ខេត្តកំពង់ឆ្នាំង ៖ មានរឿងភ្ញាក់ផ្អើលមួយ បានកើតមានឡើងកាលពីល្ងាចថ្ងៃទី២៨ ឧសភាបន្ទាប់ពីលោកមេភូមិព្រះរាមរង្សី ឃុំជ្រៃបាក់ស្រុករលាប្អៀរ បានផ្ញើ រូបភាពវត្ថុបុរាណទៅឱ្យលោកស្មៀនឃុំជ្រៃបាក់ដោយអះអាងថា លោក គ្រូចៅអធិការវត្តព្រះរាមរង្សីគាស់បាន ។ បន្ទាប់មក ស្មៀនឃុំបានឆាតរូបនោះបន្តទៅឱ្យអ្នកកាសែតបានដឹងហើយក៏បានផ្អើលនាំគ្នាទៅយកព័ត៌មានតែម្តង ព្រោះថាជារឿងរ៉ាវគួរឱ្យចាប់អារម្មណ៍ ប៉ុន្តែពេលទៅដល់ជួបលោកមេភូមិក៏បានប្រាប់ថា គាត់បង្ហោះរូបនោះលេងសើចជាមួយស្មៀនឃុំទេ ។ ប៉ុន្តែ អ្នកកាសែតនិងលោកប្រធានមន្ទីរវប្បធម៌និងវិចិត្រសិល្បៈខេត្តមិនជឿ ហើយបានបង្ហាញរូបភាពនិងសួរដេញដោលលោកចៅអធិការវត្តទៀត ទើបលោកចៅអធិការវត្តព្រមបង្ហាញវត្ថុបុរាណនោះដល់ក្រុមអ្នកកាសែត និងលោក សុខ ធួក ប្រធានមន្ទីរវប្បធម៌និងវិចិត្រសិល្បៈខេត្តពិនិត្យ ។
នៅក្នុងរឿងនេះ លោកគ្រូចៅអធិការវត្តព្រះរាមរង្សីនាម នៅ ជឿន ព្រះជន្ម៧២ឆ្នាំ បានមានថេរដិកាមិនគួរឱ្យជឿថា ជារៀងរាល់ថ្ងៃ ព្រះអង្គចេះតែស្រមៃថា បើរើសបានកំណប់មួយមកនឹងបានលុយយកទៅធ្វើព្រះវិហារបន្ត ដែលបច្ចុប្បន្នកំពុងជំពាក់ថ្លៃជាងចំនួនជាង៧០លានរៀលទៀត ។ លុះនៅយប់ថ្ងៃទី២០ ខែឧសភា លោកបានសុបិនឃើញ កុមារមានបុណ្យម្នាក់អាយុ៥ឆ្នាំ ព្រះនាមឧត្តមនមោ ឱ្យទៅគាស់វត្ថុបុរាណមានតម្លៃនៅក្នុងដី តែមិនដឹងថានៅទីណាទេ ដើម្បីយកមកលក់កសាងព្រះវិហារដែលកំពុងជំពាក់គេនេះ ។ ក្នុងសុបិននោះ ព្រះអង្គហាក់ដូចជានិមន្តទៅគាស់កំណប់តែមួយអង្គឯង ហើយពេលត្រឡប់មកវិញ ក៏ដឹងខ្លួនគឺព្រះអង្គបានឈរនៅក្នុងកុដិដោយមានកាន់វត្ថុបុរាណចំនួន៣ផងដែរ ។
លោកតាមានសង្ឃដីកាទៀតថា នៅថ្ងៃបន្ទាប់មក ព្រះអង្គបានរកគេមើលវត្ថុបុរាណនោះ គេថាគ្មានតម្លៃទេក៏បានលាក់វត្ថុនោះទុកទៅ ។ ប៉ុន្តែនៅរសៀលថ្ងៃទី២៨ ខែឧសភា លោកតាបានបង្ហាញនិងមានថេរដីកាប្រាប់លោក ហាក់ ប្រធានភូមិព្រះរាមរង្សី ហើយក៏បែកធ្លាយរឿងនេះដល់ស្មៀនឃុំ និងបែកធ្លាយដល់អ្នកកាសែត និងលោកប្រធានមន្ទីរវប្បធម៌និងវិចិត្រសិល្បៈខេត្តតែម្តង ។ ទាក់ទងនឹងវត្ថុបុរាណនេះ ក្រោយពីលោក សុខ ធួក ប្រធានមន្ទីរវប្បធម៌និងវិចិត្រសិល្បៈខេត្ត រូមនឹងមន្ត្រីជំនាញពិនិត្យមើលយ៉ាងយកចិត្តទុកដាក់រួចមក បាននិយាយឱ្យដឹងថា វត្ថុកសាងពីលោហៈទាំង៣នេះមាន រូបមាន់ចំនួន២ និងរូបឃ្លោកមានព្រះនិងលោកតាកំប៉ោងរបស់ចិនមិនមែនជាវត្ថុបុរាណរបស់ខ្មែរទេ គឺជាវត្ថុដែលគេកសាងក្នុងសម័យបច្ចុប្បន្នតាមរចនាបថសាសនាចិន ដោយនៅបាតក្រោមមានអក្សរចិនជាភ័ស្តុតាង ។ វត្ថុនេះគេធ្វើដើម្បីលក់ហើយអ្នកទិញយកដាក់តាំងលំអក្នុងផ្ទះតែប៉ុណ្ណោះ មិនមានតម្លៃជារបស់បុរាណឡើយ ។ លោកថារបស់នេះទៀតសោត ក៏មិនមានភ័ស្តុតាងណាបង្ហាញថា បានកប់ក្នុងដីដែរ គឺជារបស់ដែលនៅលើដី គឺស្អាតចែសដូចទើបទិញពីផ្សារ។
លោកប្រធានមន្ទីរវប្បធម៌និងវិចិត្រសិល្បៈខេត្ត ក៏បានសំណូមពរដល់ប្រជាពលរដ្ឋនៅក្នុងមូលដ្ឋាន សូមកុំចេះតែជឿនូវជំនឿអរូបីផ្តេសផ្តាស ចាញ់ឧបាយកលគេ ដូចជាយកទឹកទៅស្រោចលើវត្ថុលោហៈនេះយកមកទទួលទានដើម្បីព្យាបាលជំងឺផ្សេងៗជាដើម ប្រយ័ត្នពុលរាករូសមានគ្រោះថ្នាក់ដល់ខ្លួន ព្រោះរឿងខ្លះគឺជារឿងប្រឌិតឱ្យគេជឿដើម្បីអ្វីមួយប៉ុណ្ណោះ ។ ពាក់ព័ន្ធនឹងបញ្ហានេះ កាលពីប៉ុន្មានឆ្នាំកន្លងទៅនៅវត្តមួយក្នុងស្រុកបរិបូណ៌ ក៏មានជំនឿមិនសមហេតុសមផលនេះដែរថា មានមនុស្សស្រីម្នាក់កើតកូនមកជាពងនិងចិញ្ចៀន ហើយក៏មានមនុស្សភ្លូកទឹកភ្លូកដីចូលលុយកាក់ តែក្រោយមកក៏សាបរលាបទៅវិញ ព្រោះជារឿងបោកប្រាស់របស់បុគ្គលដើម្បីលាភសក្ការៈតែប៉ុណ្ណោះ ៕
ចែករំលែកព័តមាននេះ