រាជធានីភ្នំពេញ ៖ តារាកំប្លែងលោកសួន ហុន ហៅនាយតឹង បានធ្វើឲ្យមហាជនភ្ញាក់ផ្អើលខ្លាំង បន្ទាប់ពីឃើញនាយគ្រងឯកសណ្ឋានជាយោធាថ្នាក់ឧត្តមសេនីយ៍ត្រី ហើយបង្ហោះតាមហ្វេសប៊ុកកាលពីពេល ថ្មីៗកន្លងមកនេះ ។
រូបភាពមួយសន្លឹករបស់នាយតឹង ជាមន្ត្រីយោធាថ្នាក់ឧត្តមសេនីយ៍ត្រី បានក្លាយជាប្រធានបទនៃការជជីកសួរគ្នា និងការចាប់អារម្មណ៍ពីមហាជន ដោយនៅក្នុងនោះក៏មានអ្នកខ្លះបាននាំគ្នារិះគន់ផងដែរលើតារារូបនេះ ។
នាយតឹង បានបកស្រាយប្រាប់មហាជនកុំឲ្យមានការយល់ច្រឡំចំពោះរូបភាពដែលបានឃើញនេះ ព្រោះគ្រាន់តែជាឈុតសម្តែងក្នុងខ្សែភាពយន្តដែលថតសម្រាប់ចាក់ផ្សាយតាមស្ថានីយទូរទស្សន៍ប៉ុណ្ណោះ ។
កំប្លែងនាយតឹង បានបញ្ជាក់ថារូបភាពដែលលោកគ្រងឯកសណ្ឋានយោធានោះគឺជាតួអង្គសម្តែងនៅក្នុងរឿង«មន្តស្នេហ៍អនុសេនីយ៍ត្រី»របស់ស្ថានីយទូរទស្សន៍ប៉ុស្តលេខ៥ ដូច្នេះកុំមានការយល់ច្រឡំ ហើយវាយប្រហាររូបនាយ ។
ឆ្លើយតបការរិះគន់តារាកំប្លែងនាយតឹងបានថា «វាជារឿងធម្មតាមិនមានបញ្ហាសម្រាប់ខ្ញុំឡើយ ព្រោះទាំងនេះគឺជាការយល់ច្រឡំពីមហាជនមកលើរូបខ្ញុំ» ។
លោកសួង ហុន ហៅនាយតឹង ឆ្លៀតថ្លែងអំណរគុណចំពោះមហាជនដែលបានចាប់អារម្មណ៍លើរូបនាយទាំងការសម្តែង និងសកម្មភាពប្រចាំថ្ងៃ ។
បើតាមនាយតឹង ឲ្យដឹងថារឿងដែលលោកសម្តែងនោះមានការចូលរួមសម្តែងពីតារាចាស់-ថ្មីជាច្រើនដួង ដូចជាកញ្ញានី មុន្នីនាថ លោកហេង ដារី តារាកំប្លែងលោកខាត់ ចំរើន និងលោកថមមី ជាដើម ហើយភាគច្រើនគឺសម្តែងជាតួអង្គយោធា ។ រឿងនេះកំពុងតែថតមិនទាន់ចប់នៅឡើយ ។
ឯកសណ្ឋានយោធាដែលស្លៀកពាក់រហូតមានការចែកចាយយ៉ាងច្រើននោះ នាយតឹង ឲ្យដឹងថា នាយសម្តែងជាតួអង្គមេបញ្ជាការ មើលការខុសត្រូវកូនទាហាន ហើយតួឯកប្រុសជាកូនទាហាន តាមសុំស្នេហ៍កូនស្រីរបស់នាយដែលជាកូនទាហានម្នាក់ដែរ ៕
ចែករំលែកព័តមាននេះ