រាជធានីភ្នំពេញ ៖ បុរសម្នាក់ដឹងខ្លួនឯងមិនស្រួលខ្លួន ពេលកំពុងបើកបររថយន្តក៏ឈប់អែបទៅនឹងចិញ្ចើមផ្លូវ ហើយក៏ដេកស្លាប់ទៅ ដែលករណីនេះសង្ស័យកើតរោគខ្យល់គរ ។ ហេតុការណ៍នេះបង្កឲ្យភ្ញាក់ផ្អើលកាលពីវេលាម៉ោង១០និង១០នាទីព្រឹក ថ្ងៃទី២៩ ឧសភា ស្ថិតនៅលើកំណាត់ផ្លូវលេខ១៩៥៨ ភូមិទំនប់ សង្កាត់ភ្នំពេញថ្មី ខណ្ឌសែនសុខ។ សពឈ្មោះ ហាន គុណផានិត អាយុ៤០ឆ្នាំ ជាបុគ្គលិកក្រុមហ៊ុនមួយ ។
តាមប្រជាពលរដ្ឋបាននិយាយថា មុនពេលកើតហេតុគេឃើញរថយន្តម៉ាកហុីយ៉ាន់ដាយ ប្រភេទទេសចរណ៍ ពណ៌ស ពាក់ស្លាកលេខ ភ្នំពេញ 2AS-2766 បើកបរដោយបុរសរងគ្រោះ តាមផ្លូវ១៩៥៨ ទិសដៅពីលិចទៅកើត ។ លុះមកដល់ចំណុចខាងលើ ក៏ចតអែបទៅនឹងចិញ្ចើមផ្លូវ បើកកញ្ចក់សងខាង និងបញ្ឆេះម៉ាសុីន ដេកទ្រោបឱបជាប់នឹងដៃចង្កូត តាំងពីវេលាម៉ោង៨និង១៥នាទីព្រឹក រហូតដល់វេលាម៉ោង១០និង១០នាទីព្រឹកទៅហើយ នៅតែឃើញបុរសនោះដេកក្នុងរថយន្ត មិនព្រមបើកចេញទេ។
ដោយសារមានការងឿងឆ្ងល់ ពលរដ្ឋនៅក្បែរនោះបានដើរទៅអើតមើល ទើបដឹងថា អ្នកបើរថយន្តស្លាប់បាត់ទៅហើយ ក៏ឆោឡោ និងរាយការណ៍ប្រាប់សមត្ថកិច្ច ។ស្របពេលដែលពលរដ្ឋ សមត្ថកិច្ច កំពុងភ្ញាក់ផ្អើល ស្រាប់តែលេចមុខបុរសម្នាក់មកអះអាងថា ជារថយន្តរបស់ខ្លួន បានឲ្យបុរសរងគ្រោះខាងលើ បើកយកទៅលាងសំអាតដើម្បីដឹកប្រពន្ធគាត់ទៅកម្មវិធីនៅផ្សារអុីអនដោយបើកចេញពីផ្ទះនៅម៉ោង៧និង៣០នាទីព្រឹកម្ល៉េះ ។ ក្រោយពីចេញពីផ្ទះហើយគាត់មិនឃើញបុរសនោះបើករថយន្តមកវិញក៏ទូរស័ព្ទចូលហើយតែមិនលើកក៏បានបើករថយន្តស្វែងរក ក្រែងកើតមានបញ្ហាអ្វី ក៏ប្រទះឃើញរថយន្តនិងឃើញជនរងគ្រោះស្លាប់ទៅវិញ ។
ក្រោយប្រទះឃើញសពក្នុងរថយន្ត សមត្ថកិច្ចមូលដ្ឋាន សមត្ថកិច្ចជំនាញចុះទៅពិនិត្យដល់កន្លែងកើតហេតុ គ្រាន់តែសន្និដ្ឋានជំហានដំបូងសង្ស័យស្លាប់ដោយសារគាំងងបេះដូង ។
ចែករំលែកព័តមាននេះ