ខេត្តកំពង់ធំ ៖ លោកវរសេនីយ៍ត្រី កែ កញ្ចនា អធិការរងនគរបាលស្រុកបារាយណ៍ ទទួលផ្នែកព្រហ្មទណ្ឌ បានឱ្យដឹងថា មានករណីរំលោភសេពសន្ថវៈមួយកើតឡើងនៅក្នុងបន្ទប់ផ្ទះសំណាក់ តារាស៊ី ស្ថិតក្នុងភូមិត្រស់ ឃុំបល្ល័ង្កកើត ស្រុកបារាយណ៍ កាលពីវេលាម៉ោង១១ និង២០នាទីយប់ថ្ងៃទី២៧ ឧសភា លុះនៅម៉ោង៥ និង៣០នាទីព្រឹកថ្ងៃ២៨ ឧសភា ទើបសមត្ថកិច្ចទទួលបណ្តឹង ។
ក្មេងស្រីរងគ្រោះជាពលរដ្ឋរស់នៅខេត្តរតនគិរី និងបានមកស្នាក់នៅ និងរើសស្វាយចន្ទីនៅ ឃុំក្រយា ស្រុកសន្ទុក ចំណែកជនសង្ស័យខូចភ្នែកម្ខាង ឈ្មោះ សែម ឆៃ អាយុ២៦ឆ្នាំ នៅ ឃុំមានជ័យ ស្រុកសំឡូត ខេត្តបាត់ដំបង ក៏មកស្នាក់នៅរើសស្វាយចន្ទីនៅចម្ការជាមួយគ្នា ។ យោងតាមក្មេងស្រីរងគ្រោះឲ្យដឹងថា នៅថ្ងៃទី២៧ ខែឧសភានោះ វេលាម៉ោង៤រសៀល ឪពុកនាងបានពឹងជនសង្ស័យឱ្យឌុបនាង ទៅបើកលុយនៅផ្សារកំពង់ថ្ម និងពឹងឱ្យទៅឌុបនាងមកពីភូមិត្រពាំងឫស្សី ដើម្បីឡើងរថយន្តឈ្នួលទៅខេត្តរតនគិរីទាំងអស់គ្នា ។ លុះពេលឌុបនាងមកតាមផ្លូវ ជននេះបានឌុបនាងចូលទៅក្នុងព្រៃបម្រុងចាប់រំលោភ តែនាងបានលោតចុះពីលើម៉ូតូ ហើយជនសង្ស័យក៏និយាយលួងលោមឱ្យនាងឡើងជិះម៉ូតូជាមួយរហូតទៅដល់ផ្សារកំពង់ថ្ម ក៏ឌុបនាងចូលទៅដេកនៅផ្ទះសំណាក់តារាស៊ី ដោយប្រាប់ថា ឪពុករបស់នាងស្នាក់នៅទីនោះ ។
ពេលនោះ បានចូលដេកក្នុងបន្ទប់មួយមានគ្រែ២ ហើយដោយយប់កាន់តែជ្រៅផងនោះ នាងក៏ដេកលក់ទៅ ។ ពេលកំពុងលង់លក់ក្នុងដំណេក ស្រាប់តែជនសង្ស័យយកខ្នើយមកខ្ទប់មុខនាង រួចគំរាមកុំឱ្យស្រែក ឯនាងក៏មិនហ៊ានស្រែក ធ្វើឱ្យជនសង្ស័យបានឱកាសចាប់រំលោភនាងរហូតបានសម្រេច ។ លុះព្រឹកឡើង នាងបានទៅដាក់ពាក្យប្តឹងសមត្ថកិច្ចឱ្យចាប់ខ្លួនជនសង្ស័យ ។
ក្រោយពីបានទទួលពាក្យបណ្តឹង សមត្ថកិច្ចបានទៅអន្តរាគមន៍ភ្លាមៗឃាត់ខ្លួនជនសង្ស័យនាំមកសាកសួរនៅអធិការដ្ឋាននគរបាលស្រុក ។ នៅចំពោះមុខសមត្ថកិច្ច ជនសង្ស័យសារភាពថា រូបគេពិតជាបានរំលោភនាងប្រាកដមែន ដោយសារតែរូបគេធ្វើការជាមួយគ្នាយូរៗទៅ ក៏ចាប់ចិត្តស្រឡាញ់នាង ៕
ចែករំលែកព័តមាននេះ