រាជធានីភ្នំពេញ ៖ មន្ត្រីក្រោមឱវាទក្រសួងឧស្សាហកម្ម និងសិប្បកម្មប្រមាណ២១នាក់ ក្នុងនោះមានមន្ត្រីថ្នាក់កណ្តាល នៃ ក្រសួងឧស្សាហកម្ម និងសិប្បកម្ម១៧រូប និងមន្ត្រីមន្ទីរឧស្សាហកម្ម រាជធានីភ្នំពេញ៤រូប មកបំពេញមុខងារផ្តល់សម្បទា ជាមន្ត្រីនគរបាលយុត្តិធម៌ កាលពីព្រឹកថ្ងៃទី៣០ ឧសភា ២០១៨ បានទៅធ្វើពិធីស្បថ នៅសាលាដំបូងរាជធានី្នភ្នំពេញ។ ដើម្បីឱ្យក្លាយខ្លួនទៅជាមន្ត្រីនគរបាលយុត្តិធម៌ សម្រាប់បង្ក្រាបលើបទល្មើសពិសេស ពាក់ព័ន្ធកិច្ចការងាររបស់សាមីក្រសួង ដោយមិនចាំបាច់ត្រូវការកម្លាំសមត្ថកិច្ចនគរបាល ឬកងរាជអាវធហត្ថនោះឡើយ។ កម្មវិធីសម្បថនោះបានធ្វើឡើងនៅក្នុងសាលសវនាការមួយ នៃសាលាដំបូងរាជធានីភ្នំពេញ ដែលដឹកនាំដោយលោក កោ វណ្ឌី អនុប្រធានសាលាដំបូង លោក សៀង សុខ ព្រះរាជអាជ្ញារង នៃអយ្យការសាលាអមសាលាដំបូង ព្រមទាំងក្រឡាបញ្ជីកត់ត្រាយ៉ាងយកចិត្តទុកដាក់។
អ្នកច្បាប់ម្នាក់បានលើកឡើងថា ការយល់ព្រមឱ្យមន្ត្រីក្រសួងនីមួយៗ បានចូលស្បថក្លាយទៅជាទៅជាមន្ត្រីនគរបាលយុត្តិធម៌នេះ គឺជាករណីពិសេសសម្រាប់ក្រសួងនីមួយៗនោះ មានសិទ្ធិពេញលេញ អនុវត្តច្បាប់ពាក់ព័ន្ធលើបទល្មើសព្រហ្មទណ្ឌ ពិសេសអាចឃាត់ ឬចាប់ខ្លួនជនសង្ស័យ និង កសាងសំណុំរឿងបញ្ជូនទៅកាន់សាលាដំបូងដោយខ្លួនឯង មិនចាំបាច់ប្រគល់ទៅសមត្ថកិច្ចនគរបាល ឬ កងរាជអាវុធហត្ថទេ។ អ្នកច្បាប់បានឱ្យដឹងទៀតថា នេះជាករណីបទល្មើសពិសេស អីចឹងបានជាក្រសួងតម្រូវ បញ្ជូនឱ្យមន្ត្រីគេមកស្បថនៅសាលាដំបូងរាជធានភ្នំពេញ ឬសាលាឧទ្ធរណ៍បែបនេះ។
(ពាក្យសម្បថ ឬហៅថាសច្ចាប្រណិធាន) ៖ ខ្ញុំសុំឆ្លើយតែការពិត ដែលខ្ញុំបានឃើញ បានឮ បានដឹង និងបានចាំផ្ទាល់។ បើខ្ញុំឆ្លើយមិនពិតដោយប្រការណាមួយ សូមអស់ទេពព្រឹក្ស អារក្ខអ្នកតា និងបារមីដ៏សក្តិសិទ្ធិទាំងអស់ បរាមុខខ្ញុំ ឱ្យវិនាស អន្តរាយទ្រព្យសម្បត្តិ និងស្លាប់តៃហោងយ៉ាងវេទនា តែបើខ្ញុំឆ្លើយពិតត្រង់ សូមទេវតាជួយខ្ញុំមានទ្រព្រសម្បត្តិសម្បូរហូរហៀរ និងរស់នៅប្រកបដោយសេចក្តីសុខក្សេមក្សាន្ត ជួបជុំបងប្អូន ញាតិផៅសន្តាន ជារៀងរហូតគ្រប់ជាតិកុំបីខានឡើយ៕
ចែករំលែកព័តមាននេះ