ខេត្តប៉ៃលិន ៖ បន្ទាប់ពីមន្ត្រីនគរបាលបានបញ្ជូនយុវជន៤នាក់ ក្នុងចំណោម៥នាក់ ទៅតុលាការខេត្តកាលពីថ្មីៗនេះពាក់ព័ន្ធនឹងបណ្តឹងរបស់កុមារ២នាក់ ចោទថា ពួកគេទៅរករឿងវាយដំរហូតដល់រងរបួស ។ រហូតមកដល់វេលាម៉ោង១២និង៣០នាទីថ្ងៃទី២៩ ខែឧសភា…
ខេត្តប៉ៃលិន ៖ បន្ទាប់ពីមន្ត្រីនគរបាលបានបញ្ជូនយុវជន៤នាក់ ក្នុងចំណោម៥នាក់ ទៅតុលាការខេត្តកាលពីថ្មីៗនេះពាក់ព័ន្ធនឹងបណ្តឹងរបស់កុមារ២នាក់ ចោទថា ពួកគេទៅរករឿងវាយដំរហូតដល់រងរបួស ។ រហូតមកដល់វេលាម៉ោង១២និង៣០នាទីថ្ងៃទី២៩ ខែឧសភា ឆ្នាំ២០១៨នេះ ឪពុកម្តាយពួកគេបាននាំគ្នាមកកាន់សាលាខេត្តប៉ៃលិន ដើម្បីសុំជួយអន្តរាគមន៍រកយុត្តិធម៌ ។
សូមបញ្ជាក់ថា ជនសង្ស័យ៤នាក់ក្នុងចំណោម៥នាក់ត្រូវបាននគរបាលចាប់ឃាត់ខ្លួន ខណៈឪពុកម្តាយក្មេង២នាក់ចោទប្រកាន់ថា ដើរបង្ករឿង និងវាយដំទៅលើកូនៗរបស់ពួកគេ បណ្តាលឱ្យរងរបួស និងគំរាមមិនឱ្យប្តឹង ។ លុះឪពុកម្តាយពិនិត្យលើខ្លួនកូនពួកគេមានស្នាមរបួសក៏ប្តឹងឱ្យនគរបាលចាប់ឃាត់ខ្លួនតែម្តង ។
ហើយបញ្ហានេះបានកើតឡើងកាលពីវេលាម៉ោង៨និង១៥នាទីយប់ថ្ងៃទី២៦ ខែឧសភា ឆ្នាំ២០១៨ ស្ថិតនៅក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។ អ្នកបង្កហេតុទី១ – ឈ្មោះ ម៉ក់ ករុណា ភេទប្រុស អាយុ១៤ឆ្នាំ (ជាជនដៃដល់) ទី២-ឈ្មោះ ពៅ ចំរុង ហៅឃ្លីន ភេទប្រុស អាយុ១៦ឆ្នាំ ទី៣- ឈ្មោះ វែន សុចិន ភេទប្រុស អាយុ១៧ឆ្នាំ ទី៤- ឈ្មោះ ជឿន ម៉ាប់ ភេទប្រុស អាយុ១៦ឆ្នាំ និង៥-ឈ្មោះ កែវ រក្សា ភេទស្រី (រត់គេចខ្លួន) អ្នកទាំង០៥រស់នៅភូមិឃុំកើតហេតុខាងលើ ។
ចំណែកក្មេងរងគ្រោះមានគ្នា០២នាក់ទី១-ឈ្មោះភុន ស្រីតូច ភេទស្រី អាយុ១២ឆ្នាំ ទី២- ឈ្មោះ សាម សុភ័ត្រា ភេទប្រុស អាយុ៦ឆ្នាំ ។
បើតាមសម្តីរបស់ស្ត្រីឈ្មោះឆឹង សុវណ្ណារី អាយុ៣២ឆ្នាំ ប្តីឈ្មោះកន សុវណ្ណ មានកូនឈ្មោះវែន សុចិន បានដើរតាមមិត្តភក្តិ៤ទៅ៥នាក់បម្រុងទៅលេងហ្គេមនៅក្បែរផ្ទះកុមារទាំងពីរខាងលើ ពេលនោះពួកគេបានទាញយកកាំបិតមកបម្រុងកាប់កូនរបស់គាត់នឹងមិត្តភក្តិ ហើយពួកគេក៏នាំគ្នាចាប់ទាញយកកាំបិតចេញ បណ្តាលឱ្យក្មេងនោះដួលបុកនឹងទ្វារមិនមានស្នាមរបួសអ្វីនោះទេ ។
ក្រោយមកស្រាប់តែឪពុកម្តាយរបស់ពួកគេបានប្តឹងពួកគាត់ឱ្យសងប្រាក់ចំនួន១លាន៨ម៉ែន ដោយប្រាប់ថា សងរួចនឹងឱ្យត្រឡប់ទៅផ្ទះវិញ ស្រាប់តែក្រោយមកគេបញ្ជូនកូនរបស់គាត់ទៅដាក់ពន្ធនាគារទៅវិញទើបធ្វើឱ្យគាត់នាំគ្នាមកតវ៉ាសុំរកយុត្តិធម៌ និងដោះលែងកូនចេញមកវិញ ។
ចំណែកស្ត្រីម្នាក់ឈ្មោះទី ទុំ ជាស្ត្រីមេម៉ាយមានកូនឈ្មោះម៉ក់ ករុណា អាយុ១៤ឆ្នាំ បានរៀបរាប់ឱ្យដឹងថា កូនគាត់ពិតជាមិនបានវាយទៅលើក្មេងប្រុសស្រីទាំង២នាក់ខាងលើទេ ដោយពេលនោះពួកគេដើរក្បែរផ្ទះនោះ ស្រាប់តែក្មេងតូចៗទាញយកកាំបិតចេញពីផ្ទះបម្រុងកាប់ពួកគេ ហើយពួកគេក៏ទាញចាប់ចេញបណ្តាលឱ្យដួលមិនរងរបួសអ្វីទេ បែរជាចោទប្រកាន់កូនរបស់គាត់ថា ចង់សម្លាប់កូនគេ ហើយចង់អារក.កូនរបស់គេទៅវិញ ។
គាត់នាំគ្នាទៅសាលាខេត្តប៉ៃលិនសុំឱ្យអភិបាលខេត្តដែលទើបនឹងឡើងថ្មីលោកផាន់ ចាន់ធុល ជួយរកយុត្តិធម៌ជូនពួកគាត់ព្រោះ បើគេចោទថា កូនៗរបស់ពួកគេប្រើអំពើហិង្សាទៅលើក្មេងពួកគេក៏បានបង់លុយ រួចរាល់អស់ហើយ ប៉ុន្តែក្រោយមកបែរជាបញ្ជូនកូនរបស់គាត់ទៅពន្ធនាគារទៅវិញ ៕
ចែករំលែកព័តមាននេះ