ដល់ណាដល់ណីហើយ?… រឿងប៉ូលិសវាយទាត់ជនសង្ស័យនោះ
- ប៉ៃលិន
ខេត្តប៉ៃលិន ៖ នៅព្រឹកថ្ងៃទី២៩ ខែឧសភា លោក សុទ្ធ សំអោក ចៅក្រមជម្រះក្តីសាលាដំបូងខេត្ត បានលើកយកសំណុំរឿងមន្ត្រីនគរបាលព្រហ្មទណ្ឌកម្រិតធ្ងន់ខេត្ត ដែលរងការចោទប្រកាន់ថា…
ខេត្តប៉ៃលិន ៖ នៅព្រឹកថ្ងៃទី២៩ ខែឧសភា លោក សុទ្ធ សំអោក ចៅក្រមជម្រះក្តីសាលាដំបូងខេត្ត បានលើកយកសំណុំរឿងមន្ត្រីនគរបាលព្រហ្មទណ្ឌកម្រិតធ្ងន់ខេត្ត ដែលរងការចោទប្រកាន់ថា បានវាយដំជនរងគ្រោះម្នាក់ បណ្តាលឱ្យបាក់ឆ្អឹងជំនីរអស់២កាំ កាលពីឆ្នាំ២០១៤កន្លងមក ។ ក្រោយសវនាការ ចៅក្រមបានប្រកាសថា សាលក្រមនឹងប្រកាសនៅវេលាម៉ោង៣រសៀលថ្ងៃទី២ ខែកក្កដា ឆ្នាំ២០១៨ ខាងមុខនេះ ។
សូមរំឭកថា បុរសម្នាក់ឈ្មោះ ជា រ៉ាស៊ី អាយុ៣០ឆ្នាំ មុខរបរធ្វើចម្ការ មានទីលំនៅក្នុងភូមិស្ទឹងកាច់ ឃុំស្ទឹងកាច់ ស្រុកសាលាក្រៅ បានប្តឹងឈ្មោះ ផាត គឹមយូ ជាមន្ត្រីនគរបាលព្រហ្មទណ្ឌកម្រិតធ្ងន់ខេត្តថា ប្រើអំពើហិង្សាធ្វើឱ្យគាត់បាក់ឆ្អឹងជំនីរអស់២កាំ ខណៈចុះទៅចាប់រូបគាត់ពីបទប្រើហិង្សាក្នុងគ្រួសារ បន្ទាប់ពីពួកគាត់បានដោះស្រាយគ្នារួចរាល់នៅប៉ុស្តិ៍នគរបាលរដ្ឋបាលឃុំស្ទឹងកាច់ រយៈពេលប្រហែល១សប្តាហ៍មកហើយ ។ សមត្ថកិច្ចបានចុះទៅចាប់និងប្រើហិង្សាលើជនរងគ្រោះ គឺកាលពីវេលាម៉ោង៨និង៣០នាទីយប់ថ្ងៃទី២ ខែសីហា ឆ្នាំ២០១៤ រួចបញ្ជូនទៅស្នងការដ្ឋាននគរបាលខេត្ត លុះនៅថ្ងៃទី៤ ខែសីហា សមត្ថកិច្ចក៏បានបញ្ជូនបុរសឈ្មោះ ជា រ៉ាស៊ី ទៅសាលាដំបូង ។
បើតាមបុរសឈ្មោះ ជា រ៉ាស៊ី រៀបរាប់ថា កាលពីថ្ងៃទី២៨ ខែកក្កដា ឆ្នាំ២០១៤ វេលាម៉ោង៩ព្រឹក គាត់និងប្រពន្ធឈ្មោះ រ៉ាយសុខរ៉ា អាយុ២៩ឆ្នាំ បានឈ្លោះប្រកែកគ្នាបន្តិចបន្តួច ស្រាប់តែប្រពន្ធទាញដំបងវាយម៉ូតូបែកកុងទ័រនិងបែកក្បាំង ។ ពេលនោះរូបគាត់ខឹងយ៉ាងខ្លាំង ក៏ស្ទុះទៅទះកំផ្លៀងប្រពន្ធ១ដៃ ។ បន្ទាប់មក ប្រពន្ធគាត់ក៏រត់ទៅទាញយកកូនកាំបិតចុងស្រួចបម្រុងមកចាក់ តែត្រូវរូបគាត់រុញចេញ បណ្តាលឱ្យដួលប៉ះនឹងពាងរលាត់ខ្ទង់ច្រមុះ ហើយនាងក៏ចេញពីផ្ទះដោយខ្លួនឯង ទៅផ្ទះឪពុកបង្កើតដែលនៅក្បែរគ្នា ។ លុះនៅថ្ងៃទី១ ខែសីហា ឆ្នាំ២០១៤ ក៏មានការសម្រុះសម្រួលពីចាស់ទុំ និងបានធ្វើកិច្ចសន្យានៅប៉ុស្តិ៍នគរបាលរដ្ឋបាលឃុំស្ទឹងកាច់ ហើយពួកគាត់ក៏យល់ព្រមទៅនៅផ្ទះជាធម្មតាវិញ ។
ប៉ុន្តែមិនដឹងជាមូលហេតុអ្វីទេ ស្រាប់តែនៅថ្ងៃទី២ ខែសីហា ២០១៤ វេលាម៉ោង៨និង៣០នាទីយប់ មាននគរបាលការិយាល័យព្រហ្មទណ្ឌកម្រិតធ្ងន់ខេត្តដឹកនាំដោយលោក ជា វ៉ាន់រ៉ន អតីតក្រឡាបញ្ជីអមសាលាដំបូងខេត្ត លោក ឆម វ៉ាន់ធី នាយការិយាល័យព្រហ្មទណ្ឌកម្រិតធ្ងន់ លោក ណុប សាវុធ និងបុរសម្នាក់ឈ្មោះ ផាត គឹមយូ បានប្រើហិង្សាលើរូបគាត់រហូតដល់បាក់ឆ្អឹងជំនីរទៅវិញ ។ គាត់បន្តថា ពេលចុះទៅចាប់នោះគឺឈ្មោះ ផាត គឹមយូ បានទះកំផ្លៀងគាត់ចំនួន៣ដៃ លុះពេលទៅដល់ស្នងការដ្ឋានខេត្ត ខណ:ចុះពីរថយន្ត មន្ត្រីនគរបាលរូបនេះបានទាត់គាត់ចំនួន៣ជើងផ្ទួនៗគ្នាចំឆ្អឹងជំនីរខាងស្តាំ ។ លុះពេលបញ្ជូនទៅសាលាដំបូង មន្ត្រីនគរបាលដដែលនេះបានទះកំផ្លៀងគាត់២ដៃទៀត ព្រមទាំងបានស្រែកប្រាប់ឱ្យអ្នកទោសឯទៀតវាយបន្ថែម ។
ចាប់តាំងពីថ្ងៃនៅក្នុងពន្ធនាគារមក គាត់ចេះតែឈឺចុកចាប់ពេញខ្លួនប្រាណ ជាពិសេសឆ្អឹងជំនីរផ្នែកខាងស្តាំ ។ លុះមកដល់ថ្ងៃបងស្រីគាត់ធានាឱ្យចេញនៅក្រៅឃុំ ឃើញសភាពក្អកធ្លាក់ឈាម សាច់ញាតិក៏បញ្ជូនទៅកាន់មន្ទីរពេទ្យបង្អែកខេត្តដើម្បីព្យាបាល និងឆ្លុះមើលឃើញឆ្អឹងជំនីរបាក់អស់២កាំ គឺកាំទី៧ និងទី៨ ។
រឿងរ៉ាវរបស់គាត់កើតតាំងពីឆ្នាំ២០១៤ តែរហូតមកដល់ឆ្នាំ២០១៨នេះ មិនទាន់ទទួលបានយុត្តិធម៌នៅឡើយ ។ ម្យ៉ាងវិញទៀត គាត់ជាប្រជាពលរដ្ឋសាមញ្ញ មិនចេះតែប្តឹងសមត្ថកិច្ចនោះទេ បើមិនប្រើអំពើហិង្សាមកលើគាត់ក៏គាត់មិនប្តឹងដែរ ។
នៅក្នុងបន្ទប់ជំនុំជម្រះក្តី លោក ផាត គឹមយូ ដែលជាជនត្រូវចោទបានបដិសេធថា រូបគេបានចុះទៅចាប់ជនរងគ្រោះមែន តែមិនបានប្រព្រឹត្តដូចការចោទប្រកាន់របស់ជនរងគ្រោះឡើយ ។ តាំងពីចាប់បញ្ជូនទៅស្នងការដ្ឋានរហូតដល់ក្នុងពន្ធនាគារ ក៏អត់បានវាយដែរ ហើយនេះប្រហែលជាអ្នកទោសនៅក្នុងពន្ធនាគារជាអ្នកវាយ ទើបបណ្តាលឱ្យបាក់ឆ្អឹងជំនីរបែបនេះ ។ គាត់ក៏សូមឱ្យចៅក្រមរកយុត្តិធម៌ជូន ចំពោះការចោទប្រកាន់នេះដែរ ។ ទោះបីជាយ៉ាងណាក៏ដោយ រឿងក្តីមួយនេះ នឹងអាចដឹងថា អ្នកណាខុសអ្នកណាត្រូវនៅពេលសាលាដំបូងខេត្ត ប្រកាសសាលក្រោមនៅថ្ងៃទី២ ខែកក្កដាខាងមុខ ៕
ចែករំលែកព័តមាននេះ