ខេត្តបាត់ដំបង ៖បំពាក់មេដាយការពារជាតិចំនួន១១០៦នាក់ បានពាក់ប្រគល់ឲ្យបងប្អូនអតីតយុទ្ធជនក្នុងស្រុកមោងឬស្សី ខេត្តបាត់ដំបង ក្រោមអធិបតីភាពលោកនាយឧត្តមសេនីយ៍គន់ គីម អគ្គលេខាធិការសមាគមអតីតយុទ្ធជនកម្ពុជា លោកប៊ុត គឺមស៊ាន អភិបាលរងខេត្តបាត់ដំបង ព្រមទាំងមន្ត្រីរាជការកងកម្លាំងប្រដាប់អាវុធដែលជាសមាជិកសមាគមអតីតយុទ្ធជនខេត្តបាត់ដំបងទាំងអស់ចំនួន៦៥នាក់ បានមកចូលរួមវេលាព្រឹកថ្ងៃទី២៩ ខែឧសភា ឆ្នាំ២០១៨ ក្នុងទីស្នាក់ការគណបក្សប្រជាជនកម្ពុជាស្រុកមោងឬស្សី ។
បន្ទាប់ពីប្រធានសមាគមអតីតស្រុកមោងឬស្សីបានរាយការណ៍រួចមក លោកឧត្តមសេនីយ៍ទោ អ៊ុក ឃ្នួច មេបញ្ជាការរងយោធភូមិភាគទី៥ មេបញ្ជាការតំបន់ប្រតិបត្តិការសឹករងបាត់ដំបង និងជាប្រធានសមាគមអតីតយុទ្ធជនខេត្តបាត់ដំបងបានអានសារលិខិតរបស់សម្តេចតេជោហ៊ុន សែន ដែលបានរំលឹកអំពីការដឹងគុណ ជួយរួបរួមគ្នារំដោះប្រទេសជាតិឲ្យបានរួចចាកផុតពីសង្គ្រាម និងប្រល័យពូជសាសន៍រួចមក ។
យើងបានប្រមូលផ្តុំគ្នា គឺខ្មែរតែមួយមកពីគ្រប់ភាគី ដើម្បីកសាងរក្សាសុខសន្តិភាពជាបន្តទៅទៀត តែកន្លងមកមានបងប្អូនយើងខ្លះដែលពលីពិការ និវត្តជន បានជួបការលំបាកដោយគ្មានអ្នកចាប់អារម្មណ៍ឡើយ ហើយទើបតែមានការកែទម្រង់រយៈពេលជាង២ឆ្នាំកន្លងមកនេះ ទើបបងប្អូនយើងមានភាពល្អប្រសើរឡើងវិញ និងសម្តេចបានផ្តាំផ្ញើបន្ថែមថា១ – សូមនាំគ្នាធ្វើអំពើល្អជាបន្តទៅទៀតក្នុងកិច្ចការកសាងប្រទេស និងរក្សាឲ្យបាននូវសុខសន្តិភាពជូនប្រជាជន និងប្រទេសជាតិ ។ ២- គ្រប់អាជ្ញាធរដែនដីគ្រប់លំដាប់ថ្នាក់ត្រូវរៀបចំប្រតិភូចុះសួរសុខទុក្ខដល់បងប្អូនអតីតយុទ្ធជនគ្រប់ទីកន្លែង និងគ្រប់ពេលវេលា ។ ៣- ក្រសួងព័ត៌មានត្រូវនាំគ្រប់ប្រព័ន្ធឃោសនារបស់រដ្ឋ ឯកជន ជួយផ្សព្វផ្សាយចរាចរណ៍ សារលិខិតរបស់រាជរដ្ឋភិបាលក្នុងឱកាសខួបលើកទី១១ ទិវាអតីតយុទ្ធជនកម្ពុជា និងសមិទ្ធិផលនានា ឲ្យសង្គមជាតិ និងអន្តរជាតិបានយល់ដឹងបន្ថែមទៀត ។
៤- ក្រសួងសង្គមកិច្ច អតីតយុទ្ធជន និងយុវនិតិសម្បទា ត្រូវបន្តអនុវត្តន៍ផ្តល់សេវាកម្មបន្ថែមទៀតដល់បងប្អូនយើង ឲ្យកាន់តែមានភាពប្រសើរឡើង ។ ៥- ក្រសួងដែនដីនគរូបនីយកម្ម សំណង និងសង្គមកិច្ច បន្តជំរុញដោះស្រាយគោលនយោបាយស្តីពីការផ្តល់ដីសង្គមកិច្ច ជូនអតីតកងកម្លាំងប្រដាប់អាវុធ និងគ្រួសារឲ្យកាន់តែមានប្រសិទ្ធិភាពខ្ពស់ ។ ៦ – ក្រសួងស្ថាប័នពាក់ព័ន្ធអាជ្ញាធរដែនដី កម្លាំងប្រដាប់អាវុធគ្រប់ប្រភេទ ត្រូវចូលរួមឧបត្ថម្ភគាំទ្រដល់អតីតយុទ្ធជន និងគ្រួសារបន្ថែមទៀត ។ ៧- សមាគមអតីតយុទ្ធជនកម្ពុជាគ្រប់ថ្នាក់បន្តពង្រឹងសកម្មភាព និងសម្រេចចិត្តមហាសន្និបាតតំណាងសមាគមអតីតយុទ្ធជនកម្ពុជាទូទាំងប្រទេសលើកទី២ ដើម្បីលើកកំពស់ គុណភាពបន្ថែមទៀត ។
បន្ទាប់មកលោកឧត្តម នាយឧត្តមសេនីយ៍ អគ្គលេខាធិការបានសំណេះសំណាលសួរសុខទុក្ខបងប្អូនអតីតយុទ្ធជនបានសុំឲ្យបងប្អូនអតីតយុទ្ធជនទាំងអស់ត្រូវចេះសាមគ្គីគ្នា ចេះគោរពស្រលាញ់គ្នាទៅវិញទៅមក ។
ទន្ទឹមនោះដែរត្រូវណែនាំបងប្អូន កូនចៅ ជឿជាក់គាំទ្រការដឹកនាំរបស់សម្តេចតេជោ ជាប្រធានសមាគមអតីតយុទ្ធជនកម្ពុជា និងសុំឲ្យអតីតយុទ្ធជនទាំងអស់ត្រូវនាំបងប្អូនកូនចៅទៅបោះឆ្នោតជូនសម្តេច តេជោ ដើម្បីដឹកនាំប្រទេសជាតិ ឲ្យកាន់តែអភិវឌ្ឍន៍រីកចម្រើនបន្តទៀត បន្ទាប់មកឯកឧត្តម អគ្គលេខាធិការ បានផ្តល់ផ្ទះចំនួន៦ខ្នង ដល់គ្រួសារអតីតយុទ្ធជនទីទ័ល ជាអំណោយដ៏ថ្លៃថ្លារបស់សម្តចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងបានទទួលយកសំណូមពររបស់អតីតយុទ្ធជនមួយចំនួន ដើម្បីដោះស្រាយជូនពួកគាត់ទៀតផង ។
បន្តមកពិធីសំណេះសំណាល និងបំពាក់មេដាយជូនដល់សមាជិកអតីតយុទ្ធជនស្រុកមោងឫស្សី ចំនួន ១១០៦នាក់ រួមមានមេដាយមាសចំនួន១គ្រឿង, មេដាយប្រាក់ចំនួន១២៩គ្រឿង, មេដាយសំរឹទ្ធចំនួន៩៧៦គ្រឿង ក្នុងនោះសមាជិក អតីតយុទ្ធជនដែលចូលរួមម្នាក់ៗទទួលបានមេដាយការពារជាតិម្នាក់ ១គ្រឿង និងថវិកា៥០,០០០រៀល ជាអំណោយរបស់សម្តេច អគ្គមហាសេនាបតីតេជោ ហ៊ុន សែននាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចសម្តេចកត្តិព្រឹទ្ធបណ្ឌិត ប៊ុនរ៉ានី ហ៊ុនសែន ៕
ចែករំលែកព័តមាននេះ