគ្រូពេទ្យ ប្រសិន បើអ្នកជំងឺទទួលបានការពិគ្រោះយោបល់រួចហើយ សូមឲ្យអ្នកជំងឺផ្តល់ទំនុកចិត្តចំពោះក្រុម គ្រូពេទ្យយើងវិញ ។
លោកបន្តថា បច្ចុប្បន្នអាជ្ញាធរកំពុងខិតខំជំរុញដោយត្រូវរួមសហការជាមួយមូលនិធិសមធម៌ គាំពារសង្គម ហើយអាចជាសមាជិក បេឡាជាតិសន្តិសុខសង្គម (ប.ស.ស) ត្រូវផ្តល់ដល់ សមាជិកភូមិ មេភូមិ និងមន្ត្រីជាប់កិច្ចសន្យាទាំងអស់ ក្នុងខេត្ដដែលគ្រប់គ្រងដោយគណៈ បញ្ជាការឯកភាពចែកជូនសម្រាប់ប្រើប្រាស់សេវា ប.ស.ស ឲ្យកាន់តែល្អប្រសើរឡើង បន្ថែមទៀត ។
លោកគួច ចំរើន សំណូមពរឲ្យមន្ត្រីសុខាភិបាលត្រូវបង្កើនការយកចិត្តទុកដាក់បម្រើ សេវាសាធារណៈឱ្យបានកាន់តែល្អថែមទៀត និងចូលរួមគោរច្បាប់ចរាចរណ៍ និងបញ្ហាគ្រឿង ញៀនដោយវាជាសត្រូវធំបំផុតរបស់យើងគ្រប់គ្នា គឺត្រូវបម្រើសេវាជូនអ្នកចង់ផ្តាច់គ្រឿងញៀន និងត្រូវផ្តល់ថ្នាំដោយមិនយកម្រៃឡើយ ៕
ចែករំលែកព័តមាននេះ